聽日滿月了 -- 小回顧

BB 讓人不知所措

唔計初初返黎大家都唔知咩事o個段日子

• 食奶成日好唔專心，都唔知食夠未。成日食住訓著左 (所以唔知佢係咪已經食夠)，但食完又鬼打咁精神 (咁係咪即係未食夠?)。有時食完抱一大輪訓左，一想放佢落床 (有時甚至只係諗，都未 action) 就醒，仲要係醒晒o個隻，跟住就一直都唔肯訓 ---- 所以我成日問︰又話 BB 一日要訓廿個鐘o既? 我呢個一日都唔知有冇訓 8 個鐘....-_-" 老公 figure out 倒佢如果踢得好大力就應該係未食夠，有時會俾佢加時，但通常加時都係求其好唔認真咁食兩啖，又會影響左下一餐
• 唔訓呢段時間，真係唔知佢想要乜。扭抱咩? 佢好多時抱住都喊，扭眼訓咩? 佢真係鬼打都冇咁精神，換片咩? 換完片都係喪喊，唔見得佢會因為片濕喊.... 於是冇野做倒
• 半夜夜奶其實一直都好乖，我仲同佔井講話夜奶係我最有成功感嘅一餐，因為通常佢都好努力好專心咁食，食完又會訓返，一直訓到朝早嗰餐，嗰幾個鐘我都有覺好訓。點知呢兩日唔知咩事，雖然夜奶時佢都好落力食，但琴日朝佢落左床之後仲喊，於是加左時，今朝雖然唔係喊冇加時，但佢一路都唔訓冧所謂我都訓唔倒。到食埋11點嗰餐，老公話佢湊叫我再抖下，我一訓就訓到一點半，即係又到下一餐時間，我一起身見倒BB唔喺床度，我就知大件事喇，肯定係佢一嚘口冇訓一路嘈所以佢唔肯放返入房驚嘈住我。出廳見奶奶抱住訓左，即係又係搞足雨個鐘先肯訓... 所以我點有可能係「BB訓我又訓」呢

關於喊同扭抱

• 本來我係相信喊唔好即刻抱呢個理念，但問題係佢下下都可以喊到個面紅晒，又點能夠俾佢咁樣喊落去呢，而且放佢喺以床自己喊，試過可以喊足半個甚至一個鐘唔停，可以話係冇試過「喊到攰訓左」，冇符... 今日好心力交瘁，我放棄喇，抱就抱啦... 好在佢近呢個幾星期增重埋想，即係起碼食嗰方面冇問題，就算我冇多餘嘅奶，都總算係僅僅夠食。

冇事嘅BB好可愛

• 我唔怕同佢沖涼，雖然有八成時間佢都係喊，同時都要多謝老公日日肩負校水嘅工作。沖涼都算順利，今日甚至完全冇喊，連洗頭都冇喊（我係先沖涼後洗頭）
• 訓左覺嘅BB當然最可愛，呢個無需多解釋。而且要佢訓左我地先可以做到其他事，包括食飯同去厠所，更加唔好講自己訓覺。 如果清醒都唔係差嘅，冇喊就已經差好遠。
• 佢往往喺出街嘅時候最乖，喺健康院等緊或者搭車出入嘅時候佢都訓得好好，唔敢想像如果等緊同搭車時都癲左咁訓會係點...
• 佢一直半夜都好好，只係近兩日唔知發生咩事...食完又唔係好肯訓，訓又唔係好冧，搞到我最黃金嘅半夜時段都冇得訓

我自己

• 肚紋喺頭兩個星期係超痕，仲痕過大住肚嗰陣，呢點係之前冇預計過嘅。本來出左院喺屋企我係仲著緊網褲，方便 cool 住條m巾冇咁易移位，到後來痕到一個地步係懷疑會唔會條網褲 cool 住個肚所以咁痕呢，但情況喺轉返著大肚嗰時嘅棉質低腰底褲都冇大改善。
• 肚紋後來係喺不知不覺之間大約喺兩個幾三個禮左右開始冇再痕到癫，冇為意嘅原因係~~ 我出風疹!!! 最初只係肚皮上面有 D 紅同痕，同我之前 R 肚痕產生o既紅印好似，後來發展到背脊同兩邊手上臂都勁痕同紅疹，其時先發現原來肚紋已經冇痕，心諗︰好彩肚紋已經唔痕先出風疹，如果唔係真係再癲多二錢重。D 風疹痕到我會o係張上面典，好似瘋婦一樣。到有一晚我同老公都覺得唔可以再忍喇，不如去睇醫生啦，當時都未肯定係風疹。打電話俾媽咪叫佢上黎幫我睇住 BB 等老公同我去睇夜診，媽咪因為一路都唔想我未滿月出街 ( 而其實我已經落左好多轉喇 ) 所以拎左 D 菊花黎俾我煲水抺身。其實我都唔係太想丟低 BB 去遠地方，所以屈服左冇去到睇醫生。抺左兩日，用勁熱毛巾敷，真係好左好多。
• 會陰傷口最初出院時係正常地好痛，坐硬椅要夾起一邊 pat pat，坐軟椅先冇事，好彩屋企有張電腦椅，初初幾日真係全程只能坐電腦椅。一個星期左右開始漸漸剩返腫痛而唔係傷口痛，到兩個星期左右已經基本好晒喇，但我都仲有 keep 住沖洗，一來惡露未清，二來雖然會陰傷口好晒但近肛門傷口未好晒 (我有二級程度撕裂)。最近真係 feel 倒完全好返晒喇，先懶左冇沖洗 .... 又其實... 一路都淨係話要沖洗，冇人講過要沖到幾時....
• 餵人奶終於堅持倒知道 BB 夠食，近一兩日仲開始真係有谷奶感覺 (太慢喇... 果然連人奶方面都係窮媽媽)，但依然唔知 BB 點先叫食夠，幾時要食埋另一邊 .... 由於 BB 唔肯訓搞到我冇 free time o既關係，更加唔好講「餐與餐之間」pump 奶黎追奶，連食完想用手清完乳房o既機會都冇。再係咁... 恐怕返工真係冇奶俾佢食....
• 情緒經歷過好差o既時間，因為唔知 BB 要乜，因為不停餵奶好攰，唔知點算問人都冇用冇晒方向，因為同奶奶同一屋簷下不嬲都相處得唔好坐月令情況變成困獸鬥，等等等等，曾經o係抱住 BB 時想過放手等佢跌落地，曾經好想 fing 佢落床，成日都想唔要佢 ....  到三個禮拜大時情緒 / 情況都仲係好差，直到近一個禮拜先好，因為呢一個禮拜自己係覺得︰豁出去喇，時間表跟唔倒? 唔跟喇；佢喊到癲左? 照抱啦；唔訓? 唯有由得佢啦；再加上之前成日覺得老公好辛苦唔想太依賴佢，到我生風疹同驚唔夠奶，大家都覺得我休息好緊要，所以我有時o係老公工作唔太忙時我都真係攤得一陣得一陣咁訓 (當然前題都係 BB 都肯訓)

滿月喇，希望真係如大家所講一切會進入佳境啦

• 0m, 
• 肚紋

2013年1月2日 催生：笑氣 要疴喇

陣痛越嚟越強烈，開始要用全部精神去抗衡。老公坐喺部機隔離，佢開始識睇機知道我幾時開始痛同有幾痛。好彩佢有一齊去上運動班學呼吸，因為到好痛嘅時候有佢一路帶住要點做係好大幫助，自已當時已經可以話係冇晒自我控制嘅能力。

當時我冇諗到打止痛針或者笑氣嘅問題，一來我專心對付緊陣痛，二來我諗住醫院啲人會 take care 我，因為我都唔會知其實我當時係開到幾多度/相對係痛到幾多嘛。喺有一下當我好痛緊時，有幾個姑娘走入嚟，問我：「你要唔笑氣呀？」。當時我勁痛緊根本冇可能應倒佢，我老公都幫我答話：「佢而家痛緊答唔倒你」，跟住佢地行埋我床邊再問我：「你要唔笑氣呀？你唔答我我俾唔倒你㗎喎。你呢間房冇笑氣㗎，如果你要就要轉房」，嗰刻我係未痛完嘅，但聽倒我間房係冇笑氣，即時死心啦，當時亦已經痛得好密，所以我都冇空間再深究呢個問題。但係我最唔開心嘅，係點解佢問第二次嘅時候可以咁輕挑，完全冇關心過我嗰刻係痛緊，而且唔等我痛完先再問呢？

於是我就繼續只係靠呼吸法去捱陣痛。過左唔知幾耐，我開始感覺倒要疴嘅感覺。印象中好似冇人入過黎 check 我開左幾多度，我好緊張㩒鐘，都隔左一陣先有健康服務助理入嚟，我話：「我要疴喇」，佢話唔好住要叫人入黎睇，感覺上都仲等左好耐先有人嚟，期間我每一次陣痛都好努力忍住唔好疴（btw 嗰種疴嘅感覺係好明顯分得倒唔係急屎，而且係痛嗰先會有呢個要疴嘅感覺，所以真係唔使驚會搞錯），終於有人嚟 check 我時，原來我已經開到9度，又原來而家呢間唔係要俾我生嘅產房，於是有人係咁推左我張床去隔離房，又趕左我老公去換衫。（點解佢地唔係 monitor 住我部機睇我咩情況嘅咩？點解要我自己講先有人話我開到9度？）

嚟到呢間大D嘅房，佢地拎左口罩嚟俾我聞笑氣，但我當時痛到鼻塞根本唔夠力索。老公「換衫」其實只係著多件手術袍，佢不停提我幾時索笑氣，因為唔會即刻有效，會有 delay，但一來我唔係太吸倒，二來吸到好 wing 根本幫唔倒手，我用力望住老公，我要有返意識去惠心做我而要做嘅事，同埋喺老公身上攞倒繼續支撐落去嘅力量，呢一刻我又次好感激老公入嚟陪我！佢好勇敢！

助產士叫我唔好疴住，佢地要 set 好個場先。放左對腳上架之後，姑娘幫我套左對腳套，唔知係保暖定乾淨呢... 因為到真係生出嚟時我記得佢地又好頻能咁除左對腳套的。到佢地 set 好晒個檔之後，佢地話：「到下一次痛你就疴啦」，可惜呢個時候又冇疴嘅感覺喇，我直情係有氣力同 D 姑娘講「而家又冇喇，頭先我仲忍得好辛苦添，o徒晒」。終於再痛喇，我記住跟返之前學咁，盡量向前彎腰等脊骨唔好頂住產道，記得有 blogger 講過 push 左幾次就出左嚟，但我 push 左好似好耐咁都唔得，我問姑娘：「我仲有幾耐時間？」，原來我係可以有一個鐘頭的，咁我都放心 D (我驚o個 D 又話缺氧又話要用拑o個 D 問題)

o係我好俾心機咁跟住陣痛 push 時，其實 feel 倒 D 助產士姑娘好悠閒咁行來去，只係佢地冇離開間房咁解，睇得出我真係有排 push。初初佢地都有話我推得唔啱位之頪，於是我嘗試將個感覺 focus 喺個肚硬嘅位置同陰道，推得啱唔啱真係冇人教倒你，只可以憑自己嘅感覺同領悟，睇過有 blogger 話用唔啱力會必左屎，我諗真係會。到 D 助產士開始專心理返我嘅時候，係因為佢地話見倒頭喇，於是叫我更加要配合個陣痛推，一痛我就大啖吸一啖氣，然後閉氣出力，但係一下收縮往往長過我一啖氣，老公提我「唔得喇，你要透氣喇。」於是我放氣再大力索一啖氣再推。而家就講到好似無乜野咁，但事後老公同我譾返，佢話見倒我谷到面紅到不得了，佢當時係驚我會爆血管會死。

終於，喺經過左唔知幾耐之後，姑娘突然嗌：「停！出左喇」，原來係個頭已經出左，個身唔係好使用力都出左，我只係攤喺度，虛脫咁濟，之後再 feel 倒再疴左 D 野我估係胎盤。

 

• 生產過程

見餵奶姑娘

今日又去見餵奶姑娘。根據我多次見餵奶姑娘嘅經驗，佢地都係理論多於一切，
會同你講：「你自己要訓夠呀，食完奶交俾爸爸抱俾佢地親子下啦」轉頭又會話：「BB 鍾意媽媽抱，咁你又抱下佢囉囉」
問：「佢咬得咁細力其實係咪冇食緊呀？呢D時候點算呀？」答「咁總之佢啜緊都係刺激嚟嘅」
問：「佢個口開得唔夠大，我好似你咁 wear 佢下巴但唔成功，點整㗎？」，答「一 wear 就係㗎啦」（我即時 wear 俾佢睇都唔理）

總之每次見完餵奶姑娘都係冇新結論咁返屋企，而個衰妺又一出親街就勁合作，搞到我想俾姑娘睇完問問題嘅例子都冇，例如點解佢有時會食到 tart tart 聲呢？食完喘氣喘好耐有冇問題呢？等等。而次次大家講嘅餐數同餵食時距都唔同，唔通真係幾日就差咁多？

• 0m, 
• 健康院, 
• 餵人奶

2013年1月2日 催生：入院 落藥 陣痛

計數係41週2日，我係喺聯合醫院生嘅。醫生安排我 8am 入院催生。我地遲到，九點時竟然有電話打黎催，唔知係驚我有事定係驚我其實喺私家生左呢？

上到產前房，有姑娘問我好多野用嚟填左好多文件，仲寫左張臨時出世紙，原來入院生仔要帶老公 HKID copy 就係因為要對資料寫呢張臨時出世紙。之後就上床駁機監察 BB 心跳同數胎動。期間左邊床不停打電話俾同事交低手尾，話「我而家已經訓左喺醫院啦，我今日開始放假架啦」，我估係穿左水或者見紅。右邊床則吊住條鹽水。之後醫生黎同我check 宮頸，其實都未至於痛，只係都幾唔舒服因佢摷得好入，醫生話我宮頸都算成熟，可以落產房同我穿水。

唔知訓左幾耐，姑娘同我對面床同右邊床講︰「執定野喇，下一 round 到你地落產房」，之後佢地都隔左好耐先落去，所以當派飯之後姑娘同我講︰「你食埋飯下一 round 到你落產房」時，我仲諗住我有大把時間，咁我又冇打開過個走佬袋，冇野要執，姑娘又叫我食飯，咁我就食啦，點知食緊時聽到有人觀察我然後話：「佢食到一半喎」，咁我已經心知不妙，諗住快快食完 or 唔食，跟住已經有人走埋黎同我講︰「唔好食咁飽喇，唔係一陣落到去用藥驚你會嘔。」，我梗係勁怕佢地同埋勁合作咁「哦我食完架喇」，其時我個心係諗︰「頭先唔知邊個叫我食埋個飯呢吓 -_-」

由於我行得走得，所以係有個唔記得姑娘定健康服務助理幫我攞住我個走佬袋然後我地一齊行去產房嘅。產房入面有個梳化位坐住好多準爸爸喺度，而我就直入左一入門口嘅7號產房。產房入面其實唔大，我一路想像一陣唔知會係咩情況呢？冇幾耐老公都黎到喇，原來陪產者係要自備口罩的，所以佢上左黎又要撲返落樓下便利店買口罩（根本就應該喺陪產小冊子寫清楚啦！）

由於我驗倒有B型鏈球菌，生產時要靜脈注射抗生素以防感染到 BB，所以我左手打左豆仔，就喺豆仔度吊埋催生藥，我唔知如果冇B鏈係咪都係要打豆仔落藥。我落左催生藥之後好快就有反應，最初係好輕微可以忍受嘅痛，仲同倒老公傾偈，但好快就變成十分鐘痛一次，我望住頭頂個鐘準備下一次陣痛，但老公叫我唔好睇住個鐘。陣痛時用呼吸法個咀好乾，老公幫我問姑娘我可唔可以飲水跟住攞左杯水俾我，同潤唇膏。姑娘入黎問我有冇小便過，佢話落左黎產房要兩小時排一次尿，於是我就睇住咁上下時間就問要便盤，咁更加唔怕飲水啦，而且都唔存在生之前要放尿啦，解答左好多人嘅疑問。

 

• 生產過程

抺口

平時幫小小抺口時，多數係佢食完奶又未肯訓，多數都好順利（係爭在我記唔記得要抺）。今朝8點半嗰餐，因為佢未醒定又嘔左一啖奶，所以我決定同佢抺口先，點知佢應該真係幾肚餓喇，今次竟然咬實我隻手指唔放，原來佢個咬合都真係好大力的，唔怪得之個乳頭可以俾佢咬到損晒。

小小係人奶埋身B，但點解近呢兩日勁多風，老公話發現佢有時係有風所以唔肯訓。而且佢時時食住訓，但一離口就勁精神，how come??!!!? 搞到我地真係一整日冇停過...

 

• 0m, 
• 餵人奶

喊

而家係凌晨42分

頭先十點開始餵奶，佢又係好唔努力咁咬，足足咬左一個鐘，中途佢似訓著左，我甩佢，佢醒返，於是我換邊，就係咁前後咬左一個鐘。之後諗住掃風，點知佢就開始喊。最初諗住佢要暗訓，但佢喊到聲嘶力竭，於是我俾佢食，點知佢唔想咬之餘，仲咬住喊。

我狠心將佢放落床，諗住由佢喊到訓，其時十二點。頭先入黎房睇佢，佢冇訓不特止，係眼眼光咁訓喺度，我問老公，佢係咪對我地好失望呀？老公問點解，我話：因為我地由得佢喊唔理佢。老公話：咁頭先你又餵左奶我又抱左喇，我地要做嘅都做左。

望住小小空洞嘅眼神... 淚...

 

• 喊, 
• 餵人奶

喊

啱啱佢自己喺張床度喊左30分鐘，而家靜左落黎但又唔係訓，唔知究竟做咩。覺得自己好殘忍... (淚)

 

• 喊

人肉奶樽

記得有個中學同學o係 facebook 度話「我o係房餵緊 (人) 奶，奶奶竟然話想入o係睇下」，當時我都諗︰咪係囉 ! 參觀?! 都痴線o既

而家到自己... 由最初真係哩埋o係房餵，我媽開始上黎我地屋企話「幫手」，佢會直入黎觀察我餵奶，自己阿媽冇得反抗，佢仲一手大力鍊落我個胸度話我要鍊鬆 d 奶 BB 先飲倒，我o個刻唔出得聲但心裡勁難受，對我媽黎講個胸好似係 functional 而唔係我身體咁....

到後來因為驚係自己唔夠奶，搵左個 expert 返黎教我用泵，我地兩個就係咁坐o係廳攤開晒o係度泵奶，o個時奶奶企o係度 (其實唔係睇緊我地)，我都怒吼叫佢一係去煮飯一係去做第二 d 野，連佢個仔都話「你都唔會想打開對奶俾人睇啦」，我話「係呀，我冇奶俾你個孫食所以而家我 d 朋友黎幫我呀，咁你可唔可以借借呀」

教泵奶呢個 expert 都係好大力咁係咁鍊我個胸，當時我開始覺得自己個胸唔係屬於自己o既。

之後，泵奶時不停大力鍊.... 好攰

去哺乳門診，佢教話 bb 咬住食緊時一路鍊胸等佢食多啖...

我已經發展到，對胸只係用黎餵飽 bb。我開始會o係廳餵奶，有時係因為「想嘗試」邊睇電視邊餵，有時係因為想試下坐梳化餵會唔會舒服 d。
再發展到，已經唔介意一班熟o既女仔 friend 黎到時睇住我餵奶，仲係我自己主動講話「我要入去餵奶喇，你唔介意o既話我 ok 架你地可以入黎睇」，當然其中有人係選擇企o係門口一齊傾住偈但唔入黎。

對自己個胸真係冇晒感覺.... 只係 bb 個奶樽.....

到有一次奶奶又去厠所唔閂門 (佢以前成日都係咁，俾我話左好多次)，我要質問佢「係咪而家我成日唔著衫走來走去搞到你誤會左去厠所可以唔使閂門呀?!!!」
佢甚至會 -- 我o係廳泵奶，咁當然又係攤開晒，佢o係街買完野返屋企，開住鐵閘大門唔閂 (佢成日都係咁，鍾意入廚房放底 d 野先施施然去閂門)，我當時心情好，冇怒吼佢，只係話「快 d 閂門啦，我唔係想俾晒全世界睇架」  -_-"

我係咪太變態？幾時先會正常番.....

 

• 餵人奶

暗訓覺 / Hymn

o岩o岩睇完 manchi (見引用) 話佢確定 bb o岩o岩食完，片又乾淨，就會由得 bb 喊，而心軟嫲嫲則會抱，所以佢 bb o係夜晚嫲嫲黎時會喊得勁大聲。

其實我都相信呢一套，但另一方面又好擔心如果佢喊都唔理佢會搞到佢好冇安全感。因為我係一個好冇安全感o既人，所以我更加唔希望小小會成長成為一個冇安全感o既人。睇左 manchi 咁講，我又有番少少信心。o岩o岩餵完下午1點幾o既奶，見佢咁醒，抱佢玩左一陣，再抱佢o係電腦枱上左一陣網，佢都係唔願訓，最後我決定放佢落床，佢諗左一陣，開始喊，我入房同佢講佢要自己訓，一係就自己玩，佢當然係選擇喊，於是我竟然開始講野 ..... 雖然成日話要多 d 同 bb 講下野，但我真係唔知講乜好，所以成日同小小相對無言。但頭先我用手按住佢心口，我竟然講左好長篇大論，大意係...

我知道你好想有人抱，但每一個人o係呢個世界上都係得自己一個，你都會要學習面對。媽媽會照顧你，會餵飽你，會盡力保護你，但最終你都係要自己面對呢個世界。你可能會搵倒一個相愛o既人，你地會愛對方，同時會傷害對方，如果唔好彩，你都係會得返自己一個。第日你都會離開媽媽，但媽媽都會愛你。

我一路講一路自己o係度喊，小小應該好少聽倒媽媽講咁多野，可能係咁令佢聽得好安心，最終花左一段時間，佢終於都訓左。o係我o既長篇大論之後，其實係重覆唱左好幾次我大肚o既時候成日唱俾佢聽，一首我好鍾意o既 hymn:

May the road raise to meet you,
May the wind be always at your back,
May the sunshine warm upon your face,
The rain fall soft upon your field,
and, until we meet again,
May the Good Lord hold you
in the palm of his hand

我好多時會唱呢首歌俾肚入面o既佢聽唱到自己都喊。呢首係中學時畢業禮會唱o既歌，歌詞好有意思。我以前會 skip 左 "and, until we meet again" o個句，因為覺得我地從來都冇離開過對方，但而家要唱埋呢句喇，因為小小已經係自己一個個體，佢有佢o既性格，所以我地會唔明白佢。小小，媽媽會努力照顧你，當有一日你選擇自己出去闖時，May the Good Lord hold you in the palm of his hand。

打著打著，眼淚又湧出來了。

 

• Hymn

生娘不及養娘大

生左出黎，先發覺之前陀o個十個月真係唔算得係 d 咩。

D 人成日話「你大住個肚，一個人食兩個人野」  
-----  實情係，我覺得而家餵人奶先係要一個人食兩個人野

大肚唔好飲咖啡奶茶，D 咖啡因會影響 BB  
-----  實情係，大肚o個時都有好久唔久飲下奶茶過口癮，飲完 BB o係肚入面真係會興奮 D 踢得緊要 D。但而家餵人奶係直情完全唔敢飲 -- 以前都只係踢下，而家如果佢因為我飲左奶茶搞到佢興奮得濟唔訓，就係我自己攞黎賤喇.... (佢本身已經唔係好訓，再醒多 D 真係食得屎..... )

大肚，係好多野唔做得，但都仲有得自己選擇做咩唔做咩，其實都仲係自己一個人好自由
-----  而家多左件人，又唔可以唔理佢 (請問o係香港可唔可以送佢俾人?)，真正乜都做唔倒，有時佢喊緊 / 食緊奶，真係急到賴都冇得去厠所 (真係賴，因為會陰肌肉仲係好鬆)。冇得訓，但係仲有好多衫要洗，飯都冇時間食，仲要想泵奶 .....

最令人沮喪係，佢成日癲喪咁喊，又唔知喊乜，o岩o岩已經食完，又換左片，摸佢又算太熱太凍.... 究竟咩事呀????!!?!!!!! 喊到人地勁燥!!!

肚紋

生完，清楚見倒晒自己D 肚紋，就知道，肚紋根本一D都唔關保持皮膚濕潤事。

我知道肚紋要有係無可避免，所以我一開始就冇打算特別搽 D 咩去預防，只係 cheap cheap 地搽 BB 油。孕初中期真係覺得個肚好乾，搽完BB油會再搽 cream (全身搽)，到後期，開始有紋時，就知道根本係肚皮受力位o既拉扯，所以英文叫 stretch mark。

而家睇得晒成個肚，見倒 D 紋咪就係好似你買條托腹帶o個個U字型位囉


* * * *

大肚o既時候 D 肚紋已經好痕，唔單止日頭痕，夜晚好多時都會痕醒，跟住要用意志力叫自己唔好 R 然後再用意志力拿拿林起身搽 cream。搽 cream 其實作用唔大，正如之前所講， d 肚紋唔係因為皮膚乾，而係因為入面o既深皮膚組織撕裂，係傷口o既痕。

以為生左之後就係等佢消，點知原來戲玉而家先黎。我相信係因為而家先係 d 撕裂可以開始修補自己o既關係，o個種痕o既程度唔係大肚o個陣可以比。大肚時o既痕都話可以用意志力忍下，而家o既痕係不能不 R 之餘，再加上湊 BB o既壓力令人勁軟弱，係可以痕到真係嗌「好辛苦呀.....」然後喊出黎.....

肚紋呀肚紋... 求求你快 d 好啦.... 真係好辛苦.... 今日第 20 日喇.... 仲要幾耐先會唔痕.?....  (淚...)

 

• 肚紋

小小 18 日

小小今日  18 日喇，18 日，話長唔長，話短唔短。呢十幾日好難捱，人地話初生 bb 淨係得食同訓，咁究竟佢喊咩呢？太凍？太熱？唔係。肚餓？明明o岩o岩食過。初初返屋企o個幾日真係一喊就餵，結果經常係連續餵三五個鐘。

以前朋友生左時，我好興講一句「休息多d，BB訓你又訓」，到自己生左，先發覺現實係唔可能。有一次我同小小講︰「假設你平均一餐連埋數風個半鐘，媽媽用三個字黎去厠所食飯沖涼，即係媽媽得番三個字訓覺。OK~,  一日夾埋有10個三個字，係咪？

而家老公餵中午一點半同夜晚十一點半兩餐，我多左好多時間訓。但之前真係訓唔倒.... 搞到個人有時心情好差.... BB 其實唔算成日喊，但一喊時就好 down，唔知佢喊乜，而且唔想再跌入連續幾個鐘o既漩渦入面。每次問姑娘當然係叫你按需要餵，即係喊就俾，呢刻打打下字覺得其實咁同俾奶咀好似冇分別.... 我好需要有人俾個法我，我媽話限佢食野時間表，未夠鐘唔俾食，咁佢餓就會緊張 d 食多 d，老公再 base on 呢個時間表定義左一套法則俾我跟，因為佢知道我係要有規可循先知可以點做o既人。小小又喊喇，老公叫我唔使理佢住，記得返屋企第三晚，小小喊左好耐都唔肯訓，老公話放佢落床等佢喊到攰就會收聲，我抱住老公喊，我話唔想小小係一個冇安全感o既人。

成功剪指甲, I am so proud of myself!!!

其實未生前都一路諗住老公幫手用奶樽餵下，只係一路諗唔掂個 logistic ，而家埋身餵都唔夠，更唔好講泵出黎用樽餵。再加上之前好頑固咁覺得補奶粉好衰，搞到跌入左一個死胡同入面。

琴日社康姑娘建議我轉為全泵、唔埋身、再加補奶粉，首要係俾我休息，所以琴日開始老公幫手餵中午o個餐，等我可以十點訓到一點。雖然只係短短三個鐘，同埋都唔會訓得好LUM (因為會聽倒佢地O係廳出面又喊又好混亂咁)，我不停同自己講「相信老公，佢會搞得掂」，訓左兩日，心情好返好多。

有關餵人奶。
政府資訊經常話餵人奶係應該根據BB需要而餵，搞到我之前係BB一喊又試下佢係咪肚餓，一喊又試下佢係咪肚餓，結果係好多次連續餵五個鐘、三個鐘，佢仍然係不停喊不停喊，搞到我崩潰，所以俾社康姑娘評估我有產後抑鬱o既風險。搞左好耐，我媽終於講得服我其實係 BB 要跟我時間表，佢話「小朋友係唔會餓死」，於是我地開始一個 3.5 小時餵一次o既時間表，未夠鐘就唔俾食。

今日下午心情同精神都 ok，所以食完奶後同小小玩一陣，之後佢訓著左，我突然間諗︰不如剪指甲啦。其實剪指甲都唔係人地講得咁難，只要趁佢訓著小心慢慢剪就 ok，剪完之後我直情喊左出黎，同老公講︰我做倒喇 ! 終於有 d 野我做倒喇 !    之前唔開心係因為我一直都唔知點先可以滿足倒 bb

 

• 餵人奶

產後抑鬱了

社康姑娘評估後認為我需要見治療師，今個禮拜應該會去見。

新生活，全家人包括我、老公同奶奶都承受好大壓力.... 我好驚。

其實半夜餵奶時可以用 ipad，但 ipad 寫唔倒 yahoo blog，我今日開始寫日記(紙筆)，記低o個日諗咩、發生咩事，希望可以舒發倒同埋俾個人清晰 d 。唔記得野o既問題好嚴重，半夜訓到好攰。我唔知我仲可以捱倒幾耐，但今日出去健康院時遇o岩樓下幼稚園返學時間，見住一個個三五歲o既小朋友行去返學，我諗︰呢件事應該唔係我想像中咁難o既~

我希望大家都好，我要加油，我會加油。

簡單寫落 blog，為記錄發生過的事。我希望成件事會好似中五考會考時咁︰做緊o個時覺得好難，望返轉頭其實都冇乜野 je

身邊好多人支持自己，媽媽們不停覆我的 whatsapp，係好重要o既實際支持同 emotional support .

生左喇, 好辛苦, handle 唔倒...

小小 JAN 2 催生，過程唔會唔記得所以唔講住

只係住左兩晚醫院，就俾人趕走左，估計原因係我同小小都評分太高，而我o既早評分係因為開到9度都冇用笑氣，而冇用o既原因係 (1) 我間產房冇 (2) 護士o係我痛緊時問我，我梗係答唔倒佢啦，佢就話我唔答佢跟住走左....   小小o既評分高，只係反應測試，好多 bb 都做得倒o既

因為只係住左兩晚醫院，趕唔切學沖涼

第一晚返屋企o既情況我已經斷片

第二晚，小小半夜痴左線咁由十二點喊到五點，中途我地不停餵奶，而佢又不停食，究竟咩事呀?!

第三晚，問左媽咪，佢話餓佢到夠鐘先好餵，中途俾水呃下佢，我本來唔想俾水，但都只有試一試，但佢就由十二點喊到五點先停倒