1月2日至4日 -- 產後房

生完之後，o係產房搞左一大輪，因為 BB 頭太大o既關係，生到我有二級撕裂，縫左好多針，簡單黎講係仲痛過生仔，我估係因為剪會陰枝止痛針已經過晒但佢仲縫緊針，佢下下拮針我都 feel 倒，你諗下o個度仲要係最敏感o既位置喎，我直情係又喊又叫拆晒天，姑娘淨係猛叫我吸笑氣，我係咁吸笑氣，隔左唔知幾耐我竟然識得叫要求打止痛針先繼續縫，醫生 check 左好耐，話要知道我之前落過咩藥，先肯幫我打針。搞左咁大輪搞到我虛脫。唔記得最後係點樣 finish，我淨係記得佢地走晒之後我係死屍咁訓o係張產床度 (個個生完都起碼要o係產房再觀察兩個鐘的)，部份原因係 d 笑氣令到我好 wing。

過左唔知幾耐，有阿姐隊個電話佢我叫我打俾屋企人報平安，咁我就打左俾我老公。但我完全聽唔清楚佢講咩，唔知係電話細聲定係我未 wing 完。又過左唔知幾耐，阿姐就話要推我上產後房喇，自己 gut 左過輪床之後，佢將我個走佬袋放埋o係我張輪床度一齊推上房。

上左房之後，我依然係好似昏迷咁訓著，下面 feel 倒 d 血係咁流，我以為係正常o既。到某個時間唔記得係阿姐問我要唔要小便定係咩事，阿姐見倒我流到成張床墊都係，跟住我竟然俾佢鬧，話我做乜係咁流血都唔出聲，又話我唔「初」肚 (即係打轉按摩肚幫助子宮收縮)，最衰係仲要加多句「你做左人阿媽o架喇」意思係怪我乜都唔做。我當時好唔開心，都冇人教過 / 叫過我要初肚同流血要出聲，點知而家要初肚同點知原來流血唔係正常 ，於是我係咁初係咁初，跟住 feel 倒有一陣血流出黎時我又即刻按鐘問佢「呢種流法係咪就係要出聲」。後來先知原來因為我有撕裂同有個血泡，所以先會流血流得咁勁，半夜再 call 左醫生黎幫我 check 個血泡有冇問題 (就係 on call 36小時 o個 d houseman 囉，超搞笑)。

到半夜三點幾，病房會叫 d 媽媽起身餵奶，阿姐就推左張輪椅黎話要我落床同帶我去厠所，我坐起身超暈，每郁一下都要停好耐等 d 血上返腦，奇蹟地呢一刻個阿姐又超有耐性，好好聲咁叫我慢慢黎，又慢慢等我，推左我去沖洗厠之後又俾時間我慢慢試下有冇得疴。我當刻勁驚傳聞話疴唔出就要插尿喉，但努力極都係得兩滴，好彩原來係冇插尿喉呢回事o既 (我諗真係超耐o個 d 先會囉)。


BB o係第二日o既 4/5 點左右由隔離病房返黎產後房，之後我就要開始埋身餵奶喇。初初會o係育嬰房由姑娘睇住餵，後來佢見你 ok 就會要你推 BB 返自己床位。我本來諗住有咩事可以去返育嬰房問姑娘，點知有一次我搞唔掂推 BB 去時，o係門口即俾人截住叫我返自己床，第二次我本來想話我觀察左好耐 bb 打震想問係咪要加衫，未到門口已經俾人截住，我唔敢問係咪要加衫，改為問係咪可以攞睡袋 (因為之前o係育嬰房見 bb 著住睡袋，但俾我拎返睡時佢已經冇左個睡袋)，又俾人話唔使跟住趕我返自己床。簡單黎講，唔好諗住聯合醫院產後房 d 姑娘會教你點做，基本上係自生自滅.... 我唔係生左個仔出黎就自動波知發生咩事同點做架.... 問下都唔得.....

呢晚(生完第二日)無端端有個姑娘話「你聽日出院喎，你知唔知」，下? 冇人同我講喎。於是第三日朝早急急去聽出院講座，先知原來學同 bb 沖涼要一日前申請，而且出院o個日係唔會沖涼，下?! QE 生o既 blogger 話佢地出院o個日 bb 會沖好涼俾返你，聯合原來唔會... 又，如果要一日前申請而且出院o個日唔會沖，即係話我一生完第二朝就要知道自己要聽出院講座同埋話要學同 bb 沖涼?! 咁你唔早 d 同我講話其實我唔可以唔第二朝就聽出院講座?!!!  好彩我之前上左陪用班已經識沖涼我先冇咁驚。

簡單黎講... 好衰咁講.... o係聯合生呢個經歷係好差 .... 除左陪我去厠所o個個突然間好有耐性o既阿姐

算喇，只係當做個紀錄， d 唔開心o既事放底佢，況且而家湊 bb 超忙超攰，不過近排小小 bb 笑容多左，有時見倒都會有融化o既感覺 ^^

 

• 生產過程