關於箍牙

小小你現在將近14月大了，已經有下門齒四隻和上門齒兩隻半。團年飯時，做牙醫護士、堂哥哥的女朋友說你的牙仔有些疏位，長得不錯，我估計原理可能是當越來越多牙仔長出來時，會推向前面的門牙？昨天替你刷牙時終於有機會檢視你上顎的左第二門齒，噢，長得有稍微一點點在第一門齒的後方啊。於是想起要跟你說箍牙的題目。

 

媽媽小時候那個年代有很多小朋友箍牙的，那個年代的理念是“箍牙要趁小朋友時做，那時牙骨(之類)還未定形，成年後才箍牙困難會比較大”。那時候，箍牙要先在每隻牙的牙面種一個托，然後用鐵絲線拉緊，每隔一段日子就得往牙醫處檢查和調整，過程要一年甚至更長。那時聽正在箍牙的同學說很多食物都吃不了，還有很多極不便的時候/情況。到媽媽成年後，牙齒矯型的技術已經發展至可以“隱形箍牙”，原理是替牙齒造一個“電腦立體素描”，然後合成一個理想的最終牙齒排列型態，程式計算出矯型過程中各階段的估計排列，再預造一系列的膠牙模，箍牙過程就是戴著這些牙模令牙齒被擠向預算的方向，最終達至理想中的排列型態（做乜我要寫到咁詳細?? ^D^）

 

講重點：媽媽打算把沒有逼切需要的事物都盡量留給你自己去作選擇，例如英文名字，所以箍牙絕對是可以留待你自己選擇的其中一件事。有可能長大後你自己覺得牙齒長得不太差，又或者你喜歡自己本來的模樣。

 

媽媽有一隻不太夠空間長出來的第二門齒，就好像你現在這一隻第二門齒一樣，稍稍擠在第一門齒的後面，現在回想，似乎就是你現在的情況了。媽媽因為這一隻不夠空間的牙曾經做過好多惡夢，除了夢到這隻牙掉落以外，還會夢到全部牙同時掉光! 解釋夢境的書說，夢到牙齒脫落是壓力的反映，媽媽倒不覺得在特別大壓力的日子才會夢到掉牙…

 

每個年代都有每個年代一套的價值觀，而且，當一件事情沒有必然對與錯的時候，就把選擇權留給你自己啦，然後當然就由你自己決定要否堅持，和學習接受結果/後果了。

就快可以自己行了

趁小小訓左晏覺打左好長，點知唔知點解一按“完成”反而冇左 -_-" 唯有諗下頭先係諗緊咩再寫多次啦……

好耐冇寫blog喇，真係好對唔住小小。之前大肚就記大肚嘅事，因為可能真係一生人就得一次㗎喇，小小出世後就寫低小小嘅事，佢嘅成長更加係錯過左就錯過左㗎喇! 點知我竟然為小小寫得咁少 -_-"

自從小小滿左一歲，係一個小朋友，唔再係小bb之後，見到佢嘅意識同自己嘅諗法越黎越強，絕對係同佢可以自己行有關。自從一歲返健康院知道小小其實係應該可以自己行之後，我地開始俾張膠櫈佢推住黎行，短短個幾月，小小已經發展到可以推住張櫈喪奔到冇影....

 

一歲生日o個幾日紅日 (元旦)，同小小去佐敦谷公園行草地時，見倒好多o岩o岩行得穩o既 BBs 時，仲問o個 D 爸爸媽媽要行幾耐先可以行到咁，個個都話「好快架喇」﹐估唔到件事發生o既時候回想真係好似眨下眼咁。





一歲的年初三

年初三，爸爸最熟的幾個舊同事來拜年。中午過左婆婆度食飯，婆婆見我大傷風仲幫我湊左個幾鐘俾我訓左個晏覺，四點離開婆婆度返屋企之前行經冇蓋嘅地方諗住曬下太陽，點知經過遊樂場附近時小小竟然識轉彎，諗住佢行一陣就會走啦，點佢來來回回都識得轉返入去個遊樂場軟墊地入面，冇辦法唯有抱起佢走:P 因為本身係見佢有D 眼訓諗住抱佢返屋企先訓覺架.

 

靚靚的小小手

 

返到屋企食住奶終於訓著左，D 同事仲諗住可以開始玩，但我話「佢好快就醒架喇」，果然準時半個鐘醒左。之後見佢無無聊聊，咁就切個橙俾佢食啦。平時食橙婆婆係成個切半，跟住再批皮成個俾佢食，我成個覺得可以試下搣開一 kai kai俾佢食，只要搣左D粗o既衣就得啦，但原來小小真係好為食的，搣開半 kai 咁俾佢之後，佢就成 kai 放入口，我叫佢慢慢食啦，佢竟然遞埋黎我個口度俾我食，o個下勁冧 ~~~ 以為佢食夠啦，就叫佢俾一舊爸爸食，爸爸聽我咁講就同時間「呀」咁，點知小小竟然123張手上所有橙都塞晒入自己個口度，hahahahhaah!!!

 

之後小小一直梅下梅下個口，平時佢食肉粒時都會咁，因為冇大牙所以要慢慢梅。但係以黎計就確實係梅得耐左少少呱，咁我就叫佢「食唔倒就俾返我啦」再俾隻手o係佢個口前面俾佢 lur 出黎，佢又唔 lur 喎，咁以為佢只係未食完啦，點知再過一陣佢竟然有作嘔o既動作，於是我就話「唔得喇，要拎返出黎喇」跟住俾手指入佢個口度了返d橙出黎，竟然俾我了出 4 舊橙囉hahahahah，爸爸即刻勁不滿，話小小零願自己食到嘔都唔俾爸爸食 hahahahahah

 

後話

有時婆婆會同我講︰今日揹住佢訓左兩個鐘/三個鐘呀。當然會鄧婆婆開心有多D時間做野，但另一方面我又會諗咁樣係咪好事呢？我唔係擔心佢夜晚唔訓，而係揹住訓唔知係好(訓耐D)定係唔好 (唔完全係怕所謂揹慣左)。訓多D我覺得係好事，但佢而家大個左，我覺得抱住好似搞到佢冇得轉身咁。

 

2014/1/1 @ 佐敦谷公園

小小聽日就一歲生日喇，之前都唔覺，但呢刻咁樣講時，忽然覺得有好大唔同。 bb，原來咁快就捱到你一歲喇。

今日同小小去左傳說中嘅佐敦谷公園。呢幾日開始積極鼓勵佢邁步走，短短幾日已經由最初唔係好知隻腳提起之後點向前，到今日好大步好大步咁好快就可以行到好遠（當然仍然要有人傍住，未能自己獨自企穩）。

雖然有d野可能比其他呢代嘅bb慢，但我地只需要睇小小自己鍾意嘅進度，同埋大家幾時 ready 啫。

小小的第一個聖誕節

爸爸話，如果小小舊年唔係怕凍唔肯出黎，呢個就唔係第一個聖誕節喇。舊年因為等緊小小出世，所以冇去到媽媽中學同學每年嘅聖誕聚會（而因為小小未滿月，亦冇出席農曆新年聚會）。今年小小梗係要出席下、見下世面啦。

今年轉移陣地去A媽媽屋企，A媽媽有兩個分別14個月同兩歲幾嘅寶貝仔，所以屋企有小朋友玩具，再加上另兩個同學嘅3歲女同4歲仔，非常熱鬧。4歲仔已經覺得自己同d BB 有代溝，所以唔肯一齊玩，而其餘3歲或以下bb就玩到癲左，小小都唔例外，佢又冇怕生保，俾幾個姨姨圍住都照玩照大笑，引到d未有bb嘅姨姨超開心。

而最神奇嘅係，小小中午十一點幾訓左大半個鐘下午就冇再訓，到六點有人出左去pick up野食時，我地就趁人少少靜d就餵小小食左粥先，我地放左佢落屋小主人張high chair度，平時唔使坐high chair監嘅小小坐左一陣食左幾啖就係咁擒出黎，坐人脾繼續食都係邊食邊叫，估計都應該要眼訓喇，於是快快食完就暗佢訓。爸爸使出佢暗訓絕技，大約十分鐘小小就訓。著左喇，仲成功放左落bb床！我地安安樂樂食左大半個鐘，之後小小先醒，食兩啖奶之後再同人玩左一陣交換埋聖誕禮物先走，非常完滿！

關於“育兒心得”

當爸爸un下un下唱歌暗緊小小訓時，4歲仔嘅媽媽有少少質疑嘅語氣問我點解仲要咁樣暗訓，我話因為呢個時候想佢快d訓著（咁我地就可以食野），希望只係我自己敏感啦，我成日覺得家家有本。難念的經，正如我都唔會質疑人地點解一d都唔考慮餵人奶。有好提議可以分享下，可能有有用資訊分享下，但你覺得唔好但我覺得呢刻 work 嘅，我亦有我理由去做。我湊我個女唔係最叻，但你個仔都唔係 perfect.

小小，爸爸媽媽嘅理念係喺你需要探索嘅呢個bb階段，安全地俾你搞你想研究嘅事物，喺你準備好嘅時候因應你自己嘅進度俾你適當嘅訓練，俾你舒服安全嘅環境，希望你有一個正面嘅潛意識。

以前我睇人地話4個月大就試米糊/生果，媽媽喺你4個月時都躍躍欲試，適時俾我睇倒另一篇文，佢嘅論點係“食固體係先要bb嘅腸胃已經準備好消化固體食物”，所以我地決定唔需要急於俾你食糊仔，反而係6個月時返健康量度倒你增重未係最理想，令爸爸媽媽有d擔心係咪你食得唔夠，於是開始朝早泵少量d希望你埋身食倒多d。雖然你唔係“長爬手”，但你機動性強，鍾意企，鍾意扶住左騰右騰，手指仔好靈活，唔揀食，甚至鍾意食菜，我同爸爸由初初嚇親到後來不停話你係 parent friendly 唔太重。（對媽媽黎講，重要嘅亦係喺你由3個月喺生長線25%跌到6個月10%時，健康院姑娘聽倒你係全人奶時，雖然冇話冇問題但都冇話有問題）

小小bb，下星期就又返健康院喇，爸爸媽媽好緊張呀 ^^

bb的早餐

小小 bb的食奶/食野時間

未食粥仔前：
7點前：埋身食奶，通常係自己醒
10點左右：婆婆湊返去食奶
1點左右：沖涼食奶
5點左右：食奶或糊仔
8點後（甚至更夜）：放工返屋企埋身。一收唔倒工就好大壓力，好多時返到婆婆抱住訓左，婆婆會話“佢又肚餓又眼訓架，冇得食唯有訓啦”
10點：食完訓覺

食兩餐粥後：
7點返工前埋身不變，但最近可能凍同半夜成日醒關係，經常唔願起身
10點：婆婆湊返去食奶不變
12-2點(視乎有冇便便有冇訓)：食粥同沖涼
4-6點：訓醒4安奶，婆婆稱之為下午茶
6-7(視乎幾點訓醒食下午茶)：粥
7-8：同婆婆食飯會有得食蕃薯或菜，蕃薯目前係小小嘅至愛
8-9：我收工返到屋企就有得埋身食奶
10點：無論我係咪晏返都冇得傾，食奶跟住刷牙
10點後：近來無奈要成住訓

第時小小睇返應該會覺得我好無聊，做乜食野時間都值得寫 :P

其實我係想講小小食蕉。

以往一直都係早上十點婆婆餵奶，我一直都同爸爸講小小差唔多時候要有固體早餐食。近來爸爸冇咁忙，好多時都可以早起身準備早餐，咁我泵奶壓力又少d（因為如果冇喺屋企食早餐，婆婆通常都係俾奶，而家朝早冇泵，lunchtime又泵得少，所以唔夠食）。

星期六日我喺屋企，大家（包括我自己）都會忘記左早餐呢回事。琴日星期日，我同爸爸食完晒茶餐廳返屋企後，大家都好安樂等中午過婆婆度沖涼食粥時，我突然諗起唔對路，小小冇食過野喎（-_-白痴……），於是拎左條牛奶蕉喺佢面前揚揚下。小朋友即刻勁興奮，係咁揮手表示要。小小滿十一個月大之後，不停見倒佢越黎越有自己嘅意識，同控制自己、知道自己做緊咩，想表達自己想點等等。平時問人攞玩具、要撲埋食物度同攞野食呢d故然係做緊，自從佢要求食住訓之後，近個幾禮拜好明顯見倒佢喺玩完一輪之後係冤我俾佢食。前排都仲只係我自己估估下，佢都未必真係訓，但呢兩日佢食兩啖就訓著左，雖然夜晚都有醒，但總體係訓多左少少。

又遠左，講返條蕉

我揚住條蕉仔，第一次引倒佢爬倒咁遠過黎我度拎條蕉（真係完全唔使諗帶呢個妹去爬行大賽…）。佢拎倒隻蕉之後，細細口試左一啖，冇問題，先至大啖大啖食仲食得好開心，成條蕉唔使一陣就食晒。我覺得佢好勁呀 XP

由於掛住睇，冇拍低呢個歷史性嘅一刻，post 10m 時舅母映嘅呢幅當係啦。呢幅相入面嘅係香蕉，原本只係諗住打橫俾佢咬兩啖，點知佢好快手咁一下啪斷左自己攬住黎食。呢個妹初生時成日驚佢唔cher奶食唔夠，但而家佢乜都肯食，我同爸爸都好開心/放心 :)

寒冷的冬至

今朝真係超級凍，呢幾晚都開暖爐訓，但今朝係覺得開左暖爐都唔暖。舊年冬天小小出世前後又係好凍，佢出世後房入面個暖爐長開，夜晚仲開 hi heat，而家我地只係開 low heat jet。

呢個星期初氣温跌到得返12度，仲落雨添。好彩咁啱上個禮拜已經決定唔泵朝早嗰次奶，如果唔係真係唔能夠想像咁凍打出個胸泵奶x_x

幾幾朝小小都係俾我捉佢食朝早餐奶（已經冇泵啦，你再一滴都唔食的話，唔能夠想像會係咩情況，雖然唔會谷到爆，但會勁唔舒服同冇奶都唔好啦）。今朝食完又嘟住個咀啦^u^

婆婆嗰邊冇開暖爐，琴晚返屋開左暖爐除衫時，發現婆婆幫佢著左六件衫XD