week 29 - 正式踏入懷孕後期的擔心

望左咁多個月，終於望倒滿七個月，正式進入懷孕後期，新o既擔心情緒立即出現 :---

個肚大左好多 好多，擔心好快會出現肚紋

bb 已經發展好，應該只差儲多 d 肉同多 d 脂肪去迎接冬天 -- 但你仍然唔知佢會唔會突然間因乜野不可知o既原因唔想出黎，突然開始唔郁 ...我試過有個諗法浮出黎係 : 如果 bb 真係唔想出黎 (touch wood)，政府醫院會唔會俾我開刀 ? 定係一定要試順產 ?

bb 野乜都未準備，驚買唔切

但又驚太早買定，會唔會 (touch wood) 用唔著 ?


星期日已經買左 bb 床喇  29 號就會送黎屋企

week 29 - 攰 + 腫

上個禮拜三返健康院覆診時，仲講緊話乜事都冇，又冇腳腫。之後o個幾日沖涼時發現「呀點解呢兩日小腿好似粗左」，之後就發現原來開始腳腫添 !!!! 由o個時開始，我成日將對腳擰來擰去研究，死唔信邪竟然腳腫，係咁o係度回想我隻腳眼係咪不嬲都係呢個樣定係真係腫左呢?

之前返工一路都好忙，成日要走來走去。呢個禮拜返工覺得好攰，個肚 over the weekend 又大左好多，所以行動就緩慢左。返到星期二已經好想呢個禮拜快 d 完 (今日先星期四 ja .....)，次次起身都要 gum 住張先起倒咁濟.... 希望唔好真係腫到好似上網見倒 d 人咁啦.....

Drug? 唔 Drug?

大左肚，梗係盡量都唔食藥啦，但其實身邊有好多野都係 drug 來的，其實大左肚之後又避得幾多呢 ?

自從有左以黎，試過一次感冒一次傷風，其他病痛 touch wood 托賴。感冒o個次唔記得係咩感覺，可能都係頭痛呀攰呀o個 d 啦，咁就臨放工去睇醫生攞 d 意見啦，點知醫生即刻開左兩日假俾我，佢話首先黎講係自己休息先啦，咁 panadol 呀o個 d 都開左俾我先，但可以唔食就盡量唔好食，「而家開俾你 d 藥都係安全o既，不過可以唔食就盡量唔好食啦，最緊要休息多 d ，咁我寫兩日假俾你啦」，於是o個次我就o係屋企訓左兩日，好返晒 (其實就算唔係有左唔好食藥，平時感冒如果你肯o係屋企訓兩日確實係會好的)

傷風，係只係前一排 (可能一個至個半用前)，星期日晚已經狂打 hachi，星期一起身發覺自己應該真係傷風喇，諗住返去做左趕急o既野之後就去睇醫生攞 sick leave 啦，點知一做又唔停，拖左兩日竟然好返 (平時我傷風係唔睇醫生唔會斷尾的)

又前一排，眼痕，醫生開眼藥水時都話「呢隻只係人工淚水，都安全o既，你滴o個時可以練住個鼻樑，等佢唔好流落去，咁就更加冇影響喇」，自從有左之後，我都幾鍾意呢個醫生，因為佢會話俾你聽「呢個都係安全o既，但可以o既都盡量唔好食」，我覺得最緊要係佢都主張唔好食藥，所以佢講得安全o既野顯得更加信得過。反而樓下個醫生呢，我去睇胃痛o個次佢會照開藥，好似咩事都冇咁，我都懷疑左好耐佢有冇聽倒我話我大左肚 ..... 當然o個 d 藥我都冇食，只係想攞張假紙 only 

再近 d 黎到上個禮拜，因為隻腳有 d 痕，又去睇下醫生啦 (反正公司包，唔使錢)，醫生都話「唔嚴重就唔好理佢住啦，始終都係藥」，咁我又好開心咁「好 arc」應左佢，佢又好開心咁o係我份病歷上寫  "no drug"。呢個醫生每次都會問我第幾週，今次問完後佢仲補左一句「咦趕得切係龍 b 喎」好似好開心咁 (大家都戴住口罩，所以 cannot tell 係咪真係開心啦 hahahaa)。其實就算搽藥都係好似蚊咬咁o既範圍，佢話唔搽住就唔搽住囉 

以往用開 cheap cheap watson's 自家品牌洗面同搽面，用 johnson baby lotion 搽身都只不過係貪佢平 (廿幾蚊一大支可以用好耐) ，有左之後，我買左支 simple o既 facial lotion 同試新o既 neutrogena 西柚洗面啫喱，只不過係感覺上好 d。又，前一排涼 d o既時候有想過停止汗劑，但汗味呢樣野真係自己唔會知，停左兩日之後都係擔心最終都係再用返。有左之後，冇醫生話我有需要食補充品 (例如維他命呀、鐵呀o個 d)，但我平時明明有輕微貧血喎，於是我又自己飲康鈣 C (佢包裝上話 "Replenish Calcium and Vitamin C during pregnancy" 咁我諗係 ok o既)，其實呢 d 全部都係 drugs

琴日睇左一個 blog，個孕媽媽滴左一 d 話唔建議懷孕婦初期用o既眼藥水，佢睇o既幾個醫生o既意見差好遠，首先當然係佢自己好擔心啦，咁就問個醫院婦產科醫生係咪己經影響倒個 bb (其時只係o岩o岩發現有左) ，醫院婦產科醫生雖然已經搵晒書話俾佢地知其實係好 low risk，但因為佢地又堅持又喊晒o既關係，就話可以寫紙 refer 佢人工流產；refer 呢個醫生同佢講，滴眼藥水要好轉折先去得倒個 bb 度，而且只係幾日，俾你日日狂滴都只係好少量，話如果佢地堅持都可以但叫佢考慮多兩日啦；佢再睇另一個由屋企人介紹o既婦產科，呢個醫生又話「冇事，我平時都開呢隻藥俾我其他客」，黎到呢度佢地先安心，決定繼續要個 bb。bb 而家已經一歲喇，睇黎係一個健康o既 bb。

btw, 呢個好擔心o既媽係話連康鈣 C 都唔應該食，話佢都算係藥。

懷孕媽媽要驚o既話真係好多野要驚，但我覺得其實真係驚唔倒咁多。知道o既咪避免下囉，唔知o既，咪菚嚇親自己。我都有食月餅，最初仲食左一個咸蛋 mix 左o係奶黃入面，之後我睇清楚個成份，omg 有咸蛋黃，有個 friend 問我「乜唔食得咸黃咩?」我話「咁如果鵝鴨都唔食，佢 d 蛋我諗都唔好食啦」，但我依然都有食少少月餅，挑左個黃先食囉，總唔能夠屋企咁多月餅一個都唔幫手食。止汗劑，都要搽架啦.... 雖然日日搽..... 蚊香機.... o岩o岩有左時o既天氣日日都要開... 都擔心架.... 開門開窗囉.... 係到後來夠熱開冷氣先唔使開蚊香機.... 。我覺得，有 d 野，做左就係做左，唔好太擔心，太擔心反而增加自己負擔。

28 week - 健康院檢查 2

琴日第二次去健康院檢查。本來寫低左兩條問題想問，但因為唔肯定自己呢日o既流程係點，最終.... 冇問到....

第二次去健康院，其實都好熟路。之前次次都係留一起身o既第一次小便，到睇番健康院派o個疊小冊子先知應該係留第二次 (但都要係食早餐之前)，於是今次好乖咁先飲一大杯水，去左一轉，再飲多杯水，但其實邊有咁快有第二次丫，平時起身飲o個杯水都要返到公司先急啦，所以夾硬o係出門口食早餐前去多次o既結果係 --- 唔要一開始o個幾滴之後係少到驚唔夠浸張試紙囉，hahahahah 

話時話，大左肚咁耐以黎都冇便秘o既煩惱，反而有時 (近排比較多) 一日有兩次。我最近成日都同老公講，唔知係咪人地就壓住條腸出唔倒，我就只係唔夠位儲太多，我都真係覺得自己好幸福 (唔知會唔會到出左世之後有其他野要我受....  ...)

我係想講... 食埋早餐，搭車去健康院都有一段路，o係路上我o個兩杯水漸漸落到膀胱喇，所以一去到即該登記左先然後隨即就要先去厠所 (都仲要等幾個人，因為個個都去倒小便)，放左小仲放埋大，結果係磅重時呢個月只係重左 1.7kg，唔夠一磅一個禮拜o既指標。磅完重出黎我問老公︰唔知一督屎有幾重呢？如果我唔係今朝臨磅重時清左，可能磅重時會夠 2kg, hahahahahahahahahahah

磅完重當然又係等啦。今次感覺上好似等左好耐咁，老公話周圍 d 人都走晒喇點解都未到我，冇法啦，環顧四周個個肚都籮咁大，一定優先過我好多啦，我都係樂於再睇o個個講懷孕注意事項o既 vidoe je。終於姑娘叫我入房喇，由於我又冇腳腫，又冇唔舒服，姑娘都想即刻 pang 我走啦。最後一句對白我好似聽倒佢話要見醫生的，我心諗︰咁筍?! 之後再叫名就去左聽心跳。今次我知道佢將要做乜，就好有閒情逸緻研究呢個姑娘個名牌啦，原來佢係助產士，仲有返咁上下年紀，經驗係唔呃得人的，上次個姑娘游左好耐都搵唔倒 bb o既心跳，仲係咁將枝採管 yui 落我個肚臍度務求縮短探頭同 bb 之間o既距離，今次呢個助產士先模一模肚，再用軟尺度一度話 bb size ok，跟住一拎起探頭第一下就中心跳聲，就係咁就 finish 喇。佢又叫我出返去等喎... 咁我諗.... 真係有得見醫生咁筍?????

又等等等，等左好耐，終於又叫我喇﹗但係點解係去餵奶房呢？原來因為今次我要求要「病假紙」而唔係「到診紙」，等咁耐就係為左佢..... 最初諗住既然老細俾人 challenge 就拎張「病假紙」返去等佢好 d 交代啦，點知原來搞咁耐，初先就要返到診紙就算 (因為姑娘即刻簽到診紙，但病假紙就一定要等醫生簽) ...

就係因為咁等法，到走o既時候已經過左 11 點喇 .... 上次睇完仲訓左一陣先返工，今次返屋企睇左一陣電視就要出門口返工 lu。本來 28 週開始係每2-4週覆診，我可能太冇野啦... 所以都係約返 4 星期後先返黎覆診 ,,,  ... 放少一次上午病假添 ...

27 week - 小小大力左好多

由上個 weekend 開始，小小突然間郁得大力左好多，好多時都明顯知道係佢郁緊，唔使再自己估估下。有時夜晚坐o係梳化或訓o係床時，我會定晒咁望住個肚好耐，等緊佢郁  因為o個種郁到見倒o既動作o係目的為止都係稍迅即逝，有時就算老公o係隔離都叫唔切佢睇。

呢兩日放假係屋企，係成日都好似攪肚痛咁郁下郁下，o個種感覺真係好得意 


><><><><><><><><><><><><><><><><><><

呢一個禮拜突然開始腳板底會痛，前日開始又突然間開始髖關節會痛、腰會痛。我開始好驚... 驚之後呢三個月唔知會點.... 唔知仲會發生 d 咩事.... 屋企冇樣野 ready.... 只有一張人地送而因為佢想快 d 送出去而好早就黎左我屋企o既 bb 床.... 山羊座o既我開始擔心....

富媽媽的產檢

富媽媽睇o既係私家醫院o既駐院醫生，都係有人介紹o既，順理成章就會o係番o個間私家醫院生啦。

weekend 我地成班姊妹終於又約倒見面 (幾個月先約倒一次) ，一出現就話我個肚比富媽媽細，咁我又唯有解釋下啦︰「係呀，尾呢三個月先會大得最快，差兩個禮拜已經可以差好多架喇」。

跟住講講下又講到我地o既 「醫生失蹤了」事件，少不免要由結構性超聲波講起，黎解釋返我當時係幾咁愁。點知富媽媽竟然唔知咩係照結構性超聲波，佢話「我醫生有照俾我睇話個心有 4 格咁囉」，跟住佢話佢每一次都照咁樣o既超聲波。富媽媽話佢平時上網做 research，究竟佢 research o既係邊方面o既資料呢？真係好耐人尋味......

早 D 出世好? 定係遲 D 出世好?

琴晚半夜起身去完厠所之後，小小郁到我直情呻吟左出聲，係書本形容o既o個種向背脊骨猛力一擊，之後佢仲不停咁典來典去，小小爸爸要呵住個肚，同小小講「阿女，你唔好踢得咁緊要啦，你阿媽唔使訓喇」，其實我唔介意佢郁得緊要的，反而幾得意。

反而前一兩個禮拜時，有幾日我連臨訓時都唔太覺得佢有郁，o個幾日反而仲擔心，又諗起其實好多人可以去到三十幾四十週時 BB 先突然冇左心跳，我又諗返起有人講過，懷孕係最關你事但又最唔受你控制o既事，所有事都o係你身體入面發生，但一切又係令人咁束手無策，如果有事o既時候，要發生就係要發生。

諗太多喇，唔記得左正題  

近日秘書開始同人事部討論我放產假o既問題。明明我初頭同人事部講話我有左o既時候，個 HR officer 仲問我係咪前 1 後 9，又話我可以自己同 dept head 傾，到而家秘書同人事部大秘書討論時，又變左一係前 4 後 6，一係前 2 後 8，仲要唔係你通知佢你邊日開始放，「係我計左話俾你知你要幾時開始放」。嘩，點解又突然變 mean ???

本來我一直都好想盡量遲開始放產假，因為我好想 BB 出左世之後我可以同佢一齊耐 D 先返工，其中一個原因係我想餵人奶，但公司冇一個正常o既雪櫃，我冇辦法o係公司雪人奶返去餵，亦即係話返工 = 要停人奶。再加上諗唔倒返工之後o係邊度泵奶..... 想返工之後餵人奶係 10 個難..... 我都用左一段時間去勸自己接受其實前 2 都係好事，因為反正我 dept d 同事都唔係好理我大肚，所以早 dd 放假可能都係好事。

但而家人事部一認真講產假問題就黎喇，佢一定要我交醫生信話我預產期係幾時，如果我真係交用 last m day o個封信，即係話我直情要放前 3。於是我一直都採取拖字訣，一方面諗緊用o係新醫生度照超聲波o個 report 當係 (所謂新醫生，因為我初初有左時睇o個個醫生走左佬，先會睇呢個「新醫生」) ，另一方面諗緊會唔會可以請新醫生用照超聲波o個個重新計o既日子再出一封信俾我...... 其實一開始睇新醫生時，新醫生已經講過「預產期就唔係我而家講架喇，但 8-12 週時已經算左架喇」，係咪代表佢會拒絕我呢... 

又講遠左....

因為呢個問題，我諗左好耐.... 有時會好想小小遲 D 先出世，咁佢可以住耐 D，希望肚入面o既環境係對佢好 D；有時又諗佢可能會早出世，因為我雖然係「寫字樓工」，但我個 post o既間題我成日要做 d 郁來郁去o既工作，例如訂紙啦... 總之唔會坐定，聽講勞動o既媽媽因為經常用腹肌，BB 會早，我都算係成日用腹肌.... 咁我又會諗，如果小小突然搶閘，咁我咪可以放夢寐以求前少後多o既產假囉   日日諗呢 d，乜都諗一大餐，真係諗到人都癲.....