開始著大肚褲

除左買左一條瑜伽長褲同一條 bossini 橡筋七分褲用黎 weekend 著之外, 一直返工都仲係著緊普通西褲. 近一個月開始覺得真係唔掂喇, 條褲o係坐低時真係會扯住, 最後兩個禮拜我直情係冇扣褲頭鈕, 淨係靠條拉鍊頂住. 於是weekend 怱怱忙忙買左兩條有 extend 褲頭的大肚返工褲. 唔著由自可, 一著左o個 d 大肚褲之後個肚即刻勁凸勁圓 wOw, 之前一路都仲可以話自己係似大肚腩, 而家真係好有自己係大肚婆的感覺. o岩o岩有左冇幾耐時, 見大肚衫褲鋪頭唔多, 成日希望可以唔使出街搵衫可以網購, 反正大肚衫褲冇乜得揀. 點知 search 左一大輪先發現連網購都好難搵.... 台灣有一個牌子 mamaway 做好多大肚產品, 都只係得揹帶o係香港有人轉賣, 反而佢最正o既褲竟然冇人轉售.... 香港就算去到媽媽世界你都只係可以揀橡筋索帶, mamaway o既超彈性褲頭聲稱生完都仲可以繼續著得返.... 可惜佢只限台灣島內郵購, 港澳地區當大陸, 而大陸官網又話只送中國內地同 paypal .... 永遠都係呢 d 時候就同我玩一國兩際.... ... 算啦, 時間好快就過, d 褲都係著一陣就唔使著啦 .

自己心多? 點解會感覺倒?

我好傻. 由結左婚開始每次都有記底老公「點燈」o既日子, 老公成日埋怨 : 「點解要記住我幾時交功課? 」我話: 「呢 d 唔係記黎追究你, 係記黎我自己睇返」. 細個 M 期好唔準, 所以養成左記低日子同流量o既習慣, 記慣左, 自自然然會知道幾時可以大安旨意唔使帶定 M 巾出街, 幾時開始要, 我覺得呢個 in control o既感覺幾好 結婚兩年, 我地一直未搞掂幾時生仔o既問題. 我成日歸咎於之前一直都冇二人世界所以未玩夠, 實情係大家都唔覺得自己搞得掂一個細路. 我地兩個都好想做個負責任感o既父母, 眼下o既環境 (社會, 教育, etc .....), 生左出黎之後真係唔知會唔會累街坊. 而我更加多一重顧慮 -- 其實結婚o既時候已經廿九歲, 再等多幾年, 真係唔知仲生唔生得出, 而且太遲生對小朋友身體都唔好. 卒之有一日, 唔知因為咩事, 突然心血來潮覺得 : 唔好理啦! 生左再算啦 ! 於是開始左不設防o既生活. 又, 除左我紀錄自己o既周期日子有功之外, 我身體又好合作 (定其實係好唔合作) 地話俾我知我幾時排卵, 就係我明知道好高 chance o既第二日, 我地如常咁同朋友出街, 行行下感覺倒下腹有一種充血感, o個種充血感唔陌生, 就係 M 時o個種充血感覺, 奇就奇在點解會o係月中發生? 於是我就好良好願望咁認為 「唔通真係即刻有左?!」 o個日一整日都好想同老公講我呢個奇怪o既感覺, 但好怕佢驚所以忍住冇講, 同自己講「可能你自己太心多o者, 咁都 feel 倒點解有咁多人生左o係個厠所度先知」, 最後懷住忐忑o既心情瞓覺. 第二日, 又係假期大家都唔使返工. 就o係我盡量唔好俾自己形住呢件事o既時候, o個種感覺又出現喇. 如是者連續幾日都有o個個感覺, 於是我開始不停 search 睇下上網有冇人提過咁初期o既受孕會唔會有咩徵狀, 咁當然唔會 search 倒咩結果啦.... 咁o岩我地又 book 晒野o係 2週o既時候去海南島, 於是我唯有同老公講喇, 我問佢「會唔會驚有左唔好飛?」, 佢話「唔驚, 要有就有, 要冇就冇」, 於是我好又安心咁冇再諗呢樣野, 專心返埋o個個禮拜工等去旅行喇 .