乳品製造廠差不多到期了

呢排覺得好攰，有捱o既感覺，尤其是而家日日返工泵o個次奶都唔夠食，每日都要諗住「仲爭幾多呢？聽日夠唔夠食呢？琴日雪櫃有幾多呢？」咁，頭先o係泵到好攰o既時候，突然間有種唔捨得o既感覺，我竟然唔捨得泵奶o既日子?! 我明明成日o係夜晚泵奶o個時同老公講「如果你可以幫我泵奶你話幾好呢」。

人地話人奶 BB 會有猛長期，o係 3wk / 6wk(個半月) / 3個月 / 6個月 時會突然間o係咁不停要食奶，以刺激媽媽製
造更多奶去配合BB生長O既更大需求，富媽媽都問過我「how about the grow spur?」，我都會諗，埋身食就話BB猛長期o既，全泵媽們又點呢?

雖然我唔係閒閒地泵出十安奶o既富媽媽，但目前情況睇黎，開埋冰奶都夠食多呢兩個禮拜足6個月全人奶的，只係當唔夠奶時，又要愁俾邊隻奶粉佢食，不過我應該同自己講「要愁都係老公去愁啦」，反正食奶粉都係早頭我唔o係度時o既事。。。

weekend 買左 samsung galaxy 新電話 (之前係用緊 nokia music express)，個相簿有 slide show 功能，我一路泵奶一路播相o既時候，見倒之前泵倒六七安奶o既相，真係一陣唏噓.... 此情不再矣..... 唯有同自己講，食倒6個月全人奶已經好叻架喇!!! 做人要向前看!

 

• 餵人奶

埋身 vs 餵樽 plus 乳頭混淆

臨生前上左個陪月班，一直都好想記低班上學過嘅野，但一直都唔記得寫。今朝等小小起身時（今日星期六）上baby kingdom，見到兩個post令我諗起要寫返呢個題目。

有一個 post 係講佢就快要返工，之前一直都係埋身，最近想俾 BB 開始學用樽食奶，但一用樽 BB 就唔肯食，最後都係要埋返身，佢好擔心唔知點算。有 jm 叫佢試下俾第二個餵，亦有人話返左工之後唔食樽就冇得食 BB 自然會肯食樽。

又有另一個媽媽反而係 BB 食過樽之後唔肯埋身，佢話健康院姑娘話「即係等於有叉俾你用，就唔會想用返筷子啦」。

陪月班o既導師係人奶湊大左三個女o既媽媽，由於我地第一堂遲到o既關係，所以我一路都唔知究竟呢個導師係「資深陪月員」丫，定係「專業護士」。有一堂佢o個三個女黎左接佢放學，三個都好 sweet 好癡身 (我有一刻好陰謀論咁諗，係咪特登叫三個女出黎增加說服力? 不過其實都唔需要啦，因為坐得o係o個度o既 couples 都已經交晒學費啦，hahahahahah)。

okok 又離題，講返 埋身vs食樽 同埋 乳頭混淆

導師話其實所謂乳頭混淆就係︰如果你打算埋身餵你就一直埋身餵，樽就留返俾其他人例如爸爸餵啦，總之一個人只用一種方法餵，BB自然就知道唔同人食法唔同，如果你又埋身餵又樽餵，BB就會搞唔清楚究竟要點食。

其實所謂乳頭混淆，好多時咪就係講緊俾BB咬損囉。BB咬損係因為太大力或者位置唔正確(咬得唔夠入)。奶咀就算係乜膠整都好，始終係膠，一定係硬過乳頭的，所以如果BB用左食奶咀o既方法埋身食，會咬損都真係不足為奇。

我臨返工前大約兩至三星期都有開始俾小小食奶樽俾佢適應同學習，好彩爸爸係 home office，當時因為婆婆仲返緊工，所以就要靠爸爸餵小小，我就會喱埋，有 D prefer 埋身o既 BB 會因為知道媽媽o係附近而唔肯食奶樽，富媽媽個 BB 就係呢種 BB。小小最初都食得唔係好多，婆婆當時都係話「驚咩丫，到冇得揀o既時候佢就自然會食架啦」。

每個BB o既性格都唔同，有 D 鍾意食樽因為食樽唔使用力，有 D 鍾意埋身因為埋身好味 D。有時會覺得自己唔識用奶樽好白痴，但老公就被逼一o黎就要餵初生食奶樽，所以會覺得老公好叻。其實我覺得咁都係一件好事，BB 真係會識跟有奶俾佢食o既人 (咁好正常je，算係求生技能)，有一排因為我少左奶想多 d 埋身，即係話老公少左餵奶，佢o個排話小小唔係好蘇佢；又話說以前未開始餵樽時，有一次小小喊肚餓時老公俾水佢 (當時應該係滿月前後，當時未完全明白母乳按需要餵哺o既真諦，所以照婆婆建議跟三小時 cycle，未夠鐘就餵水)，佢見倒奶樽一啖咬落去，但味道唔對路，根據老公形容係小小做左一個「你呃我」o既表情然後喊得更大聲，自o個次之後小小一直唔肯食老公俾佢o既奶樽，直至一次老公話「奶黎架，有味架」跟住夾硬質個奶咀入佢個口度，小小食左一啖，咦真係喎，跟住即刻猛啜猛啜。(以上係我老公o既描述 ^^)

有時間繼續...

 

• 陪月班, 
• 餵人奶

終於轉倒身了 !!

o岩o岩先話小小個身轉極都未轉倒，琴晚佢就好叻咁轉倒第一次喇!!! 話說我真係好攰好攰 (己經連續個幾禮拜夜晚醒左唔係好訓得返)，仲有 d 病，平時我餵完最後一次奶就會交小小俾爸爸我訓覺 (因為小小有時係可以好耐都唔願訓的) ，但琴晚老公仲有工作未做晒 (佢係 home office)，所以我就放左小小o係大床上我訓住咁望住佢，就係咁，佢終於成功咁轉倒第一次身喇! 但老公睇唔倒，因為佢唔夠力再轉第二次喇 

今朝六點小小就醒左，於是又食早奶先泵啦 (今日係端午節假期)，我泵緊奶時佢訓得好好，當時我已經諗「一陣泵完奶我有得訓時你係咪反而會醒架....」，點知真係中左，我訓返落床、差唔多訓得著時，佢就開始嗌喇，我 gut 起身望過佢一次，佢對眼仲係合埋o既，即係仲訓緊只係叫下，咁我就訓返落床啦，到佢再嗌時我己經郁唔倒喇，好彩其時老公已經聽倒小小嗌，就落床招呼小小，我就可以繼續訓喇。點知我原來真係太攰同病喇，訓到十點幾扎醒時老公已經餵左奶。

之後我地落左街直接食晏 (因為已經十一點半冇早餐食 lu)，食食下時小小有 d 扭計，扭扭下就訓著左喇，但又只係訓左大約半個鐘左右 (佢呢排都係咁，日頭訓半個鐘九個字就醒)，十二點幾再餵左一次奶，再帶佢過婆婆度沖涼。

因為老公同婆婆講唔知小小係咪疴，所以婆婆今日煲粥時煲到有粥水可以俾小小食，佢話我哥4/5個月大時疴唔食得奶都係食呢種杰粥水。最初諗住餵少少玩下，最後小小食下食下都食左我估有成 oz 咁多，仲係咪張開口話要咁，但好笑o既係食到差唔多時佢竟然擰個頭向我我胸「我要食奶」咁o既意思，好啦好啦，入房食奶啦，依然都係食到訓著，鬼咩，正路應該中午前訓返個零鐘，今朝都冇訓過。

小小訓左，我都攤o係梳化訓著左，點知小小準時半個鐘又叫喇，即係又醒左..... 婆婆hehehe咁去抱佢，咁我就安心繼續訓啦。期間聽倒婆婆叫「轉倒喇 ! 轉倒喇 !」叫我細佬睇

呢張係佢轉到一半o既樣

之前一直轉唔倒，一來係未夠力轉起個頭，二來係隻右手 kick 住 (因為俾直)，今日其中一個原因佢不停咁轉倒係因為佢食住隻手咁轉，hahahahahahaahah (食住隻手咪曲埋唔係俾直囉)

之後返番屋企，放佢o係床，佢都仲係咁轉係咁轉，好搞笑!!

 

• 5m

檢舉這篇文章

有關母乳餵哺的文章

http://www.inmediahk.net/node/321718

呢篇文寫於 2008 年，今日2013年睇返仍然覺得好 update，原因係香港o係母乳餵哺上可以話係冇進步過。

我好好彩，係未決定生 / 未有左時身邊已經有人係餵人奶，佢個女而家歲半，佢係我人奶路上好重要o既一個教練同輔導員，坐月時我經常打俾佢同 whatsapp 佢問題，佢都好有心機咁同我分享，我好大程度係以佢為偶像去堅持餵人奶呢條路。

好記得有一次我地要決定開始泵奶o既問題，當時點解要開始諗泵奶係因為姑娘見我情緒實在好差建議我要休息，所以如果放唔低餵奶粉就要泵奶，我打電話俾呢個朋友，我諗我當時係講唔出我問題係咩，只係好亂唔知點算，佢同我講，唔使因為補奶粉而覺得 guilty，餵倒人奶已經好好架喇。

產假後期個人正常返 d 之後，開始睇好多 baby-kingdom 人奶版，見倒個個都話披條巾就餵奶，我都覺得「冇問題丫」，但其實如果可以有間乾乾淨淨o既房可以俾 bb 唔使冚住食當然更好啦，但其實我從來唔奢望有咁o既地方，只係o係健康院同攞出世紙時試過，因為我地唔算帶小小出好耐街，又唔係去 d 高級商場 (高級商場如 ifc, element, pacific place 都有好好o既餵奶房。點知琴日o係 apm 竟然發現原來大換片區入面有間可以鎖o既餵奶房，仲寫明用前用後請通知管理處，我上一手應該係就咁走左，我去到時係吉房冇鎖，期間有人黎問有冇人，我用完後 call 管理處，聽電話同黎鎖門o既人都好 nice，唔覺得佢地有覺得我令佢地做多左野，一個冇 feature bb 野o既商場竟然有咁o既安排同咁o既態度，真係估唔到。

又離題

上文作者話，而家想餵母乳o既媽媽「最需要的幫助──由有經驗或受過訓練的人士﹝於最適當的時間──產後﹞在現場指導正確的餵哺姿勢和嬰兒吸吮技巧──卻欠奉」真係講得好o岩， pro 如健康院人奶姑娘都好明顯係紙上兵，又或好 pro 於將人地個 b o係人地身上放來放去話「拿，咁咪得囉」，而唔明白當個 b 係o係自己身上時根本又係另一回事。

到我從「亞產後抑鬱」中恢復、可以正常生活之後，我同我呢個朋友都好同意返工之後成功餵人奶重要o既唔係媽媽本身 (當然仲有屋企o既支持)，而係公司同事o既支持，如果公司同事有意見，令自己行開一陣都唔得 (我利用自己 lunch time 都要遲15分鐘先返埋位，坐我隔離位同事好樂意幫我頂我 d 電話，so far 仲未有怨言。上個禮拜開始有其他同事問我諗住餵到幾時，我每每好認真咁諗，然後話「到有一日我覺得唔得喇我真係唔想再泵喇，咁就停囉，目前都仲 ok」，其實自從小小滿五個月，我都開始諗緊呢個問題，我一路憧憬可以唔使泵只係早晚餵o既生活，原來係一歲先會發生架!!!! hahahahaha!!! anyway, 見步行步啦。

 

• 餵人奶

繼續堅持、從不勉強

繼續堅持、從不勉強

小小近月的濕疹，某程度上成為了我繼續長期餵人奶的動力。爛面已經好煩，唔能夠想像如果小小係真正o既濕疹濕到一身都係o既話我會點，可能會想長期擺佢o係婆婆度唔湊返黎。

自從佛誕週放假勁埋身餵，返工後奶量回升，我每日都好感恩，而且會讚兩個乳房「好叻」，目前為止奶量都仲 keep 住，夠食就得，奶量跌前係靠中午o係公司泵o個餐為主，一早一晚泵o個次都未必夠一餐，而家托賴早午晚三次泵奶都係以一餐為目標。

小小滿五個月，記得o係小小三個月時，因為已經返工泵奶泵左一個月，meet左三個月o既 target，當時有一刻係覺得︰「仲有三個月，我捱唔捱倒？」，其時答自己係︰「仲有十二個禮拜je，都過左四個禮拜啦」，過左o個個平台期之後，有時會發覺自己唔記得左 lunch time 唔係泵奶o既生活係點樣，開始有 d 已經適應左o既感覺。到小小五個月喇，會發現「咦?! 就黎泵夠六個月大喇喎」，但其實心態已經步入另一個階段 --- 覺得泵奶都唔係咁難 je，由以前望緊希望第時只係早晚埋身就 ok，咁就唔使泵奶，到而家o係度盤算緊就算六個月都會需要日頭有奶食，唔會咁快完全食晒糊仔，所以其實奶仍然係必須的。既然一直小小對奶o既需求都冇增加太多 (而家都仲係食緊 4安幾一餐)，繼續泵奶留俾佢日頭食應該唔難。

返入正題。今日泵奶似乎有 d 唔順利，左邊泵到 2oz 就完左，右邊泵順都係得接近 4oz。時間尚早，於是繼續照泵，有又好冇又好，泵泵下、鍊鍊下又有幾下出，就係咁泵泵下又有 4安幾，貪心的我又諗︰「如果可以夠 5oz夠一餐就好喇」，但心知已經空泵左好耐其實好難滴得出成安，於是心入面浮起一句「從不勉強」就熄左個泵，點知一拎上黎見倒原來足左 5oz，真係好開心！

之前老公成日叫我唔好太緊張有幾多，但我不能自控會擔心泵唔夠就唔夠食。我諗好大程度係因為小小已經5個月，會覺得「唔夠食咪開始食糊仔囉」，早食糊仔比要食奶粉個感覺爭好遠，另外，前排有冰奶到期要掉，老公同媽咪都覺得「有奶多都唔使冰啦，反正冰左都係用唔著，不如每餐俾多 d 佢食唔使就住就住」，由於咁講，老公再講「唔夠食開冰奶咪o岩囉」所以驚唔夠食o既壓力減輕左頗多。

其實餵人奶真係好攰好攰。上星期六奶奶又有事撻著我時，我直情失控咁o係廳係咁喊，我話我返工已經做唔停 lunch time 都要泵奶一放工又撲返屋企真係好攰好攰，當時本來我要泵奶 (因為老公餵左一餐)，但當我喊住泵時真係一滴都冇，老公見倒好震驚，第二晚即刻帶左我出街食晚飯 :P  佢話估唔到會係咁真係一滴都冇

對於餵人奶，一路以黎都只係不停堅持。最難o既部分已經過左喇，小小，為左你我會繼續堅持、繼續努力。

 

• 濕疹, 
• 餵人奶

滿5個月 -- 病病了

話說小小的爛面由 5月頭的時候開始，用左兩個禮拜時間差唔多好之際由再番發，最終婆婆過唔倒自己o個關要我地帶小小去睇醫生證實下係咩事，最緊要係希望知道係咪大問題，佢呢個諗法都o岩，佢仲特登返去我地細個住o個條屋邨睇下當時佢帶我睇o個個醫生仲有冇開診。

返到去診所，所有野都冇變過。公屋診所先可以有咁大間，同而家屋企樓下o個間比，我諗起碼係 6倍大。唔知關唔關事星期六朝早，只係得一個人睇醫生，所以我地一黎到就有得睇，我地睇完下一個又係即刻有得睇。醫生一望就話係濕疹奶癬，話係同一樣野，醫生再問小小而家食咩，我答人奶，醫生就話叫我唔好食魚、海鮮、蛋，係喎，而家諗返先醒起如果我地話食某一隻奶粉咁即係叫我地轉另一隻牌子啦。我都估唔倒原來食魚都唔好? 等我仲食多左魚添。醫生好直接就開左類固醇藥膏，同一枝抗敏感藥水。

(好多日之後先繼續寫, 今日已經係6月10日)
事後聽我媽 (即係婆婆) d 對白先拆解倒原來佢好唔想係濕疹，希望「只係」奶癬，佢話濕疹會跟一世 (咁又真係有大人濕疹o既~)，而奶癬到唔食奶就會退。我每日望住小小硬面，真係好想唔理佢，但婆婆日日都好有心機咁幫佢洗面，其實我好多謝我媽，唔係得佢肯辭工返屋企幫我湊仔，我呢件叉燒生左出黎之後都唔知點算。

最初我地星期五/六會攞個盆返屋企，weekend 就留o係屋企沖涼，近來因為發覺婆婆就算 weekend 見倒小小都會好開心，又會 offer 放低佢午睡叫我去行街，所以近來我都係星期六日都照返婆婆度沖涼同午睡。前兩日星期六日，唔知點解突然覺得我媽好似好攰，好似好冇活力咁，覺得好擔心佢，佢話近來小小開始變得痴身，有時成個下晝都暗唔倒佢訓，放低又喊，個女訓唔訓係佢自己選擇，我好擔心我媽.... 我同老公講，希望我媽只係平台期覺得攰....

寫到離晒題添....

 

• 5m, 
• 濕疹

檢舉這篇文章