@14month

互動

小小好鍾意離遠望住人地（其他小朋友），但當有小朋友走埋黎撩佢時，佢又會冇反應。以前都以為只係佢太細，但上星期六喺屋企樓下同一個都係14月大嘅BB相遇，當對方猛咁想摸小小時，小小只係望住人地，冇乜反應。最近睇倒陳錦鴻講佢自閉症仔仔嘅專訪，呢件事上左心，嗰刻突然諗：小小會唔會……？

差唔多時間又睇倒另一篇專題，話嗰嗰小朋兩歲“才”確診某種類近的病（我唔記得係咪自閉定其他），排政府排到五歲先到佢，已經錯過左黃金訓練/治療時間。兩歲“才確診”太遲?! 我突然有d驚。

但小小絕對係同人有互動的，雖然佢自己搣厠紙都可以搣得好開心，但當有人同佢玩d新奇嘢時，佢可以笑到好似馬叫咁勁cher到好高音，所以喺呢方面我相信其實我唔使擔心呱？

拜拜

“拜拜”係小小唯一有意識講/用嘅字詞。對佢黎講“拜拜”亦有“hi"嘅意思，所以佢朝朝都會同樓下保安員s（包括我地樓下同婆婆嗰邊）講拜拜。

“拜拜” 對小小黎講相信亦有“唔該借借”嘅意思，事源有一次喺婆婆度坐喺飯枱食飯時，小小對住企喺佢面前嘅舅父（我細佬）講拜拜，舅父每次行過佢都拜拜，如是者拜拜左幾次，我突然間領悟倒“唔通佢係話你遮住佢睇電視？因為拜拜完會唔見左，所以同你拜拜？”，於是舅父再企喺佢同電視之間，佢又“拜拜”，之後我地爆笑左 XD

行

自從一歲前後開始學行，經過兩個幾月嘅練習，而家喺屋企小小已經會自己行來行去喇。佢最鍾意跟人一齊去厠所，當然都鍾意入厨房啦，所以每當佢企圖走入厨房時婆婆就會話自己要入去厠所，引返小小離開厨房門口。

小小自從開始行得穩之後，仲非常鍾意上落樓梯。最初當然係“的”佢上級，而佢只係㩜隻腳上級，最近佢開始可以自己上樓梯，拖住佢嘅我隻手甚至唔覺得佢有喺我隻手度借力。

由於小小已經行得唔錯，所以我同爸爸已經想左好多個週末同佢再戰佐敦谷公園，可惜天氣一直都唔係幾好，又潮濕、又大霧、又毛毛雨。上星期六日終於等倒乾燥左幾日，於是星期日就去左佐敦谷公園!

一心諗住可以同小小喺草地上面喪奔，可惜小小雖然認得個公園，但就好似冇乜興趣，甚至另一個BB嘅媽媽狂向佢吹泡泡佢都冇反應……連嗰個媽媽都冇癮……到小小眼訓我地就離開公園喇。