風疹好了，但小小唔食又唔訓

上次講話喺小小兩三個禮拜大時我出嘅風疹，今日開始好喇，一開始時病發嘅手臂位置可以話已經好左9成9喇，後出嘅頸同腋下位都仲有少少痕，最後發嘅大脾都冇之前咁痕喇，感恩。

前兩日小小已經唔係好肯訓，但同時發現佢打卡介苗個針位似發炎，不過掂落去佢又冇反應，睇黎佢唔覺得痛。呢兩日佢唔係好食，尤其是今朝，佢醒左之後係咁喊但俾佢食佢又啜兩啖就停，最後係好辛苦暗倒佢訓覺，訓醒之後2點半嗰餐先正常返D。食緊奶嘅時候，我又裝下佢個卡介苗位，今日變左綠色膿，但掂落去佢又冇反應，諗住冇事啦。沖涼時我都有就住唔捉嗰個手臂位，點知！抺身時毛巾上面一pat嘢，再搵清楚原來個膿泡爆左!!! 我即刻勁驚大叫，問老公使唔使即刻落樓下俾醫生睇，點知老公竟然好醒咁即刻打去健康院，而健康院竟然又答佢，健康院話唔好特登 jit 清 D 膿，唔使特登包住，而咁啱我地聽日返去打針，叫我地聽日再俾醫生睇下。

之後嘅情形係，其實唔使特登 jit D 膿後來都自己流晒出黎，流左好多.... 唔知聽日醫生會做 d 咩呢？（又或者應該講，其實聽日醫生仲會唔會做野呢？）

0m, 

打針

上天所造，但人自有對策？

經過琴日「任訓」搞到一日只係食左5餐，同埋夜奶之後唔肯訓卒之暗左兩個鐘先訓，今日又試行新措施。

雖然琴晚夜奶喺3:15就餵，但因為佢5:15先肯訓搞到我今朝唔願起身，都拖倒去返平時8:30先食天光第一餐。本來諗住今日試下行三個半鐘，閃番多少少時間食多餐但又可以俾佢訓倒就訓，點知佢11:30即係三個鐘就醒左，好啦，你自己揀架，以後就行三個鐘cycle啦。

但今餐我有少少餵得膽顫心驚，事緣琴日定前日開始我局佢食晒兩邊，因為不嬲都知佢要中場休息，但以前我會俾返同一邊佢，因為我成日以為冇貨佢係會投訴，但因為琴日有谷奶感覺，所以我覺得應該係佢都要食多D （可能佢之前一路都食唔夠所以唔肯訓？所以琴日下下都訓到去四個鐘cycle?）。但8:30嗰餐佢只係食左一邊就唔食，所以我另一邊等到11點時已經勁谷，我本來想等佢醒時俾佢食，但諗諗下：唔係喎，咁佢真係食少左一次，會唔會身體以為唔需要，即時回奶架？於是我決定就算唔開泵唔留都手搾出黎。原來當好谷時，只係按下硬塊，都未搾，就已經有噴，雖然感覺未搾清都有 2oz, pleased ^^

點知，就喺牻暗爽緊嘅時候，小小竟然醒左?!?! 佢仲要一醒就喪喊，似係要食啦，但我啱啱搾晒喎！呢個時候唯有相信姑娘話人奶係長啜長有啦（咁又點存在窮媽媽呢，矛盾... ?_?）

~ ~ ~

講返正題

頭先食完奶小小都唔係好想訓，我抱左佢一排，又掃過風，sure 佢應該唔係有風所以訓唔倒，我就同佢講：咁你自己訓床啦，媽媽要食飯啦。放落床冇幾耐佢當然係開始叫兩聲想喊啦，咁都應該係心情訴求而唔係生理訴求，我呢刻就決定又試下由得佢喊。行去同佢講左兩次「冇喇，自己訓啦」同埋搖頭，喺佢靜左時又走去同佢講「係喇，自己訓啦」同埋點頭。今次佢竟然好合作，真係喊左十多分鐘就自己訓左，我嗰刻仲好高興，覺得「原來我小小都得」（後話；但佢訓左唔夠一個鐘就醒返）

但此時我不禁諗，如果上帝/神造此物時，既然設計左BB會因為要別人嘅關注而喊，點解我地會要用意志去叫自己唔好理一個喊緊嘅BB呢？

• 0m, 
• 餵人奶

應該訓覺定食奶呢？

小小真係... 每日都令人擔心同不知所措。

頭兩個禮拜唔夠重，要追餐，兩個鐘頭叫醒一次食奶。

追倒磅數之後，想建立時間表，日頭兩個半鐘一餐，但佢往往食奶起計兩個鐘先肯訓，所以次次訓得半個鐘。

前幾日，日頭死唔肯訓。有一日直情成日可以話係冇訓過，只有幾分鐘的小睡，最激心係嗰日佢可以連夜晚都唔係點訓。

琴日見完姑娘話佢訓倒就俾佢訓多d，唔超過四個鐘都可以唔使特登叫醒，結果今日食奶時間係：

琴晚2220
今日
0500（仲要係我摷醒佢嘅）
0930
1330
到而家1730都未醒

今日到目前為止先食得三餐，今日可能只會食倒六餐？仲要我唔多奶，唔係一餐俾緊6oz佢喎... 點好呢...

 

• 0m, 
• 餵人奶

聽日滿月了 -- 小回顧

BB 讓人不知所措

唔計初初返黎大家都唔知咩事o個段日子

• 食奶成日好唔專心，都唔知食夠未。成日食住訓著左 (所以唔知佢係咪已經食夠)，但食完又鬼打咁精神 (咁係咪即係未食夠?)。有時食完抱一大輪訓左，一想放佢落床 (有時甚至只係諗，都未 action) 就醒，仲要係醒晒o個隻，跟住就一直都唔肯訓 ---- 所以我成日問︰又話 BB 一日要訓廿個鐘o既? 我呢個一日都唔知有冇訓 8 個鐘....-_-" 老公 figure out 倒佢如果踢得好大力就應該係未食夠，有時會俾佢加時，但通常加時都係求其好唔認真咁食兩啖，又會影響左下一餐
• 唔訓呢段時間，真係唔知佢想要乜。扭抱咩? 佢好多時抱住都喊，扭眼訓咩? 佢真係鬼打都冇咁精神，換片咩? 換完片都係喪喊，唔見得佢會因為片濕喊.... 於是冇野做倒
• 半夜夜奶其實一直都好乖，我仲同佔井講話夜奶係我最有成功感嘅一餐，因為通常佢都好努力好專心咁食，食完又會訓返，一直訓到朝早嗰餐，嗰幾個鐘我都有覺好訓。點知呢兩日唔知咩事，雖然夜奶時佢都好落力食，但琴日朝佢落左床之後仲喊，於是加左時，今朝雖然唔係喊冇加時，但佢一路都唔訓冧所謂我都訓唔倒。到食埋11點嗰餐，老公話佢湊叫我再抖下，我一訓就訓到一點半，即係又到下一餐時間，我一起身見倒BB唔喺床度，我就知大件事喇，肯定係佢一嚘口冇訓一路嘈所以佢唔肯放返入房驚嘈住我。出廳見奶奶抱住訓左，即係又係搞足雨個鐘先肯訓... 所以我點有可能係「BB訓我又訓」呢

關於喊同扭抱

• 本來我係相信喊唔好即刻抱呢個理念，但問題係佢下下都可以喊到個面紅晒，又點能夠俾佢咁樣喊落去呢，而且放佢喺以床自己喊，試過可以喊足半個甚至一個鐘唔停，可以話係冇試過「喊到攰訓左」，冇符... 今日好心力交瘁，我放棄喇，抱就抱啦... 好在佢近呢個幾星期增重埋想，即係起碼食嗰方面冇問題，就算我冇多餘嘅奶，都總算係僅僅夠食。

冇事嘅BB好可愛

• 我唔怕同佢沖涼，雖然有八成時間佢都係喊，同時都要多謝老公日日肩負校水嘅工作。沖涼都算順利，今日甚至完全冇喊，連洗頭都冇喊（我係先沖涼後洗頭）
• 訓左覺嘅BB當然最可愛，呢個無需多解釋。而且要佢訓左我地先可以做到其他事，包括食飯同去厠所，更加唔好講自己訓覺。 如果清醒都唔係差嘅，冇喊就已經差好遠。
• 佢往往喺出街嘅時候最乖，喺健康院等緊或者搭車出入嘅時候佢都訓得好好，唔敢想像如果等緊同搭車時都癲左咁訓會係點...
• 佢一直半夜都好好，只係近兩日唔知發生咩事...食完又唔係好肯訓，訓又唔係好冧，搞到我最黃金嘅半夜時段都冇得訓

我自己

• 肚紋喺頭兩個星期係超痕，仲痕過大住肚嗰陣，呢點係之前冇預計過嘅。本來出左院喺屋企我係仲著緊網褲，方便 cool 住條m巾冇咁易移位，到後來痕到一個地步係懷疑會唔會條網褲 cool 住個肚所以咁痕呢，但情況喺轉返著大肚嗰時嘅棉質低腰底褲都冇大改善。
• 肚紋後來係喺不知不覺之間大約喺兩個幾三個禮左右開始冇再痕到癫，冇為意嘅原因係~~ 我出風疹!!! 最初只係肚皮上面有 D 紅同痕，同我之前 R 肚痕產生o既紅印好似，後來發展到背脊同兩邊手上臂都勁痕同紅疹，其時先發現原來肚紋已經冇痕，心諗︰好彩肚紋已經唔痕先出風疹，如果唔係真係再癲多二錢重。D 風疹痕到我會o係張上面典，好似瘋婦一樣。到有一晚我同老公都覺得唔可以再忍喇，不如去睇醫生啦，當時都未肯定係風疹。打電話俾媽咪叫佢上黎幫我睇住 BB 等老公同我去睇夜診，媽咪因為一路都唔想我未滿月出街 ( 而其實我已經落左好多轉喇 ) 所以拎左 D 菊花黎俾我煲水抺身。其實我都唔係太想丟低 BB 去遠地方，所以屈服左冇去到睇醫生。抺左兩日，用勁熱毛巾敷，真係好左好多。
• 會陰傷口最初出院時係正常地好痛，坐硬椅要夾起一邊 pat pat，坐軟椅先冇事，好彩屋企有張電腦椅，初初幾日真係全程只能坐電腦椅。一個星期左右開始漸漸剩返腫痛而唔係傷口痛，到兩個星期左右已經基本好晒喇，但我都仲有 keep 住沖洗，一來惡露未清，二來雖然會陰傷口好晒但近肛門傷口未好晒 (我有二級程度撕裂)。最近真係 feel 倒完全好返晒喇，先懶左冇沖洗 .... 又其實... 一路都淨係話要沖洗，冇人講過要沖到幾時....
• 餵人奶終於堅持倒知道 BB 夠食，近一兩日仲開始真係有谷奶感覺 (太慢喇... 果然連人奶方面都係窮媽媽)，但依然唔知 BB 點先叫食夠，幾時要食埋另一邊 .... 由於 BB 唔肯訓搞到我冇 free time o既關係，更加唔好講「餐與餐之間」pump 奶黎追奶，連食完想用手清完乳房o既機會都冇。再係咁... 恐怕返工真係冇奶俾佢食....
• 情緒經歷過好差o既時間，因為唔知 BB 要乜，因為不停餵奶好攰，唔知點算問人都冇用冇晒方向，因為同奶奶同一屋簷下不嬲都相處得唔好坐月令情況變成困獸鬥，等等等等，曾經o係抱住 BB 時想過放手等佢跌落地，曾經好想 fing 佢落床，成日都想唔要佢 ....  到三個禮拜大時情緒 / 情況都仲係好差，直到近一個禮拜先好，因為呢一個禮拜自己係覺得︰豁出去喇，時間表跟唔倒? 唔跟喇；佢喊到癲左? 照抱啦；唔訓? 唯有由得佢啦；再加上之前成日覺得老公好辛苦唔想太依賴佢，到我生風疹同驚唔夠奶，大家都覺得我休息好緊要，所以我有時o係老公工作唔太忙時我都真係攤得一陣得一陣咁訓 (當然前題都係 BB 都肯訓)

滿月喇，希望真係如大家所講一切會進入佳境啦

• 0m, 
• 肚紋

見餵奶姑娘

今日又去見餵奶姑娘。根據我多次見餵奶姑娘嘅經驗，佢地都係理論多於一切，
會同你講：「你自己要訓夠呀，食完奶交俾爸爸抱俾佢地親子下啦」轉頭又會話：「BB 鍾意媽媽抱，咁你又抱下佢囉囉」
問：「佢咬得咁細力其實係咪冇食緊呀？呢D時候點算呀？」答「咁總之佢啜緊都係刺激嚟嘅」
問：「佢個口開得唔夠大，我好似你咁 wear 佢下巴但唔成功，點整㗎？」，答「一 wear 就係㗎啦」（我即時 wear 俾佢睇都唔理）

總之每次見完餵奶姑娘都係冇新結論咁返屋企，而個衰妺又一出親街就勁合作，搞到我想俾姑娘睇完問問題嘅例子都冇，例如點解佢有時會食到 tart tart 聲呢？食完喘氣喘好耐有冇問題呢？等等。而次次大家講嘅餐數同餵食時距都唔同，唔通真係幾日就差咁多？

• 0m, 
• 健康院, 
• 餵人奶

抺口

平時幫小小抺口時，多數係佢食完奶又未肯訓，多數都好順利（係爭在我記唔記得要抺）。今朝8點半嗰餐，因為佢未醒定又嘔左一啖奶，所以我決定同佢抺口先，點知佢應該真係幾肚餓喇，今次竟然咬實我隻手指唔放，原來佢個咬合都真係好大力的，唔怪得之個乳頭可以俾佢咬到損晒。

小小係人奶埋身B，但點解近呢兩日勁多風，老公話發現佢有時係有風所以唔肯訓。而且佢時時食住訓，但一離口就勁精神，how come??!!!? 搞到我地真係一整日冇停過...

 

• 0m, 
• 餵人奶