按需要餵哺

http://ardenwong.com/blog/?p=3379

今日睇倒呢篇文章，有好大感想。當初餵人奶真係好辛苦，係情緒低落o既一個主要原因，再加上我頑強固執o既性格，而家望返轉頭先發現自己對於餵人奶可以話係有絶對o既執著。我好相信人奶係唔會唔夠食，但身邊總會有人話你出得唔好(「點解唔係噴射式、唔係餓 bb 點會係咁喊」等等)，如果當日有人話俾我知其實bb只係食好少，bb喊係可以冇原因，bb不停食係好正常等等，當日就唔使日日o係度苦惱究竟 bb 搞乜。

由當初諗住餵到返工，到預左返工之後隨時會唔夠食要食奶粉，到滿三個月都仲夠食 (但奶量跌到日日要計住係咪夠食)，到而家20週喇，bb仲係全人奶，我真係好感恩亦好欣賞自己做到今日。

日日返工都好眼訓，返工冇停手 lunch time 冇得抖係咁泵奶，放工仆倒咁收工都要8點先返到屋企，好多時我都會期待唔使再泵奶o既一日，咁我就可以 lunch time 他他調調休息下，但我諗如果可以o既話，可能我寧願朝早唔再叫醒小小食第一餐，但都係起身泵奶俾佢第一餐食，lunch time 繼續泵o既話，就又可以有一枝奶俾佢日間食，到時小小已經食固體，唔使再有「只係食奶，完全食奶」o既壓力，其實仲可以輕輕鬆鬆泵奶啦，一諗到呢度，我又有繼續泵落去o既 couragement，然後 keep 住返工再埋身食一餐，似乎所有野其實都可以好美滿。

各位奶媽，加油﹗

 

• 餵人奶

週末床上

呀其實唔正式係週末，只係我放假啫

呢日小小訓中午o個次覺時，老公叫我不如都訓一陣，本來我都覺得唔係好使訓，但既然佢咁講，我就攤下啦。點知就o係我岩o岩訓著時小小咪醒囉，佢不嬲呢覺都訓得唔長，由於我o岩o岩訓著仲成身軟，我就咁拎左佢上我張床度，話「同媽媽一齊訓啦.....」就自己may返埋眼。

呢隻妹自己 un 下 un 下，就 un 成咁喇

佢仲趴o係度自己講野講左好耐，望下佢係冇表情的

老公成日話俾隻喪奔羊小小做朋友，我睇下張標籤，人地寫到明三歲以上先可以同佢玩架，而且而小小個個都錫 (ie乜都放入口)，d大陸野都係信唔過俾食，呢一朝見佢咁開心，諗住攞隻喪奔羊同佢合照，點知擺極都唔o岩pose，最後映倒呢張「一腳西走喪奔羊」

 

• 4m

19週 -- 返公司交人

我都係諗唔掂，究竟計幾多個月大時係用週數去計定係用日曆月去計呢? AHAHHAAH, ANYWAY, 總之我都係當小小而家係4個幾月囉

琴日帶左小小返爸爸媽媽o既公司亮相，先返去媽媽公司，office 有八成o既同事都翁左埋黎睇BB，最搞笑係其中幾個係咁索佢跟住好失望咁話點解冇BB味，我話「應該有爸爸陣汗味，因為係爸爸咩住黎」。諗返，又係喎，我都好耐冇索小小陣味，我諗係返左工之後就冇喇。產假後期心情好好時，我久唔久會好大力咁索佢個口，會有陣奶味，聞倒奶味我就話「唔，夠飽喇」咁，到返工後，小小o係婆婆度做「頭泥treatment」(btw, 我老公成日話佢頭泥陣味係最好o既驅蚊, 所以小小 touch wood 冇俾蚊咬)，我好多時返工會彷彿聞倒小小陣頭泥味 (而家都仲會，但少d，因為小小d頭泥可以話係冇晒咁濟喇)，好多人都會問「返工掛唔掛住個BB呀？」，我成日都會好決絶咁話「冇！」，其實我會暗暗地諗起佢陣味。 

去到爸爸公司，9成半都係英文人，佢地抱住BB時同佢講野真係好好聽，聽得出係同緊BB講野，有兩個(老細級)黎同我傾左幾句，汗... 我D英文真係好差... 淨係可以客套兩句跟住用笑黎 end the conversation.... 之後我就借左佢地個 meeting room 餵奶，之後就出左 lift 口暗小小訓覺 (因為佢有兩聲喊，唔好o係office嘈住人啦)，再返入去 meeting room，抱住小小自己都「閉目養神」左一陣。

o係地鐵上扮憂鬱的小小

 之前爛面已經差唔多好返晒喇，返到屋企樓下時仲俾條咩帶kick甩埋呢塊焦

 

• 4m

扮腰果的小小

自從好一排之前婆婆話小小可能兩日就識反身之後，小小已經有好一排冇再叫住咁R腰，呢晚(5月5日)佢又突然係咁 R
一時向後

一時向前


好搞笑

前幾日返健康院打針，只係度左頭圍同磅重，冇度高。5月9日，計日曆日係四個月零一個禮拜，計週數就係18週，重5.7KG，頭圍40，自己度高係64，除左身高係50線之外，重同頭圍都係25女。

 

• 4m, 
• 健康院

發癲的小小

琴日放工返到屋企見到小小塊面紅晒好大撻，婆婆問係咪濕疹，其實冇人知，我同小小講：「你一係就耐 d 唔好，咁下個星期去健康院就可以問姑娘啦」。其實我見個個 bb 都有皮膚問題，都冇得擔心太多。

婆婆話小小扭計，所以佢去唔倒炒菜，咁我返到去，諗住交俾舅父仔 (即係我細佬) 一陣，佢去炒菜，點知我只係去厠所洗個手 only，佢o係舅父仔手上已經喊左出黎，搞到我同我媽都即刻撲出黎 (我媽o係厨房，我o係厠所)，我叫住小小「咪住~ 黎緊啦」，搞到我唔記得要搵熱水沖下個泵先入房，就叫我細佬幫我插電諗住邊泵邊餵 (因為老公去左同舊同事食飯，返屋企冇人睇住小小俾我泵奶，所以o係婆婆度泵埋先走)，結果除晒衫先醒起「噢唔泵得」，只好淨係餵奶。

可以話係未見過小小咁 cher，我諗佳係又眼訓又肚餓。啜左一排之後佢訓著左，咁我諗住拿拿林出去淥下個泵再返入房泵奶，點知一放落床佢就好驚咁醒左，又即喊，於是就繼續食奶啦。卒之都係餵完佢，出去交俾婆婆抱住，先再返入房泵奶。

我想講係，婆婆已經話小小傍晚已經扭計，返到屋企俾 99 抱住，我去沖涼。小小又係o係 99 手上喊，於是我沖完涼就接返手，換左片再食一陣就訓左，我仲好開心咁諗住佢會一直訓到尾 (因為婆婆話佢冇訓傍晚o個轉)，但好正常地呢下佢都係訓左 15分鐘左右又醒左，仲有 d 想喊咁，於是我即刻抱起佢諗住再暗返佢訓覺，到 11點老公返到黎，佢就接返手俾我去訓。

點知我o係房一直聽倒小小係咁喊，停一陣又喊，到我感覺我醒下訓下佢已經喊左好耐，起身原來只係/已經 12點，於是又俾佢啜左一陣諗住肚餓又好、安撫下都好，佢算係定左落黎，咁我又訓返。點知訓返又聽到佢喊，又係喊唔停，而且聽倒老公開始 meng，我起身叫佢交俾我佢去抖下，小小當時真係喊到癲左咁，究竟係咩事呢? 老公怕佢係熱，已經開緊風扇。我抱上手，佢都仲係喊得好緊要，老公已經冇晒辦法，我突然間諗到睇過一本書話如果 bb 不停喊可能試下除晒 d 衫 check 下係咪衫入面有野整倒佢，如是我放佢落床除晒佢 d 衫，件底衫冇濕，但佢成個身濕晒，同埋見我同佢除衫佢停左一下冇喊，於是我除埋自己件衫抱住佢，諗住試下 skin to skin 又可唔可以安撫倒佢。唔知係真係關事，定係媽媽真係有安定作用，小小甚至有微笑左一陣。我繼續抱實佢，同佢講︰「傻妹黎架，咩事呀？嚇親爸爸呀，嚇親媽媽呀」，老公入黎同佢探熱得 35度，係咪太低呢？如果太低會係咩事呢？老公話想同佢去睇醫生，但我覺得我地都講唔出咩事醫生又點知呢？咁我覺得，既然佢全身出晒汗，不如沖個涼啦，就叫老公去開盆去同佢抹身。抺完身之後，佢又好似好返 d，於是我又俾佢食，因為我覺得就算 12點起計都過左個幾鐘，都會肚餓啦。

後來，佢食住訓著左，終於完成呢晚o既大作戰。

於是今朝我都冇叫佢起身食早餐。平時朝早泵枝奶都會雪住，今朝我同99講唔雪喇，留返黎幾時肚餓醒可以即刻餵。老公話小小今朝卒之八點幾醒，正正常常唔太大問題。

究竟琴晚咩事呢？佢又冇 R面，唔似係面唔舒服.... 嚇死我地....

 

• 3m, 
• 濕疹

反身

冇時間好似其他媽媽咁o係 blog 度紀錄小小o既 milestone，唔知點解到目前都好似仲未 recover from 生 BB 以黎o既攰咁，真係唔知 d 晚晚半夜起身泵奶o既媽媽s日子係點過.....。平時返工日子係先起身泵奶，星期六日就會遲少少起身，餵完先泵，好彩小小一真都好乖，食完早餐就算唔係即刻訓返都唔會嘈，咁我就可以安心返工 / 泵奶，但朝早呢次番訓漸漸開始訓得唔長，平日老公話佢 9 點幾就會醒 (6:30食第一餐，婆婆10點黎接)，星期六日好多時係8點幾就醒，好多時我只係泵完奶訓返落床o岩o岩訓返著。所以好多時我覺得我係咪對老公好殘忍，我星期六日會希望訓多少少，但老公依舊係要起身招呼個女。


趴轉

兩個幾月時我已經久唔久將小小趴轉o係床試下，我見 d 媽媽話要多練習嘛，當然係小小會個頭擰下擰下跟住 pok 左落床，我有時會由佢再 pok 多陣 (ahhahha 好變態)，之後諗住「算啦，唔練喇」，點知最近一次反佢已經自己o係度勁 young 勁開心喇

當然都仲未可以自己用手撐起啦，係我放佢對手o係心口佢先可以咁樣支撐倒自己咁穩陣的。 (呢張相仲見倒肥美o既小脾)



開心笑

最近小小自己醒 (instead of 俾我叫醒) o既次數多左，如果佢醒時見倒你o係床邊望住佢，佢就會好開心咁望住你笑，令到望住佢o既人都好開心 ^^。最近呢兩個禮拜 weekend 我湊返o既時候，佢都唔算係有扭計 or 冇端端喊，小小真係好乖 (係除左唔知點解好似唔係好使訓咁.....)


識驚 / 認人

上星期六去joe叔叔度，joe叔叔扮俾呢隻野咬

點知小小突然間喊，其時佢o岩o岩食完奶冇幾耐，唔會係肚餓，攬住佢同佢講「唔好驚，唔好驚」，安撫好佢之後，joe叔叔再攞呢隻野出黎，小小見倒又喊，我好呵返佢，o個刻突然間好有感覺，原來突然間小小變成左一個唔係乜都冇所謂o既BB，佢好似突然間有意識咁，係一個人，我覺得好高興、好得意、好心甜 

琴日星期六，返左婆婆度食晚飯。每個星期六我哥同嫂 (即係小小o既大舅父舅母) 都會返黎食飯，舅母好鍾意同小小玩，仲個個星期同佢映成長週記，date 晒咁 whatsapp 返俾我地，點知呢日小小過左手俾舅之後過左十零廿秒左右就喊，試左幾次都係咁，仲係先扁咀後喊....但係過返我、爸爸、婆婆手就即刻唔喊..... 唔通真係兩個星期冇見，小小BB兩個星期之後o既今日一開始認人就唔記得左兩個星期前o既人? 有少少擔心... 而且唔係6個月先開始怕陌生人o既咩?


時間真係過得好快，婆婆話小小成日 R 到 C 字咁，隨時準備好反身，雖然未轉倒，我地亦冇特登反佢，甚至有時佢 R 倒嗌晒o既時候，我地會掃下佢叫佢唔使夾硬黎，會唔會有一日當我放工返到婆婆度o既時候小小已經o係張床度好似o既遊樂場咁典來典去呢?

 

• 3m

窮媽

其實呢兩個禮拜 d 奶都係好唔穩定，不過已經接受左，再加上夜晚返到屋企泵o個轉都唔少，總之一日落黎泵出o既奶夠第二日食我就 ok。除左上星期三因為塞車返唔切屋企，於是婆婆餵左，谷左一個下午得出歷史性o既7oz 之後，返工 lunch time o個轉都係枕住4-5oz 之間，偶爾有6oz，但好似琴日咁得3安半我都冇特別沮喪，總之夠食就 ok，之前好唔開心係因為擔心會唔夠食。

計下計下，小小已經三個月三個禮拜喇，即係話我o既返工泵奶生活已經成功堅持左一半。而家返工泵奶唔算辛苦，反正以前就已經係快快食 lunch 快快返上樓做野，而家只不過係由 on居居 休息時間幫公司做野，到而家係做自己最有意義o既事 (乳品製造廠)

 

• 餵人奶