家有殘障兒(誤)

自從小小揼親隻腳趾唔肯行開始，一直都係好似佢未識行嗰時咁，要全程抱住 / 揹住。爸爸錫住我，所以由第一日返工開始已經推架BB車出黎推小小去婆婆度，等我夜晚可以推住返屋企，而從來唔坐BB車o既小小，亦竟然坐得好開心。某一日，當我如常咁推到架車去屋企門口，然後抱起佢入屋放落梳化時，突然醒覺屋企有殘障兒o既人真係好辛苦，我抱左幾日已經咁攰，日日抱，仲要明知要抱一世，係幾大o既負擔 ?…

兩個禮拜後o既琴日，我地帶小小返醫院覆診，醫生話無論第一張o係急症室照o既 X光片定剛啱照張片佢都唔覺得有骨裂。雖然當日第一次去睇醫生時，化驗所同醫院義肢及矯形部醫生都話有，但我都唔需要質疑眼前呢個骨科醫生，因為重點係我只需要知道呢刻係有冇事。既然冇事，就可以返學啦，返屋企時正好係放學時間，返左幼稚園同老師溝通一下，老師都好理所當然地覺得我地聽日(琴日o既聽日，即係今日) 會返學。

返到公司，update 返小小舅母話我地覆左診，小小舅母叫我要夠狠心逼小小行。夜晚返到屋企，我又氹又逼咁先拉倒小小由佢個食飯位 (已經係厨房門口) 「行」去雪櫃 (一入厨房就係)，攞佢呢期好鍾意o既小丸子(益生菌膠囊) 黎食，我媽同我細佬見到我咁強硬都唔敢搭嗲，而小小出返廳已經喊晒口咁要求我餵佢食飯。

到食完飯走o既時候，本來諗住用佢最鍾意o既細舅父拖佢返屋企 (我細佬冇試過同佢一齊行咁遠) 黎引佢自己行返屋企，但估唔到一出左門口佢已經同舅父拜拜，我細佬都幫佢堅持到入[車立]叫真係拜拜。出左[車立]，我一邊拖住小小倒後行，一邊大聲鼓勵佢繼續行。其實佢好想我抱，但我話「你行到上斜啦，跟住我抱你啦，你知媽媽抱唔倒咁遠嘛」。我唔知點形容佢係點行，總之好似唔記得左邊隻腳、邊度要用力咁，唔能夠企直，我拍佢整親腳嗰邊pat pat，叫佢「pat pat  要用力架」，一路行、一路(不自覺)好大聲咁叫「啱喇! 用力啦! 企直啦! .....」，唔顧得阻唔阻/嘈唔嘈倒人。一直行到離開大厦範圍，去到我應承佢o既上斜位，我好大力攬住佢，隨即就喊左出黎，同佢講，你做得好好呀! 好叻呀! 咁辛苦先學識行路，唔好唔記得左點行呀! 嗰刻激動到不行，好驚佢真係唔記得左點行。

之後行到去商場時，我本來諗住自己喊到兩行眼淚就唔行入商場喇，點知小小話要行返商場條路，我話「咁我地搭完抺手電梯，你就自己落地行，行到去涼茶姨姨度我就抱返你啦」，估唔到上完電梯佢竟然主動要落地，要我扶住佢行，然後我地一路由扶手電梯口行到去涼茶舖，仲喺涼茶舖坐左陣先肯離開。

由於小小要入涼茶舖，於是我要逼自己快快收拾好心情同喊樣 (以免俾涼茶姨姨問)，冷靜落黎o既我，竟然喺抱住佢由商場行返屋企時話︰

「咁辛苦學識左行，唔好唔記得點樣行呀，慢慢黎、學識返就得，媽媽會一直拖住你，但到大個就冇人拖你架啦，你就要自己行。就算媽媽想拖你，你都要記住同我講「唔使」呀，爸爸就係因為俾佢o既媽媽 -- 即係嫲嫲 -- 一直都要拖住佢，所以爸爸而家先咩都做唔倒。大個就要自己行架喇，到時你做咩，只要唔係傷天害理，媽媽都會支持你」。

- - -

後記︰

第二日，爸爸話好辛苦先送倒小小返學，仲要喺校務處坐左一排先入課室。中午時份，老師打電話黎，佢話「打個電話黎係話俾你知唔使擔心啦，佢好好呀，冇乜野呀」，老師話佢地喺小小未返入課室時，先同小朋友一齊祈禱，通知左小朋友們小小返黎啦同埋佢整親隻腳，之後小小返入課室時係上課前o既自由活動時間，老師話問左小小要唔要去玩，佢話唔要，老師就安排左佢睇書。到時間夠時，戲肉黎喇 XP 老師話「咁你知小小係鍾意 order 人做野o個D啦，咁我叫佢去叫D小朋友收玩具啦，咁佢就走去XX角度同其他小朋友講「收玩具喇」，佢自己行架喎」。

之後到大肌肉活動時間，老師問小小要唔要sir滑梯 (學校有套室內小滑梯)，小小話唔要，於是第二幕高潮又黎喇 XP 老師話安排左佢坐喺 sir 滑梯前方高左一級唔會撞親佢o既位置「咁你坐喺度做小老師，幫我睇住邊個小朋友乖、有排隊，然後一陣話我知啦」

BB的火星話

十月中發燒冇返學開始，斷斷續續都返唔倒學，就黎白交左成個月學費 (爸爸稱之為「留位費」) 因為兩星期前，當小小o既咳同乞嚏好得七七八八之際，佢一野將樽1L飲品鎚落自己腳度，經過一輪觀察再決定去俾醫生睇下之後，證實腳趾骨有「由鈍器所造成」o既爆裂，於是醫院造左個腳套俾佢固定住腳趾S，同時即係話小小可以名副其實「安坐家中」唔使諗返學喇。

前言講完，講返今次想講o既重點。

話說有某一日，當沈醉完於小小唱兒歌唱得好好、好得意時，突然醒起佢已經冇再唱以前嗰D自己亂唱一通得黎又有紋有路o既歌仔。我喺度諗，唔通返學真係會扼殺創意？定係以前佢要唱嗰D歌只係因為佢冇語言？唔唱只係因為佢而家可以好好咁表達自己？

就喺我咁諗完之後，前晚小小開始自己喺BB車度自己講自己野 (係呀，從來都唔坐BB車o既小小，因為腳傷而愛上左坐BB車)，然後臨訓時，突然同我講外星話！嗰種外星話以前我地久唔久就會講，其實係求其嗌一D音，但係俾足表情動作好似真係講緊野咁。

我喺度諗，或者而家因為小小好劇烈地當握緊廣東話係咩一回事，所以需要再講自己作o既話，而且大家亦聽得明自己講乜，因而要講火星話o既需要減少？

- - - - - - -

講另一樣野

話說小小每次病o既時候隻菌都好惡，會惹晒全家人 (係咪全部小朋友都係咁?)。今次又係咁，而且爸爸尤其病得緊要。由於爸爸冇公司醫保關係，佢係好抗拒睇醫生，於是我就醒起買康鈣C返去俾佢飲，而且可以分D俾小小飲。

當日我特登用隻透明杯溶康鈣C，小小亦有我預期嗰種見到新奇事o既反應，但當俾佢飲時，佢第一句竟然話「辣」?!?? 我最初以為係 D 泡未散晒，但爸爸話之後佢都係唔肯飲XD

失散了媽媽

我一直都係一個金睛火眼、神經緊張媽。 喺小小兩歲半之前, 我視線係唔會離開佢, 放開手行的話會一直跟貼喺佢後面, 遇轉彎位會立即撲上去 (因為一轉彎就會離開我視線範圍)。直到而家依然喺街一定要拖實, 逼人地方會抱起。唔知喺邊度驚返黎, 覺得一冇望住佢佢就會被人抱左去, 就算喺屋企樓下遊樂場, 我都係望到實。

兩歲半之後, 因為確定佢係識路同會跟住我行,  所以夜晚由婆婆度返屋企段路我會由得佢自己行, 佢亦開始要求要喺經過遊樂場時跑兩個圈先走, 由於知道佢日間玩得唔夠, 我都會俾佢跑陣, 而佢多數都會好乖咁跑陣就跟我走; 有時唔肯走嘅時候, 只要我行去商場入口, 佢見到都會跟黎。

遊樂場之後, 小小仲有三個 check point, 1 涼茶舖-同涼茶姨姨傾兩句, 2 租碟舖-同老細 say hi 再攞個電制啪兩下, 3 提款機扮㩒錢。有時佢 check 完就會一齊行, 亦有時候 check 極都唔肯走, 尤其是㩒錢。

有一晚, 唔記得係太夜, 或是我太攰, 我好想佢行快步, 但偏偏小小仲想玩多陣, 於是我喺每個 check point 都好快 check 就繼續向前行, 小小都有跟黎。直至去到提款機, 小小停左落黎排隊, 我行前去到出左商場, 佢都冇跟黎, 我喺商場門口等左陣都未見小小, 就行去商場出面透過玻璃望返入提款機。曾經試過會見到佢仲排緊隊, 但呢刻見唔到 !??? 向後望又唔係見佢向左後行?? 我即時個心怯一怯, 向返商場門口行, 此時見到小小一臉焦急咁由商場行出黎, 我以為佢一出黎左右望望就會發現我, 點知, 我估因為平時我都會喺門口、佢見得到嘅位置等佢, 但今次佢唔見我企喺門口, 所以佢一出黎係直接向屋企方向快步走過去, 我叫佢都聽唔倒。佢一出商場門口, 直直咁向屋企大廈門口跑過去, 個樣係前所未見嘅焦急, 我個心當堂 up 晒, 急急腳追去佢面前俾佢見倒我, 然後大大力抱住佢, 話俾佢聽 : 媽媽喺度~ 媽媽喺度~ 然後一直抱住佢返屋企。

我平時同佢分開行時, 都會再三同佢講 : 我一陣間要見返你㗎! 如果唔係, 我會好驚㗎! 今次我都同佢講, 如果我唔見左你我都會好驚㗎! 所以你要跟實我呀!

雖然見到佢咁焦急個樣個心係實一實, 但另一方面我又好開心, 因為知道原來佢都唔係心野仔, 唔會自己輕輕鬆鬆行左去, 會驚唔見左我, 咁係值得高興嘅事!

P.S. 手機版一排之前開始POST唔倒相 ...

我是小小的最愛

早前有個星期日出街食飯, 由於臨近中秋, 套餐送嘅甜品係冰皮月餅。冰皮月餅上枱嘅時候, 我唔記得因咩事我係行開左, 返黎嘅時候大家已經食緊, 小小都分倒半個, 我返黎嘅時候佢食左1/4, 見到我返黎, 佢笑得好開心咁話 "呢個好好食架 ^u^ " , 同時間用手上嘅牙籤吉住一角冰皮月餅伸向我, 示意嗰一角俾我食。

當刻我個心超甜, 明白佢係因為覺得個冰皮月餅好好食, 所以好想同我分享。

令我諗起大約個幾月前喺屋企樓下遊樂場。當時小小有少少開始識/想同其他小朋友玩, 其時有兩兄妹(後來我知道個妹大小小一年)攞左一隻會生蛋嘅龜玩具落黎玩, 佢地受埋小小一齊玩, 於是3個小朋友就一齊追住隻龜, 又一齊接住佢"生"出黎嘅蛋。呢隻玩具龜正好有3個蛋, 佢地3個經常一人揸一隻。

玩左一輪之後, 有一轉小小手上有一隻蛋之後, 喺佢地冇為意嘅時候再伸手接多左一隻, 然後行過黎俾一隻我。當刻我第一時間係諗起 D 喵網站成日都話 D 喵會捉 D 老鼠甲由放去主人嗰度, 原來真係會咁架!!!! 小小當我係佢好鍾意嘅人, 所以想將好野都同我分享 ❤❤❤

珍惜能夠抱抱的日子

近幾做月開始喺街盡量少抱小小，一來想佢多D自己行，二來就算幾 parent friendly (輕磅) 佢都係有D重量，所以近來佢開始選擇想抱就攔截爸爸，因為要(喺街)抱就爸爸抱。但喺屋企我就唔會吝嗇抱佢，而且佢而家又硬淨左好多，又知道左好多，有時都會抱佢玩刺激遊戲，例如之前抱住佢然後夾實佢對大脾再倒佢訓向後，或者最近叫佢攬實我條頸然後我放晒兩隻手唔豆住佢 pat pat，次次都玩到尖叫晒。(不過我都要同佢講清楚，冇講同冇夾實大脾唔可以自己訓向後)

幾日前發生左一幕令我回味左成日、一定要寫低o既事。生仔之後，湊仔又攰、工作又忙、最後先開始訓返多D、體力又唔夠，所以好難有好平靜o既一刻。話說小小係會我一起身就醒，所以我返工日每朝起身去厠所同刷牙時，就係留意住厠所門外有冇一個人仔靜靜雞企左喺度。佢以前會喺床坐左起身 (以前仲會大叫「媽媽」....)，有時會慢慢推開厠所門，爸爸話有時佢會推開厠所門冇媽媽又會大喊。嗰朝，我坐喺厠所睇緊手機，佢慢慢推開門行左入黎，仲有未訓醒o既樣，跟住我同佢講︰「我抱你啦」，然後抱佢坐喺我大脾。而家佢人仔大左，平時佢坐我大脾時個頭永遠頂住我個下巴或個鼻，咁啱我此時抱佢打橫坐，一雙手可以環抱住佢，面面貼住佢個頭，摸住佢腳仔，佢又未醒透，但明顯見到我仲喺屋企、唔係唔見左、所以好安靜，我突然好感觸、細細咁享受連自己內心都好平靜o既呢一刻。

雖然小小成日R到兩隻腳爛晒，但摸住腳仔、手仔、面面都仲係BB滑嘟嘟。再過多兩個月佢就返學喇，上兩個禮拜已經攞左校服返黎，佢著住好開心咁笑 (可惜冇人識得映相，我想映但我又招呼緊佢...-_-")，希望佢第時真係返學都係咁開心啦 ^^

買左太陽眼鏡

拒絶甜頭

琴日 2015-6-14 我地好堅咁又去左遊行，當然藝術家契媽亦有一齊 (有研究話喺好多學運入面藝術系學生都佔左好重要嘅位置)。但今日想講嘅重點唔係遊行。

琴日行到終點立法會門外時，因為遇見爸爸嘅一個政治熱血朋友，吹左一陣水，其時契媽同小小奔左去第二度玩，跑完一大輪之後就返左黎坐低喺地上繼續玩。小朋友出現喺遊行確實係好吸眼球，有一個伯伯攞住 d 類似杏仁餅嘅野話俾小小食，契媽當然都有禮貌地拒絕，最後連小小都有耍手 (當然其實我分唔倒佢係表達「唔要」定「拜拜」)。佢耍手令我諗起我地每個禮拜去 playgroup 嗰度，中心係喺一棟私人樓入面，樓下個管理員好鍾意派糖俾黎上堂嘅小朋友，派到有時我覺得係咪需要買D返黎回贈一下。但我 set 俾小小嘅時間表係「未肯好好地刷牙之前唔會俾佢食糖 / 添加糖份嘅食物」，所以每次我都會耍晒手咁話「唔使喇，真係唔使啦」，因為如果收左我都唔知應該點解釋俾小小知呢樣野唔係佢可以食嘅。

(提外話︰有一次小小同一個好 friend 嘅同學仔一齊落樓，小小當然係冇得要管理員俾嘅糖，我地行前面，我冇睇倒同學仔嘅情況係點，但最後同學仔係扭住計喊住咁離開大堂，而睇得出小小係唔明白發生咩事, 因為佢唔會扭話要管理員俾嘅野。

近幾堂當我好堅決地拒絕 (係咁講: 唔使喇~ 真係唔使喇~) 管理員隊俾小小嘅糖時, 小小開始同我一樣猛咁耍手, 所以到琴日喺立法會佢向住俾野食佢嗰個伯伯揮手時, 我會好直接覺得佢係表達緊 "唔使" 。

雖然好多時我地會話小小零願唔要你俾佢嘅甜頭都唔要肯做你要求佢做嘅野 (比如試過有第一次見嘅姨姨話俾條裙佢, 佢本來已經話要, 我要求佢講 "多謝" 先可以要, 佢唔肯講, 零願唔要條裙), 但今次睇黎, 中心樓下管理員叔叔誤打誤撞幫我教導左小小唔可愛隨便要人地嘅野, 希望呢個習慣可以正面幫倒佢。

堅持

小小近月已經同大家有完整對話, 雖然佢只係講簡單短句, 但絕對係完全明你講咩, 同時非常想表達自已。

有一晚我返到婆婆屋企時, 佢話佢唔食飯, 用匙羹餵佢有飯有魚一齊, 佢再重申 "我唔食飯!", 要飛走啖飯先食舊魚。佢坐開左落地玩, 要求我坐過去, 我話要食埋飯先坐落去同佢玩, 然後遞匙羹飯埋去, 佢即刻起身走左去梳化後面, 然後谷出一泡眼淚話"我唔食飯"。

我都係講嗰D "點解唔食飯呀? 你唔肚餓咩? 今晚唔會食餅餅架喎" 之類, 但佢淨係一路重覆話"我唔食飯"。之後婆婆攞出一小煲通粉, 同佢講"拿食粉啦", 佢即刻走過黎大啖大啖食, 仲成煲食晒。婆婆話原來中午食通粉, 到食晚飯時小小指住食剩嘅通粉話"要食呢個", 婆婆話"但係呢個凍喎, 食飯啦", 原來小小係想堅持要食嗰個粉, 其實佢係肚餓的。當時我真係哭笑不得, 估唔到年紀小小嘅小小已經發展出呢種要求 XD

敍事

昨晚呢位同事勁扭計, 婆婆話佢最近夜晚唔願食飯, 會話 "等媽媽返黎餵", 琴晚我返到屋企時已經八點幾, 佢都只係食左幾啖飯, 叫佢埋黎餵都唔應, 要舅父飛佢過黎我度, 但食左兩啖又走左去, 由於我呢排 keep 住唔舒服 (傷風感冒嗰d ), 好攰, 所以我冇心情同佢玩, 就放低佢, 話 "咁我走喇, 你食完打電話俾我啦", 佢先知死, 即刻跑過黎著鞋要跟我走。對話左幾句, 佢知係冇得走, 先坐好自己食飯, 但都係食左半碗就話飽。

之後我媽話要佢洗頭, 又擾攘左一輪, 狂話要食車厘子 (我一直都聽成青提子), 到吹頭時我攔住佢喺房間唔俾過, 佢直情喊。。。咩事呀而家。。。。? ? ?  因為夜喇, 婆婆就俾個盒佢拎返屋企食。

返到屋企, 當然又唔願訓, 訓左上床都仲話要剪指甲 (平時只有我捉住佢剪)。爸爸話: 佢唔想訓覺之嘛。於是我同佢講條件: 拿你要好合作坐定定俾剪先得, 郁就唔剪㗎。

果然佢好合作咁坐定定 (真係好喇)。剪到食指時, 指甲有攝住 d 血跡, 因為佢又R損左隻腳, 所以我一心諗住係嗰d血, 但佢話 :

小: 呢隻手指整親, 唔剪得

我: 下? 呢隻手指整親咩? 唔係R損隻腳d血黎嘅咩?

小: 唔係呀, 係呢隻手指整親

我: 今日整親㗎? 點整親㗎? 

類似吧對白重覆左幾次, 於是我就唔剪嗰隻食指住。跟住我打俾婆婆求證, 婆婆都話唔知佢整親, 於是我就去整濕紙巾抹佢隻手指, 果然係抹得甩嘅。佢呢排用佢僅有嘅詞彙真係作倒好多故仔, playgroup老師都叫我要多d同佢傾偈, 睇黎係開始 pillow talk 嘅年紀喇 ^^

完整句子

我知我知我係好耐都冇寫, 因為小朋友真係大得好快, 一篇未寫完又 outdate 左, 享受每一日好過為左要寫野避開個小朋友唔理佢。

最近小小已經發展出好多完整句子, 1歲3個月嘅佢, 上個禮拜有一晚我、我媽同佢喺屋企食飯, 佢面前有一碟菜心, 佢食完分俾佢嘅菜心之後, 仲不停夾碟入面嗰 d (冇錯, 估佢唔到佢揸筷子已經達致至爐火純青嘅境界) , 於是我就快快手食埋 d 外莢, 留左一條菜心芯喺碟入面, 點知佢竟然話 "你地食晒拿? 我咪冇得食囉0.0" 咁, 連日日同佢對話最多嘅我媽都嚇到O晒咀係咁笑。

最近有人送左一套切菜玩具俾小小, 佢好鍾意, 晚晚返到屋企係咁切。以下係前晚我沖完涼出黎聽倒嘅對話:

小小: 呢個係蕃茄黎架, 媽媽好鍾意食蕃茄架
嫲嫲: 係喎(係蕃茄喎)。你好鍾意食蕃茄?
小小: 係媽媽鍾意食蕃茄, 唔係…(聽唔清楚) 好鍾意食蕃茄
嫲嫲: 哦～你好鍾意食蕃茄~
小小: (大力) 係佢鍾意食蕃茄, 唔係我鍾意食蕃茄

證明小小係識分你我他的  XD

短句子、聯繫與記憶

落 tag 時, 方才發現2歲後冇寫過野。。。

幅相係早幾日映的, 映得小小好可愛。上個星期某日開始, 我決定返工日朝早起身時叫一叫小小, 因為我唔想佢再喊住咁醒(係突然發現我唔係訓喺旁邊所以喊), 因為有一朝我起身喺厠所時, 聽倒佢大聲慘叫"媽媽~!"。 冇試過真係叫得醒佢, 因為我都唔係好大聲, 但都有好日係夠鐘佢就自己醒左, 好似今朝咁, 本來我都只係醒左賴床仲未起身, 但我有慢慢移開我個大脾(佢貼住我大脾訓)同塞返條被喺佢背脊頂返住佢, 點知我鬧鐘未 響佢就醒左喇。

食完奶, 佢心情都仲未係幾好, 於是我就抱埋佢去厠所, 俾張櫈仔佢坐底等我刷牙洗面。之後返返入房換衫, 佢終於開聲講野, 即係醒透同埋心情好返喇, 點知我換好衫話要返工時佢就開始想喊喇, 到我去開門時直情大喊出黎。當爸爸同佢講 "你唔好喊住啦, 你喊住咪睇唔倒媽媽咯" , 佢真係稍微喊輕左少少、對眼大番d、同我揮手。。。佢真係聽得明晒你地講咩, 而且明白係咩意思

到 lunch time 小小打電話俾我時, 除左係咁話我知佢食完飯飯同疴左55好臭呀~之外, 佢竟然自己講左一句 "媽媽返工, 小小喊喊呀", 當刻係覺得, 呀原來佢未訓晏覺之係真係記得發生過咩事, 而且可以講得出自己因為媽媽返工所以喊。

我甚至認為佢記得想要喺我出門口前見到我, 所以呢幾日都喺我起身前醒左。不過更大改變應該係我自己嘅心情同期待改變左, 唔再係希望起身時唔好整醒佢, 而係諗住佢會同我起身, 所以我自己嘅處理唔同左, 情緒亦平靜左。

另一次令人驚訝嘅短句子, 係小小有一日放假訓飽訓夠先起身(當然心情亦好靚), 佢指住我放喺床頭架個眼鏡話 "我攞個眼鏡幫媽媽戴"。嘩~~~~ 呢種係幾多元句子我都唔識數喇~~~

媽媽，月亮去左邊呀?

夜晚同小小一齊訓大床 (冇錯，爸爸由佢11個月大時開始已經一直訓廳)，如果佢嗰晚精力旺盛的話，成張床咁大任佢玩可以玩好耐都唔訓。前一兩個禮拜月亮出現喺我地窗邊，我有指住話佢知「月亮呀」，事隔個幾禮拜，近幾日當然月亮已經行到一個我地個窗睇唔倒o既位置啦。

琴晚小小又喺張床度跳來跳去，我冇佢咁好氣，一邊扮訓、亦係閉目養神啦。佢走左上窗邊疊被上面，然係叫左幾聲，最初我都冇聽明佢叫乜，直至佢叫我︰

小︰媽媽
我︰係
小︰月亮呢 ?
我︰月亮被 D 雲遮住左

幾個回合之後，我坐起身示範俾佢睇「遮住」即係點
之後...

小︰媽媽，月亮去左邊呀?
小︰媽媽，月亮遮住左

我不停咁答佢呢 D 對白，我好想拍低 video，但太黑喇，唔會拍倒乜。

熄左燈o既房中，望住俾街燈照亮o既小小企喺窗邊不停講純正 BB 話，又係另一種感覺o既寧靜 (但同時我又眼訓呀...~~~~)

sir滑梯

屋企樓下其實有好多遊樂設施，但地利關係通常都係玩商場門口最低b嗰個。雖然d硬件係俾低b玩（有個假山山窿、兩個搖搖馬同一個到大人腰咁高嘅sir滑梯）但因為地點喺屋苑商場門口（係必經之路），而且連接籃球場排球場，係最大嘅空地，所以呢個低d場同時會有好多板車單車飛來飛去，我覺得其實勁危險。

相中呢個係另一個我鍾意嘅場，雖然成套遊樂設施淨係得呢條滑梯玩得倒（其餘係鐵鍊陣），但淨係上樓梯再 sir 呢條梯，小小已經可以玩好耐，而且呢度要行幾步先到，變左小d人喺度玩，但一樣有好大個空地（因為係樓梯嘅 landing），而且因為少人，成日都有麻雀，仲處於鍾意追雀階段嘅小小可以玩好耐。冇咁多人喺度飛車，亦代表我唔使一眼關七到實，冇咁大心理壓力。

自從小小嘅跑同攀爬能力進步晒之後，可以玩嘅設施多左好多。啱啱兩歲嘅佢已經可以自己玩晒2-5歲嘅設施，同埋好多5-12歲設施嘅一半。而家天氣好凍，期望天氣回暖可以去多d郊遊啦^^