放左4日假，返緊工o既時候想放假，放假湊住個 B 又想返工，想返工唔係因為唔想痴住個 B，而係因為BB原來都知放假，一放假就亂晒，朝早第一餐唔肯起身 (其實我都好慘架.. 放假都要堅持 5.45am 起身餵奶，唔想打亂BBo既時間表)，但平時佢明明食完第一餐奶之後可以再訓到十點婆婆黎先醒，放假反而會好早八點幾就醒左o係度叫... 想訓多陣都唔得...
放左4日假，頭3日我都頂唔住要訓個晏覺，我成日都諗，究竟我平時返工係點做倒架? 第4日則係因為出左街，我都唔知係因為出左街所以唔使訓丫，定係因為已經訓夠所以出左街都冇問題。
放假o個幾日 keep 住只係泵倒3oz奶，而且 BB 又好似唔係食得好好咁，其實過去一個禮拜已經覺得 BB 好似埋身食得唔係幾好...所以放假o個幾日我真係好擔心，一來唔知 BB 發生咩事點解好似唔係好食咁，係咪我真係少左奶呢? 二來擔心成晚落黎都只係得返3OZ，咁返工點算 ?!!! 咪會唔夠食囉....已經做好要開冰奶O既心理準備....
琴晚俾蚊咬，之後一直都係睡睡醒醒咁... 起身泵奶，又係開住老公為我 download o既 畢打自己人 一邊睇一邊泵。睇呢款八點檔o既好處係剪左廣告只得20分鐘，如果開始左泵先開始播，即係睇完一集就差唔多時間。泵泵下，平時好慷慨o既左邊都有3安幾喎! 於是諗住睇下可唔可以泵倒5安半，咁就可以加埋之前o個3oz夠一餐，點知按按下，又俾我按出接近6oz喎! 即刻放心晒返工。
今日輪食12點，之前都有擔心早左成個鐘泵會唔會又少 D 呢? 點知泵下泵下，又俾我泵出六安幾!!! 開心!!! 唔通真係老公話齋放假減產? 但明明訓多左，不過就真係食少左。
返兩日工又抖下啦! 日子會漸漸漸漸好架喇! 平時返工都冇特別覺得掛住 bb，但今日有喎! 唔知係咪因為過去 4 日對多左呢 ^^
沒有留言:
張貼留言