我係一個好幸福/幸運o既大肚婆，因為咁耐以黎 :---未嘔過冇抽筋冇胃酸倒流唔算好腰背痛，係攰多 d未算腳腫，只係有一次懷懷疑腫，但過幾日冇惡化就唔記得左，而家而經冇腫了冇失眠，反而訓極都唔夠，幾時都可以再訓到而家已經滿七個月喇，好多時星期六日一朝早訓醒未食飽頂住個肚時，仲可以健步如飛touch wood 未有肚紋冇便秘，近呢一個月仲好多時一日要去兩次冇乜點要半夜起身去厠所，反而係近呢兩三個禮拜好多時會半夜醒一醒，有時幫老公 cum 完被就訓返著，有時會見醒左就去埋厠所啦咁，唔去都唔會再急醒冇乜點肥個身 (咁總有少少o既，但唔覺囉) ，前幾次去覆診時都好標準平均每星期重一磅。滿七個月後開始每日飲 2-3 杯鮮奶，希望夠俾 bb 食bb 唔粗魯，枕住都有少少郁，唔使人擔心但又唔會踢到我痛其他硬件o野就唔好多強求啦 
之前o係H&M 買左一件大肚 Tee, 係腰兩邊有摺o個種，想買好耐，因為覺得會好舒服 (好多位擺個肚)。之前返工一路都仲著緊未大肚前著緊o既 uniqlo 同 G2000 Tee (淨色用黎打底o個 D)，估唔倒真係著左咁耐，到滿左七個月，再唔著新買o既大肚返工衫好似好唔抵 (著唔倒幾多次)，而且最近出尖沙咀時o係H&M 再掃倒三件，足夠著一個禮拜，咁就開始著啦。就係第一日著新衫o既時候，下午開始不停左邊胸 / 乳頭有 d dee~dee~dee~ o既震震下o既感覺，好似件衫 kick 住咁，搞到我成日係咁抹件衫，以為係件衫同個 bra 之間有靜電。點知返到屋企大解放淨係著住一件 tee 時，點解仲有o個種 dee~dee~dee~ o既感覺o既 ?!! 諗起我成日同老公講 「小小夠七個月o架喇，佢要出黎隨時可以出黎o架喇」﹐我不禁諗，唔通o個 d 係 d 奶通過緊 d 乳腺o既感覺 ?!!! 我真係覺得自己好變態， hahahahahahahaah 
之但係咁喎，o個種 dee~dee~ o既感覺由o個日開始基本係冇停過，佢未至於不停咁 dee，但係每日都總有幾次俾我 aware 倒佢o係度 dee 緊。好驚呀... 乳頭都開始冇以前咁 even，開始好似會有 d 窿咁.... 生活發生翻天覆地變化o既日子越黎越近啦.....
今日係踏入懷孕後期第一次再去照超聲波，睇住醫生寫我張病歷咭先知原來同對上一次照超聲波已經相隔差唔多兩個月 (上一次己經係8月29日)。今日遲到左好多，之前都係遲兩三個字 only，今日再遲多左之餘.... 仲要診所唔知點解竟然o係預約時間前10分鐘已經打黎問「你去到邊呀? 如果己經到左，可以早D 上黎喎」，點知我係比預約時間仲遲左超過半個鐘先到囉，診所再打左兩次電話黎問我係咪黎緊....我即刻勁擔心，驚醫生不滿........之前有睇其他人講過，話 BB 越黎越大，超聲波一次過照唔晒。今日見倒真係呀 
，淨係見倒個頭，其他乜都認唔倒。不過我諗都有好 significant o既部份係醫生都冇乜心機幫我照.....因為我真係遲左太多喇....可能搞到佢好肚餓仲未有時間食野呢 :P 不過佢都好PRO，好似冇事咁.... 希望只係我諗太多啦。總之今次o既照聲波好快照完喇，不過其實重點只係想知道小小大得夠唔夠 je，因為一來小小比計算成長週數細一週 (我成日再三強調呢一點，因為我真係知道我排卵期係遲左一個禮拜，而且因為排左期照 X 光o既關係，由last m date 到三個禮拜之間根本就冇做過)，二來我成日驚我食有益o既食物食得唔夠，而且我次次磅重都好標準咁真係只係一個禮拜重一磅，所以我都會驚我食得唔夠俾小小。而家每日最少早餐一杯鮮奶，多o既可以飲倒午餐一杯下午茶再一杯 (我係飲普通奶，即係全脂的)。今日計數係 30wk5d，小小度數係29wk4-6d，即係我冇食太多亦睇唔夠啦 ^u^，而且仲可以繼續飲全脂奶 (公司 d skimmed milk 我飲完會有輕微疴...)。btw, 一路都係飲公司 d 維記奶，最近飲多左奶有自己o係出面買其他牌子o既奶，先發現原來維記真係好味 d 架喎，唔知係甜定係咩味呢? 不過我都冇深究。
望左咁多個月，終於望倒滿七個月，正式進入懷孕後期，新o既擔心情緒立即出現 :---個肚大左好多 好多，擔心好快會出現肚紋bb 已經發展好，應該只差儲多 d 肉同多 d 脂肪去迎接冬天 -- 但你仍然唔知佢會唔會突然間因乜野不可知o既原因唔想出黎，突然開始唔郁 ...我試過有個諗法浮出黎係 : 如果 bb 真係唔想出黎 (touch wood)，政府醫院會唔會俾我開刀 ? 定係一定要試順產 ?bb 野乜都未準備，驚買唔切但又驚太早買定，會唔會 (touch wood) 用唔著 ?星期日已經買左 bb 床喇 
29 號就會送黎屋企
上個禮拜三返健康院覆診時，仲講緊話乜事都冇，又冇腳腫。之後o個幾日沖涼時發現「呀點解呢兩日小腿好似粗左」，之後就發現原來開始腳腫添 !!!! 由o個時開始，我成日將對腳擰來擰去研究，死唔信邪竟然腳腫，係咁o係度回想我隻腳眼係咪不嬲都係呢個樣定係真係腫左呢?
之前返工一路都好忙，成日要走來走去。呢個禮拜返工覺得好攰，個肚 over the weekend 又大左好多，所以行動就緩慢左。返到星期二已經好想呢個禮拜快 d 完 (今日先星期四 ja .....)，次次起身都要 gum 住張先起倒咁濟.... 希望唔好真係腫到好似上網見倒 d 人咁啦.....
大左肚，梗係盡量都唔食藥啦，但其實身邊有好多野都係 drug 來的，其實大左肚之後又避得幾多呢 ?
自從有左以黎，試過一次感冒一次傷風，其他病痛 touch wood 托賴。感冒o個次唔記得係咩感覺，可能都係頭痛呀攰呀o個 d 啦，咁就臨放工去睇醫生攞 d 意見啦，點知醫生即刻開左兩日假俾我，佢話首先黎講係自己休息先啦，咁 panadol 呀o個 d 都開左俾我先，但可以唔食就盡量唔好食，「而家開俾你 d 藥都係安全o既，不過可以唔食就盡量唔好食啦，最緊要休息多 d ，咁我寫兩日假俾你啦」，於是o個次我就o係屋企訓左兩日，好返晒 (其實就算唔係有左唔好食藥，平時感冒如果你肯o係屋企訓兩日確實係會好的)
傷風，係只係前一排 (可能一個至個半用前)，星期日晚已經狂打 hachi，星期一起身發覺自己應該真係傷風喇，諗住返去做左趕急o既野之後就去睇醫生攞 sick leave 啦，點知一做又唔停，拖左兩日竟然好返 (平時我傷風係唔睇醫生唔會斷尾的)
又前一排，眼痕，醫生開眼藥水時都話「呢隻只係人工淚水，都安全o既，你滴o個時可以練住個鼻樑，等佢唔好流落去，咁就更加冇影響喇」，自從有左之後，我都幾鍾意呢個醫生，因為佢會話俾你聽「呢個都係安全o既，但可以o既都盡量唔好食」，我覺得最緊要係佢都主張唔好食藥，所以佢講得安全o既野顯得更加信得過。反而樓下個醫生呢，我去睇胃痛o個次佢會照開藥，好似咩事都冇咁，我都懷疑左好耐佢有冇聽倒我話我大左肚 ..... 當然o個 d 藥我都冇食，只係想攞張假紙 only 
再近 d 黎到上個禮拜，因為隻腳有 d 痕，又去睇下醫生啦 (反正公司包，唔使錢)，醫生都話「唔嚴重就唔好理佢住啦，始終都係藥」，咁我又好開心咁「好 arc」應左佢，佢又好開心咁o係我份病歷上寫 "no drug"。呢個醫生每次都會問我第幾週，今次問完後佢仲補左一句「咦趕得切係龍 b 喎」好似好開心咁 (大家都戴住口罩，所以 cannot tell 係咪真係開心啦 hahahaa)。其實就算搽藥都係好似蚊咬咁o既範圍，佢話唔搽住就唔搽住囉
以往用開 cheap cheap watson's 自家品牌洗面同搽面，用 johnson baby lotion 搽身都只不過係貪佢平 (廿幾蚊一大支可以用好耐) ，有左之後，我買左支 simple o既 facial lotion 同試新o既 neutrogena 西柚洗面啫喱，只不過係感覺上好 d。又，前一排涼 d o既時候有想過停止汗劑，但汗味呢樣野真係自己唔會知，停左兩日之後都係擔心最終都係再用返。有左之後，冇醫生話我有需要食補充品 (例如維他命呀、鐵呀o個 d)，但我平時明明有輕微貧血喎，於是我又自己飲康鈣 C (佢包裝上話 "Replenish Calcium and Vitamin C during pregnancy" 咁我諗係 ok o既)，其實呢 d 全部都係 drugs
琴日睇左一個 blog，個孕媽媽滴左一 d 話唔建議懷孕婦初期用o既眼藥水，佢睇o既幾個醫生o既意見差好遠，首先當然係佢自己好擔心啦，咁就問個醫院婦產科醫生係咪己經影響倒個 bb (其時只係o岩o岩發現有左) ，醫院婦產科醫生雖然已經搵晒書話俾佢地知其實係好 low risk，但因為佢地又堅持又喊晒o既關係，就話可以寫紙 refer 佢人工流產；refer 呢個醫生同佢講，滴眼藥水要好轉折先去得倒個 bb 度，而且只係幾日，俾你日日狂滴都只係好少量，話如果佢地堅持都可以但叫佢考慮多兩日啦；佢再睇另一個由屋企人介紹o既婦產科，呢個醫生又話「冇事，我平時都開呢隻藥俾我其他客」，黎到呢度佢地先安心，決定繼續要個 bb。bb 而家已經一歲喇，睇黎係一個健康o既 bb。
btw, 呢個好擔心o既媽係話連康鈣 C 都唔應該食，話佢都算係藥。
懷孕媽媽要驚o既話真係好多野要驚，但我覺得其實真係驚唔倒咁多。知道o既咪避免下囉，唔知o既，咪菚嚇親自己。我都有食月餅，最初仲食左一個咸蛋 mix 左o係奶黃入面，之後我睇清楚個成份，omg 有咸蛋黃，有個 friend 問我「乜唔食得咸黃咩?」我話「咁如果鵝鴨都唔食，佢 d 蛋我諗都唔好食啦」，但我依然都有食少少月餅，挑左個黃先食囉，總唔能夠屋企咁多月餅一個都唔幫手食。止汗劑，都要搽架啦.... 雖然日日搽..... 蚊香機.... o岩o岩有左時o既天氣日日都要開... 都擔心架.... 開門開窗囉.... 係到後來夠熱開冷氣先唔使開蚊香機.... 。我覺得，有 d 野，做左就係做左，唔好太擔心，太擔心反而增加自己負擔。
