扭眼訓

最近呢個禮拜小小有好重大嘅進步，會喊到好似講緊野咁，confirm係扭眼訓。最初佢無端端癲左咁喊，好驚唔知佢係咪唔舒服，因為有一晚好熱嘅時候佢真係喊到要除淨件底衫再坐喺風扇前面先肯收聲，但近呢幾晚佢晚晚都喊，唔知點解突然會扭眼訓。

其實可能一直都有扭，只不過以前係BB喊聲所有冇咁明顯，而且呢幾日係一聽到佢呢種一邊講一邊喊嘅聲，拍一陣就訓著，雖然有時放返落床又會醒返再叫過，但暗一陣又會訓返。

今日我喺度諗，呢個扭眼訓嘅階段會有幾長呢？幾大嘅小朋友先會自己眼訓就訓呢？因為諗起人人都話訓練BB自行入睡係想BB訓多D，如果我覺得BB已經算肯訓係咪唔使咁樣try佢呢？

~ ~ ~

因為今個假期咁長嘅關係，今朝我決定訓晏D先泵奶。小小七點半先醒（平時返工係六點半叫醒食，但琴晚佢夜左訓，唔使返工就唔特登叫醒佢啦），食完我就放低佢出廳泵奶，點知泵得3oz... 下午老公餵左一餐，儲多左陣先泵，點知又係得3oz.... 死啦... 發生咩事?....

 

• 2m

小小滿左兩個半月喇 ^^

其實好想 post 多 d 相，等個 blog 靚 d，但我個手機唔可以直接連電腦攞相，要用手機上網 send 去 email 再o係電腦用 email save 落機.... 好複雜....

我們的小小 BB，今朝映的  (心甜) 2013 March 23



小小o岩o岩出世時 :  2013 Jan 16

驟眼睇好似冇乜點變，但其實大個左好多，以前o個頭只佔紗巾好少位置，而家條紗巾真係好似係佢個枕頭咁o既比例。前一張畫面只係 capture 到紗巾邊，今朝呢張係 capture 到床邊。

初初生出 bb 時，拿手唔成勢，樣樣都唔掂，好辛苦，成日覺得小小好似係咪唔乖、唔肯訓，而家上晒手，理解其實小小係好乖好乖，食完奶就算唔係即刻訓都唔係好扭，成日都要人陪佢但係以講野同笑黎要求，唔多係用喊。 touch wood 夜晚訓得好好，俾媽媽我有覺好訓 (當然有時係爸爸抱左佢出廳俾我訓)。

初返工頭兩個禮拜都係 5.45am 先食奶再泵奶，o岩o岩過去呢個禮拜 (返工第3個禮拜) 轉為先泵後食，結論係佢又訓多左半個鐘，好乖。而家我直情起身就唔理佢出廳泵奶，泵完先施施然返房，通常佢都已經郁郁地，咁我就安心叫醒佢，唔使再猶豫唔忍心摷醒佢食奶。初初我放工返去佢仲要食兩餐先訓，最近有時會食一餐十點半左右就訓左，個個都話訓覺先會長肉同長腦，所以佢肯訓等於我有得抖好開心之餘，肯訓係對佢好呢點我更開心。

日頭o係婆婆度都好訓得，婆婆對佢好有規律，食奶沖涼訓覺都係咁上下時間，當然有時都會扭計，搞到婆婆冇得好好食晚飯要我返到去過手先可以坐低食晚飯，所以我都會過意唔去，好似搞到自己阿媽連飯都冇得食咁。

 

• 2m

屋企雪櫃唔夠凍，公司又攞唔倒冰

過去一個禮拜真係忙到嘔，因為 part 我個同事要清假喇，所以我放完產假返去佢就要放下大假，人地一年有 18 日假o架，久唔久 mit 一個禮拜都可以 mit 好多次。

琴日同前日都收唔倒工 (星期四五)，要 call 老公出黎電單車我返去。琴晚返到去時小小已經咬濕晒成條紗巾。

之前一路都將泵左o既奶放o係我媽咪o個邊，因為佢個雪櫃夠凍 (可以到去 2度)，但我屋企個雪櫃校極都低唔過 7度，點知有日媽咪同我講個雪櫃唔凍，枝探針顥示去到成十幾度，連醃緊o既雞翼都開始想變要快 d 焗熟先再雪返，於是我地又匆匆忙忙將雪奶拎返o黎呢邊屋企，7度都總好過十幾度。琴日又諗起呢件事時，突然聯想倒邪零地媽咪未發現佢雪櫃唔凍o個朝早，我俾經理話我好朝朝早去攞佢地 d 冰 (我一直係用冰座住 d 奶，放工再連冰座住支奶用飯壺拎返屋企)，就係同一日媽咪話我知雪櫃去到十幾度)。

俾人話o個日好徬徨，諗左成日，諗之後要點算，但一路徬徨緊o既時候，心裡面唔知點解竟然有一個諗法係「越阻我 / 越難咩?! 我越要做 (繼續泵奶)」。我以為自己會放棄，正如我未返工 / 初初返工時已經有少少打定輸數，諗住「泵唔倒 (唔係我冇貨o個種泵唔倒，係運作唔倒o個種) 就算啦，日頭唯有倒左佢 or 自己飲，一早一晚先埋身餵」，泵左個幾兩個禮拜越行越順時，上天俾我一個咁o既考驗。不過我承認因為我好怕唔夠凍，所以都真係攞左佢幾多冰。之後我o係食 lunch o既時候拎埋飯壺o係 canteen 飲品櫃攞兩殼冰，然後直接連奶隊落飯壺扭好蓋，原來都可以捱到返到屋企9點 !!! 個天有開條路俾我行 !! 同埋之前自己太擔心覺得要好多冰先夠凍，其實我媽咪俾我呢個玻璃膽飯壺真係好夠勁 !!

冇凍雪櫃呢幾日，飲左幾日新鮮奶。之前都幾夠貨，所以有時如果鮮奶 buffer 足夠的話，朝早返工前泵o個一次奶會直接入袋冰左佢，呢幾日唔敢雪 buffer (因為唔夠凍，唔想放太耐)，餐餐清，朝早o個轉由以前睇住3安收手 (唔敢泵太多因為泵完要即刻埋身俾小小 BB 食早餐，泵太多驚回唔切奶，佢食耐左我就趕唔切車)，到呢幾朝要睇住有4安半5安夠一餐先可以停，然後夜市o個轉又要睇住中午泵倒幾多，夾埋中午泵o個轉夠兩餐先可以收手 (小小 BB o係我返左工期間要食3餐)。但係咁樣日日清其實都有個好處，一來好有目標 (我個人係要好有短期目標先得，但長期目標我就冇喇:P )，二來三餐都直接泵落樽原來洗少好多野 (之前早上會泵落杯，因為少)。

媽咪今日會清左雪櫃、熄電制，雪櫃好返之後，我諗我都會繼續而家咁樣泵，咁就日日都有足夠奶、唔使日日諗住要幾多。o係公司方面，既然只用飯壺都 work 我就唔再諗其他野喇，到第時 D 貨多到一個樽裝唔晒先再諗啦。

呢兩日我估因為太忙所以中午奶量少左，得5安幾，希望下個星期 partner 返工冇咁忙可以上返 6-7安啦 

 

• 餵人奶

富媽媽 BB 百日宴

富媽媽日前搞左百日宴，o個日先係我第一次見到富媽媽個 BB。

最初想寫窮媽媽富媽媽並唔知原來「窮媽媽富媽媽」同時係形容人奶奶量，只係想 compare 我地點 handle 我地生仔呢件事，但結果由於大家大肚o個排冇乜 gathering 傾偈o既關係，最終冇得倒太多富媽媽o既情報去寫呢個 topic。

富媽媽除左本身有D錢之外，生左之後原來連奶o個方面都好富，當我都開始泵奶時，佢會推介佢租左o個套泵俾我，話佢用o個套泵一o黎就可以泵出 10oz，堅決要拎黎借我用 (o個時姑娘叫我泵奶俾自己有多 d 時間可以休息)。前o個日去百日宴見倒佢個女， OMG 全人奶都肥到好似食奶粉咁，我覺得好得人驚。雖然姑娘話醫生見倒 BB 過肥時如果媽媽話係餵人奶就唔會叫佢減肥，因為人奶主要係不飽和脂肪，冇咁傷，但食人奶都食到奶粉咁肥，我自己就有 D 保留喇，o個晚我不停o係度諗，會唔會係富媽媽富得濟，而平日返工又餵樽，BB 肯食又以為要再食多，加加下就加得多得濟呢? 不過人地全家都覺得冇問題就冇問題啦。

再望返自己個女，我地平時成日都話小小係肥妹仔，因為佢大脾有尿片痕，想轉太 d 碼條腰又唔夠，雖然佢試過拍埋個奶粉 b 度 size 差好多，個我只會將佢同自己比。見完富 BB o個晚，老公即刻同小小講「好啦，以後唔叫你做肥妹啦」

• 富媽媽

快樂的乳牛

所有人都叫泵奶o既媽媽要放鬆同保持愉快心情，我相信除左閒閒地泵10oz o既富媽們之外，好難真係一開始就放鬆同愉快。又，足夠休息好重要，又係，雖自己都識得講「bb 訓就訓」，但其實 bb 好多時都好快就醒，一係就有好多其他野要做。

我媽成日都覺得餵奶同泵奶係好容易。由於我只係得 lunch time 可以泵奶，所以放工時正常都會谷 (初初幾日真係會谷到痛，過左一個禮拜之後就冇 lu....)，luncht time 泵奶到接近 2pm，返到我媽屋企最快都要 8pm，已經過左6個鐘，真係望佢谷好過唔谷。琴晚難得有谷o既感覺，餵完一邊唔夠飽，另一邊都仲食左少少，但都依然谷，其實好想即刻返自己屋企泵奶 (因為仲有一餐宵夜要餵，太遲泵都驚回唔，同埋抖下，但我媽會問我︰「唔睇埋(電視劇)先走?」，其實我真係好眼訓，好想快 d 沖個涼，咁餵埋宵夜就可以即刻訓。

我老公都會，星期六特登開電視俾我睇。我明白佢其實係好想我可以 relax 下，佢話「我知睇電視而家係次要」，我話「唔止次要，睇電視而家對我黎講係 luxury」講完去左洗泵。我覺得自己有時真係好自私，淨係想訓覺同泵奶，好似冇理到身邊o既人o既感受。老公好多時會特登 set 部 iPad o係床 駁 myTV 直播俾我餵住奶睇，其實我都仲係好想睇電視的，只係唔係餵緊奶又唔係要抱住佢o既時間，我就會覺得有好多其他野等緊我做，洗奶樽/泵啦，洗衫啦，自己去厠所/訓覺啦，等等等等等。我好怕忽略左我老公。

老公久唔久會話當我係一隻乳牛。琴日上午我 sms 佢話我好眼訓，我地傾左一陣電話。傾完之後，佢話希望我一陣間 (lunch time) 開開心心咁泵倒 7oz 啦。佢話佢唔係介意我泵倒幾多，佢驚我太堅持會俾太大壓力自己 (典型山羊座)，我話我泵奶時鍊胸可以鍊多成 oz，但已經鍊到手指關節痛，可能好快就要放棄泵奶，佢於是話以後唔准鍊；但有一次 lunch time 我死按爛按按出 7oz o個次，我即刻打電話俾佢，同佢講「我知你唔想我整親，但我想同你講，如果泵倒好多其實我係好開心的，我會就住唔會整親自己」。老公話，佢話當我係乳牛，係因為我會因為泵倒多而開心，o個刻我好感動，雖然佢成日話阿女唔鍾意佢，雖然佢好多時會好不知所措唔知點樣先可以幫倒我，但佢好關心我係咪開心，所以我要做一隻快樂的乳牛，希望老公都可以有同bb親密o既時間。

• 餵人奶

兩個月打針

上星期三去健康院打兩個月大o既兩枝針，打乜我就真係唔記得喇，連臨打之前姑娘要我 reconfirm 我都講唔出，姑娘唔耐煩就話「等我黎喇」然後隊住張針咭o係我面前要我睇我地係咪o個個名，同埋指住個表話「嗱今日打 xxx 針」，算係同我 confirm 左 

上次打一個月針時，小小基本係冇太大反應，只係一打o個下叫左一聲，之後又好似冇事發生過咁，第二日係扭過下計，我地就入左打針數。

今日有上次經驗，好快咁就捉住佢大脾仔脾姑娘打針，又係o係打o個陣大叫左一下，以為真係咁好佢唔怕打針啦，點知調轉佢個人俾另一隻大脾姑娘打針時，姑娘話「嗱呢枝針好痛架，佢會喊得好大聲架」，當刻我都冇印象有冇睇倒佢枝針，反而係姑娘講左一句「媽媽唔好驚」，我當時仲心諗「 ?_? 點解媽媽驚?」，後來我媽講返我知原來o個枝針勁長。小小一打o個枝針真係大喊，而且喊左好耐好耐，姑娘話o係出面等15分鐘冇事可以走，我唔記得佢係咪好似一直都冇停過。之後我媽抱住佢，我就落左樓下攞退燒藥，我記得我返上去健康院時佢好似已經冇喊仲訓左。

呢晚佢食左傍晚6點o個次奶之後就冇醒過，一直訓，訓到第二朝五點先醒，之後呢日佢都有熱熱地，似有燒，但我媽話佢食人奶就唔使食退燒藥啦，我都讚成就冇俾退燒藥佢食。

我返左工，小小係咪真係有病樣定係有冇扭計我都唔知，但星期六日我湊返就見倒佢好奇怪喇。平時返工都見佢唔係好願醒，都要我特登叫醒佢食奶 (所以先會產生唔忍心叫醒佢食奶o既矛盾心情)，但呢兩日當我諗住「好啦，俾你訓多陣啦」5.45am 鬧鐘响左我就去定厠所，跟住繼續訓o係床度聽下佢幾時會醒，點知佢兩朝都好準時咁 6.15am 就醒左喇，仲要係醒晒嗌奶咁醒。而最奇怪o既係，平時我返工佢都係九點幾先醒晒，十點幾先叫食奶，但星期六日呢兩日佢八點幾就叫，仲要係喊住要即刻食o個隻，結果琴日感覺上食左好多餐奶 : 06 / 08 / 1030 / 1230 / 15 / 19 / 2230 其實係上午食左好多，但又唔覺得佢食得好狼，唔知咩事.....

今朝星期一，我蒸定一個奶樽 (平時係老公起身先蒸)，預備如果佢又早左喊o既話老公就算未起身都可以即刻有樽餵，結果老公話佢今朝又正常返 .... 咁都好 .... 我地話唔知佢係咪真係知道媽媽放假可以任食。又不過咁，之前因為過左一晚朝早會谷，所以6點只餵一邊，但我驚佢前兩日就係因為我開始朝早唔谷，佢唔夠唔飽所以早左叫? 今朝開始餵兩邊，不過我餵之前都係睇住泵夠 3oz 先停。

 

• 2m, 
• 健康院, 
• 打針, 
• 餵人奶

放完產假返工的日子

返工踏入第二個禮拜，雖然成日話 「BB 兩個月大囉」，但當諗兩個月其實只係8個禮拜，又不過，而家望返小小個樣，會隔日就覺得佢唔同左樣。近兩日老公開始o係抱住佢o既時候話「好重」，我話唔係 BB 重左，係佢太攰喇開始冇力。

今日返工第5日。泵左5日奶，已經開始漸漸習慣同埋知道自己做乜。平時都係o係屋企泵，個泵永遠都係洗過，然後o係泵之前蒸，蒸之前同泵之前都洗手，樣樣都跟足理論盡量做得乾淨。返工o既日子，出門口之前蒸泵，跟住蓋好蓋入落膠袋拎返公司 (我甚至唔係用密實袋，只係用食物袋)。之前成日諗唔掂o係邊度泵，諗住返左工就問下隔離 dept 秘書可唔可以借佢地個 store room，仲唔敢第一日問，諗住第二日先問，點知反而係秘書知我餵人奶而主動 offer 借 store room 俾我泵奶，超感動!! 反而自己部門就驚驚青青又話要問過老細先。store room 就o係厠所對面，洗完手就攞住張抹手紙行過去開門，此時已經係諗「小小都已經兩個月啦，而且一直全人奶，可以唔使最乾淨都唔怕啦」，叫做叫自己唔好太擔心啦。

繼返工第2日倒瀉奶之後，琴日 lunch time 死按爛按個胸俾我按出 7oz!!!!! 超興奮!!!! 但今日個胸有少少怨....唔知係開始塞定係琴日按得太勁，但其實初初兩日係可以泵到個胸林晒空晒架.. 我成日驚會塞 or 泵唔清.. 今日已經有林o既手感，但得 5oz，唯有叫自己「算啦，有幾多食幾多囉」，其實一開始泵奶準備返工時，已經做緊心理準備唔夠食就要食奶粉。

關於食奶粉，我知道好多人都好堅持俾BB全人奶，好努力咁甚至半夜起身泵，但我真係做唔倒..... 如果返工時間可以俾我泵多一次，我絶對會跟理論每4個鐘泵一次，咁應該可以 keep 倒好似 BB 埋身食咁，每次有 4oz 都會夠拎返屋企，但現實係返工超忙，泵奶時係咁按係咁按某程度上係想出快 d 、快 d 泵完去食飯 or 返去做野，因為 d 野做唔晒都係走唔倒... 而家每日日程係︰

5:45am 
鬧鐘响, 起身去厠所 / 飲水 / 開機蒸泵，返入房睇下小小有冇反應，係咪訓得好冧
(1) 如果佢醒醒地，就慢慢搞下佢睇下會唔會醒晒，醒晒就食奶 --> 食完放低落床同佢講拜拜 --> 出廳泵奶 --> 泵完再蒸泵 --> 蒸泵期間洗面刷牙換衫 --> 泵蒸好就 pack，跟住出門口，7:20am 上巴士
(2) 如果小小訓得好冧 (今朝就係咁喇)，就刷牙洗面，等個泵蒸好就泵奶，泵到 3oz 就停，再蒸泵預備帶返公司，今朝好好彩返入房時小小已經醒醒地，就整佢醒 d，食奶，放返落床講拜拜，換衫，pack 泵，出門口都仲趕得切搭 7:20am 巴士

8:00am 返到公司早餐
8:15am~8:20am 開工
12:45pm/1pm   泵奶
6:50pm   盡量都希望自己收倒工
7:00pm-8:00pm    巴士
8:00pm-8:30/45pm  蒸泵，泵奶
8:45-9:00pm   過媽咪度接返小小，有時o係o個邊餵奶，有時返屋企先餵
10pm   沖涼，之後再餵多餐
    通常12點前有得訓

我都知同好多人奶媽相比我已經訓好多，因為我半夜有五小時睡眠，但我真係好眼訓，而且返工真係好忙.... 有時o係好眼訓時會閃一閃想放棄餵人奶o既念頭，我冇好似其他人奶媽形容咁要帶好多 gear 返工，但亦冇某 d 富媽媽咁閒閒地都夠食，我每次泵奶都好緊張泵倒幾多出黎，因為泵唔倒就唔夠食.... 真係唔知仲可以堅持倒幾耐.... 雖然而家我會諗「餵倒六個月己經好成功，到時就可以收工喇」咁，但我諗如果我搞得掂六個月o既話，繼續落去應該都唔會太難。我我老公都已經預左會有一兩餐要食奶粉，就算最後泵出黎o既份量只夠一餐，我希望我都可以堅持得倒，然後如果早餐都唔使餵o既時候，我依然希望夜晚可以餵 (又或者調轉，早餐餵，夜晚收唔倒工就唔餵)

加油 !!!!

 

• 餵人奶