練習做算式

最近我開始練習用手做加減數，今日我仲開始左做乘除，斷不能到小小讀書時佢識做算式但媽媽唔識吧。好難呀 !! 甚至乎唔識點做除數。

半夜企起身

星期一公司有事要好夜先收得工，一知道o既時候已經勁擔心勁擔心唔知點算，因為未試過夜晚唔o係小小身邊，更加唔知點樣o係公司泵多一次奶、放o係邊、同咁多奶點拎返屋企。....

因為咁，我同老公討論左好多日，終於黎到星期日，即係第二日就係呢個「星期一」喇。

半夜又醒左，呢排唔知點解成日半夜醒左就訓唔番，keep 住醒下訓下直至夠鐘起身泵奶。o係張床度典典下之時，久唔久都會聽倒小小o既轉身聲或者叫聲，以前會好緊張即刻起身去睇下佢，後來知道有時其實佢叫一聲之後冇醒左的，就開始唔郁住聽清楚先決定，但今次我聽倒 d 唔尋常o既聲，於是我即刻坐起身，一睇，原來佢真係企左起身，頭先聽倒o個 d 喇喇聲係佢攀住床欄起身o既聲，我即刻走過去問佢「咩事呀?」，佢好冷靜，又冇叫，但雙眼醒晒亮晶晶望住我，我抱起佢，其時係五點鐘左右，拍左一排，佢雙眼都仲係亮晶晶望住我，又冇叫，又冇喊，又唔似肚餓口乾要食奶，所以我亦都冇俾佢食奶，試下佢會唔會訓返。

抱左佢好，佢都係亮晶晶但好乖，於是我決定放返佢落床，由於已經五點幾，所以就索性泵奶 (平時5點9起身泵奶)，小小之後自己仲係o係床，坐起身再企左起身，但佢一直都好乖冇叫。由於我仲想試下佢會唔會訓得番，所以我只係閂左少少門等 d 燈唔好直射入房但如果佢喊我都可以聽倒。泵奶期間，我有熄泵過佢房門裝佢，佢都仲係扶住張床o係度行來行去，我就繼續泵咁 d 奶先 (如果唔係驚o個日我唔o係屋企佢會唔夠奶食)，差唔多半個鐘之後，泵完喇，佢一直都靜靜地自己一個o係房 (當然仲有熟睡o個爸爸)，我沖埋個泵，再放埋奶樽開蒸機，先至過去門口裝佢，佢靜靜地企o係床邊，望下呢邊、望下o個邊，冇嘈。於是我入去抱起佢，問佢 「你今朝做咩呀? 咁早起身o既? 知我今日要夜返呀?」

o個日成日心掛掛，諗起好多野，諗起過左身o既我爸爸 (即係小小o既外公)，諗起自己同媽媽 (即係小小婆婆) 發生過o既小事，自己搭緊車時眼淚留出黎。

夜晚返到屋企，好彩小小已經訓左，我哄落去望住佢，好攰但小小真係好得意。第二朝正常起身、泵奶，小小遲左少少醒，佢一醒我即刻抱起佢，問佢「早晨呀，掛唔掛住媽媽呀? 媽媽好掛住你呀! 你琴日好叻喎，爸爸話你食晒成碗粥喎」，食完奶又好乖地訓左。

原來，真係要唔見倒佢一排先會知道自己係幾咁掛住佢。到星期二晚返放工如常返婆婆度接佢時，我不停咁同佢講，「點解唔見一日你就高左o既? 你琴日同今日有冇乖呀?」等等等等等。哈哈哈，真係好搞笑

9m大，第一次出街食粥仔

最近小小已經滿左9個月大了，時間真係過得好快，咁快就同小小搏鬥 (呀唔係，係「相處」^u^) 左9個月了。

琴日出左一整日街，好攰。上午小小好合作咁訓左大半個鐘，於是我地有時間煲粥同執好要出街o既野，因為琴日係第一次帶粥俾小小出街食。

以前一直都係如果出街就淨係食奶，直至到上一次出完街再同租叔叔去食晚飯，我坐o係個好窄o既卡位餵奶時，我同爸爸講，我地都係唔好再要小小o係街食媃奶喇，要開始帶粥或者糊仔俾佢出街食喇。之前出街食奶係因為怕麻煩，因為小小出街可以埋身食奶，可以乜都唔使帶，但其實小小一向都唔鍾意o係餵奶巾入面食奶，會一直扯條餵奶巾要出返黎，我地就通常會帶餅仔俾佢o係我地食飯o既時候都有 d 野咬下，如果小小都有粥一齊坐o係枱食，相信會好好多。

呢日星期日約左富媽媽同bb，另一個就黎兩歲o既大bb，同大肚婆飲茶。小小好合作咁食晒成碗好杰o既粥仔，跟住冇幾耐訓左，訓到我地散場佢都未醒。唔知係因為我地遲左定係因為小小訓左，好似冇人留意小小咁... 感覺有 d 奇怪... 但我同爸爸都因為小小食晒好杰o既飯仔同訓左好耐感覺好好。

飲完茶，去左 sogo 買飯壺仔，再過富媽媽度攞膠地墊，再的士返屋企。其時已經五點，本來諗住叫婆婆暖定奶開糊仔，點知婆婆唔o係屋企，所以我地就攞兩枝舊奶返屋企先開糊仔。

臨訓，攰到爆...

明天仲有好笑事，另篇 ^^

慢慢搬家中

其實我仲係唔識用 blogger 架... 例如...我仲未識究竟點樣 (係入 circle 定追蹤定點?) bookmark 其他 blogger 媽媽個 blog.....

煩, 所以目前仍然係慢慢搬家中

搬新屋

搬新屋

2013年9月30日 下午12:24公開累計瀏覽次數 1850

 

http://wongsiusiu.blogspot.hk/

新屋

有諗過 yahoo 唔玩就不如唔寫了... 但諗諗下，本來寫 blog 只係為自己，想記式發生過o既只止一次o既小小成長經歷，既然係咁，就女火女

重新開始

由發現自己有左 bb ﹐開始左o係 yahoo blog 記低一 D 記得o既事。有左 bb 之後，覺得呢件事係真真工正一生人只得一次，所以決定盡量記低得幾多得幾多，唔經唔覺，原來都寫左好多篇。 bb 八個月大。近來好少機會可以上 blog，平時都係o係公司上，o係屋企根本唔會有時間。最近一次隔左好耐先有時間 login，一login 見倒一大段紅色字話 yahoo blog 要 close.... 估唔倒個個都話 yahoo blog 唔好用，佢就真係執俾你睇。雖然其他 blogger 都己經輕鬆搬家，但以我o既工作生活模式，與其研究點機動搬家，不如手動搬家.... 寫呢一篇，記錄其實以前係用 yahoo blog 的，不過o係 blogspot set 返當日個日子而已.. ^o^ 開心返啦

8個月BB

好耐冇寫 post 喇，雖然重要待辦事項係要研究下去邊個新 blog 同開新 blog，但難得小小訓左 (今日星期六，而家係 9.11am)，快 d 寫 d 野先啦。

泵奶
話說上次上黎話泵少左奶之後，其實一直都冇乜點多返，返工日子好境o既時候會有4-5安，少起上黎真係3安都會，泵倒4安時我都會同自己講「4安好好呀，好過得3安丫」，以前有條件 weekend 時話「之前 d 奶唔要喇，weekend 儲過 d 新o既俾星期一食啦，但琴日我媽問我「咁d舊奶係咪唔要喇?」，我答佢「擺住先啦，睇埋星期六日有幾多先決定」 >_< hahaha

拍手
前幾日小小練成左拍手，話說星期一晚抱住佢返屋企時，去到樓下 lift 口佢突然拍左一下，我即刻同老公講「佢拍手呀!」，但只係拍左一次，同埋唔知佢係撞彩定真係自己識拍手，第二晚放工去婆婆度接佢時，婆婆話佢係咁拍手同玩到笑到卡卡聲，呢晚返到屋企臨訓放佢o係大床時，佢係咁拍係咁拍，我當然要陪玩佢拍我又拍啦，拍到我話「唔拍喇，你要訓喇」，眼訓 (我)

到小小學識左拍手之後，就到教嫲嫲同佢玩拍手喇 (係...  cannot believe 要教嫲嫲同佢玩拍手.... 我呢個99淨係識一日到黑抱住佢....買左張地墊返屋企又唔肯開黎放小小落地俾佢自己坐，總之就係抱住...)

六安童 / 食野
小小已經突破左六安童，朝早十點餐奶已經食緊六安半


--- 9月14日寫左上面個頭，估唔倒要等到今日9月19日先有時間再寫落去，而有時間o既原因，竟然係今日中秋放早但走唔倒........ ----- 絶望


自己企起身

上次仲係講緊小小練成左拍手，轉眼間，小小已經練成左自己企起身。話說佢好細個我已經會o係佢腳 yaang yaang o既時候叉住佢"加拿低"俾佢企 (而家諗返轉頭係咪我當日有 d 拔苗助長呢？) 上個星期日返婆婆度食飯時，我哥o係床邊睇住佢一下發力就扶住床欄企左起身。經過幾日o既練習之後，琴日佢直情豪不猶豫咁企起身，仲行倒小步添

游水
之前想過端午節去游龍川水，但當時小小只得五個月大，好似好搏，所以最終冇去到。夏天就完，我同老公希望點都去倒一次游水，結果上兩個禮拜終於去左觀塘游池。結論係，雖然落水之後可以話係乜都冇做過，只係抱住佢行左幾步，二十分鐘就上返水，但仍然攰到扒o係度.....自己都要訓個晏覺叉叉電。同BB去浸水其實都幾好玩，初初浸落去時佢唔知做乜，我話可能因為平時沖涼有底，泳池冇底，但浸左一陣，佢開始識 yaang 腳時，都幾有趣。快d大個女啦，媽媽教你游水 !

爬 & 自己坐起身
雖然小小而家已經可以o係扶住床邊o既時候豪不猶豫咁企起身，但佢係唔識自己坐起身的，每次佢訓o係度用腳係咁劈落床時即係表示佢要坐起身，我就會扶起佢個身。究竟點幫佢學坐起身呢?

至於爬方面，雖然佢經常反身同可以用手支撐身體，但好似冇乜爬o既意欲，佢會零願係咁反係咁反黎 reach 倒前面o既玩具。