六個半月

經過左一個禮拜，小小似乎學識左食奶係唔可以咬，由我好小心 / 心慌咁睇住佢食奶，諗住一見佢個咀型轉想咬就拎開佢，到 weekend 呢兩日發覺佢似乎冇打算再咬啦喎，仲好幾次都好好咁食晒兩邊，我同老公講，佢好似知道左啦喎，但我諗我老公一路都聽唔倒，冇應到我。

星期六去 uniqlo 買bb衫，因為想搵褲搵好耐都搵唔到o岩o既，雖然屋企有好多人地送o既 pat pat 褲，但小小需要o既係可以遮倒小腿唔好俾佢 R 損o既褲，後來見人地大bb著o係 uniqlo 買o既 legging，我望住個大bb同老公講「可以買 legging 喎，大個都仲著得」(legging 可以貼住隻腳，唔會好似 pat pat 褲咁可以俾佢 wear 晒上去現出小腿)

bb legging 賣淨黑色同灰色，於是減價$19一條，我地買左兩條灰色。其實有得揀o既話唔想要深色，因為污糟左唔知，但而家功能大於一切，有灰色已經好好。再買左件唔包腳o既夾衣試試，開左袋之後摸來摸去始終 marks & spencer 質料最好，但 marks & spencer 好少開胸衫，生之前買黎諗住而家呢個天氣著o既短袖 lup 頭衫婆婆唔肯同小小著 (因為小小未可以自己坐穩)，搞到要撲來撲去搵大件而又開胸o既衫 (因為開胸衫多數得初生碼... 大個d o既都係lup頭....)

著白色底衫o既bb 好得意


星期日晚突約 (即係突然約到) 租叔叔晚飯。租叔叔最初話「keep 住見喎」因為佢想同小小做朋友，唔想好似另一個bb (柔柔) 咁幾個月冇見直情見到就喊，佢話o個次柔柔爸媽直情要輪流同個女行開，大家先食完o個餐飯。成餐飯我地將小小放左過去租叔叔o個邊好幾次，佢次次都係一落手冇事，但過得兩三分鐘就開始面有難色，老公次次都等到佢喊先攞返，到最後一次我留意住佢情緒係點發展，其實佢面有難色o既時候已經有伸手o既動佢，過多一陣見佢係真係好想返過黎我地度時，我同老公講「抱返佢啦，唔好等佢喊先抱返喇」，抱返過黎佢又開心返，又要撩人玩。

怕生之後搭車時我同老公講，我覺得唔好等到佢真係喊先抱，唔好令到佢覺得去左人地手甘就要喊先會可以返爸爸媽媽度，老公話「但係我地抱返佢又想玩喎」﹐我話「咁係好事，起碼佢知道我地抱住就安全佢可以向外面玩，好過有 d bb 直情唔肯同外面玩」。以上係我自己o既邏輯推論。

小小而家已經有好明顯伸手要我抱o既動作，我諗已經開始左兩三個禮拜，佢唔會伸手要另一個人抱，但當你伸手抱佢時，佢會伸手，其實見倒咁樣係好開心的，因為見倒佢有好明顯o既回應。我想我可以同佢傾多D偈，但唔知講咩好，hahahahahah

而家放小小坐，佢會坐倒好耐，仲成日親吻大地 (成個上身向前烏晒落去)，都唔知係佢自己想咁 pose 定係唔夠力，企都企倒好耐，又開始拍枱，但我仲係日日都覺得好攰.... 我幾時先會可以正常生活同埋同小小玩耐 d 呀.....

我隻牙仔呀 ^^

 

 

• 6m, 
• 出牙, 
• 餵人奶

6個月介人奶?

琴日一家三口出席飯局，席上總共5個 BB，兩大 (22m) 三細 (6m)，我地第一批到，六點，一坐低就先餵奶 (平時小小五點食奶，佢又好乖咁冇嘈到)，然後另一個拖住一大一細B o既 family 第二批到，一黎到見我搭住條餵奶巾就問「仲未介咩? 六個月啦喎」，我當堂愕左一愕，冇諗到佢會咁講，因為滿月時我地去佢屋企，又係同佢個滿月 BB 差唔多時間需要食奶，佢借間房我餵奶之餘仲幫我 set 晒靠背椅同凳仔，非常清楚餵人奶要 set d 乜，佢老婆則係跟私家醫院方法，每餐先餵少少人奶再補粉的，當時我老公仲話佢 comment 自己老婆唔餵人奶係懶，我當時仲話「咁又唔可以用懶黎 conclude 呢件事o既，每個人有唔同o既選擇je」。

原來，連支持母乳餵哺奈何老婆唔想全人奶o既爸爸都會有呢個誤會，認為6個月應該介人奶。

另一細 B 一家三口到時，我都仲餵緊奶，我唔知佢地知唔知我餵緊奶，但就唔見佢地有特別留意倒我 or 有持別反應。

另一大 B 一家三口到時，個爸爸仲問我「BB呢? 訓緊覺?」，個媽媽即刻甜笑咁話「餵緊奶呀，唔知就唔好問啦」，一副怪責但甜o既語氣。

呢日小小冇 proper 咁訓晏覺，快叉左好幾次，而且o係晚飯地方食奶時又係因為咬我所以唔俾食，老公又好緊張咁即係拎走佢，唔知係咪因為呢幾個原因，好耐冇嘔奶o既小小竟然即刻嘔奶，仲幾大啖.... 老公好明顯因為太耐唔使 handle 嘔奶所以有 d 唔知點算好..... 我更擔心o既係，小小係浪得太緊要又唔夠訓所以嘔奶丫，定係因為我鬧佢特登嘔俾我睇呢？

之後佢訓左成個鐘。隔離爸爸 (即係有大細B o個個) 不停問我隻手要唔要俾野浪住 (因為我抱住小小訓，我地冇 bb 車的)，同時佢地不停討論佢地兩個只係遲小小幾日出世o既男 BB 廿磅有幾重，o個刻我好覺得「14磅都幾好丫，小小係錫住我地」

又離左題。我係想講，小小醒左之後心情唔太靚，估計都係差唔多時開要肚餓 (因為中午食得唔多，下午又嘔左)，但我唔想o係餐廳繼續餵，因為唔想俾在座覺得人奶 B 要食好多餐 (因為在場冇BB要食奶，如果唯獨我要食就好 odd)，再加上差唔多要交返張枱俾人，於是就出左去睇下有冇地方餵奶，咁佢地隨時埋單散都得。

原來荃新天地有好 decent o既餵奶房，我o係一樓仲有兩間，o係換片位再入去，單獨房仲有得 lock, very good, 不過略為暗左少少，又唔知點解，小小食兩啖就望黎望去唔再食喇，於是又拿拿林走返出去會合大家 say bye~

呢晚返到去，都係正常食返10點o個餐，但都係食得唔多，我泵出黎都仲泵倒 2oz，我放左枝奶o係度驚佢唔願訓又要食，結果佢都係12點前訓左，訓到今朝正常醒咁啦。

流水帳，完 ^^

 

• 6m, 
• 餵人奶

牙仔

最近小小開始會咬我，其實我一路都預左會有呢一日，只係冇諗過到真係發生時會係咁大衝擊。之前都只係好久唔久咬一下，當時會同佢講「喂，痛架」，近呢一個禮拜可以話係餐餐咬，於是由以往o既「食到唔食即係飽」到而家「一咬就唔俾食」，於是好多時係只食左一邊就冇得再食，就係咁，問題黎喇︰
- 以前不嬲都食開兩邊，而家一餐得返一邊
- o岩o岩o既星期二返健康院，4至6個月之間只係重左唔夠2磅 (5.7 -> 6.4)，生長線由 25跌至10，雖然姑娘冇講 (即係佢冇話有問題)，但我有 concern
- 小小 d 片係比較少，有時仲閒倒 "壓" 味...
- 便便有時隔日先有，不過呢個我反而覺得唔算大問題
- 之前婆婆唔係俾太多糊仔，我同佢講，話健康院姑娘話目標一餐糊仔，估唔倒婆婆即刻 switch，糊仔o個餐冇補奶，又唔覺有俾水 (同日好 feel 倒晚上返到黎屋企條片有"壓"味)

星期五晚，放工o係婆婆度 8點o個餐奶小小已經咬我，我好認真樣同佢講「唔好」，佢又係回o個個好開心o既笑容俾我，究竟佢係以為我同佢玩丫，定係覺得咬我好好玩呢？我真係好驚。返到屋企10點o個餐奶，佢又咬我，又係同佢講唔好，佢又係笑，當時我直情o係房喊左出黎，同小小講「唔咬得架，你已經食唔夠奶飲唔夠水喇，咁點算呀.....」，而且對於佢咬我我真係好驚，我唔想係因為咁而停餵人奶，如果只泵唔埋身，我諗我會放棄.....

星期日，中午本來想餵粥，佢o係 high chair 個頭突然中左一下，原來超眼訓 (因為下午冇訓)，我即刻除安全帶抱起佢，佢一秒就訓著左。

抱住佢，我同佢講，我點捨得嬲你丫，但我真係好驚....

你呢隻小肥脾，照計唔係唔夠食丫....

快叉醒左之後，婆婆俾橙佢食，佢食得好肉緊

好想映隻牙，但當然映極都映唔倒，呢幅感覺上係睇倒少少

臨出街，老公放佢o係梳化上揹帶，睇返 d 相先發覺成個 ligthting 好靚 ^u^

我愛你呀小朋友，合作 d 啦

 

 

• 6m, 
• 出牙, 
• 餵人奶

暗訓

老公話近來小小連朝早o個轉番訓都要人暗，今朝終於見識倒個威力。由一開始心情唔係幾好咁叫兩聲，到後來堅喊。暗到接近成功時，睡夢中o既老公 gut 起身問要唔要佢暗，小小一聽倒人聲又眼仔碌碌，於是又重新再暗過。
    

係，我認，我地係抱住暗訓的。初生時睇好多 baby kingdom 話要訓練 BB 自行入睡，如果唔係佢就要搞好耐先訓，當時我地都曾經想過/試過咁做，但最後決定暗訓，我地兩公婆討論之後o既結論係︰其實暗訓都係一年o既事，只要過到自己，自行入睡 (即係要佢自己o係床自己一個訓) 都唔係必然，況且個個BB有唔同性格，有d 唔使訓練都會自己熄制，有 d 就係要暗先得，如果小小係後者，不如我地就陪多佢一陣啦。

呢件事我交俾老公決定，因為夜晚暗訓o個個係佢，如果佢覺得暗訓攰，我隨時配合開始自行入睡訓練。

琴日老公話︰「暗訓都唔係唔好，而家小小知道夜晚轉暗燈交俾爸爸抱就代表要訓覺，佢都好快會訓著。」

今朝 (星期六) 本來我都好眼訓可以番訓，但暗左兩轉之後精神晒 

 

• 6m

坐好

自從六個月返健康院時姑娘做成長評估要 test 坐同企之後，我好放心俾小小自己坐同企多 D，因為之前婆婆成日話唔好夾硬要佢坐，話驚整親佢，所以之前就算俾佢坐前都係抱住 / 夾住兩邊手臂。

去完健康院返黎之後，我試俾佢自己坐，原來真係可以坐得好穩，好幾分鐘都唔跌，琴日甚至係o係左搖搖右搖搖時可以自己平衡返。

 

冇左俾我地夾住o既束縛之後，動作快到冇影。

前晚開始，無端端開始做呢個表情，伴隨住由鼻孔噴氣o既聲音，究竟佢搞乜呢？前晚佢係咁噴同翁鼻時，我仲諗唔知佢係咪鼻塞呢，但係佢又食倒奶冇問題喎，望入鼻孔亦唔似塞。琴日婆婆見佢咁樣時，都有幫佢吸鼻，又係 result negative。我同婆婆講，唔通佢學我申鼻涕？？

 

• 6m

六個月返健康院打針

琴日返健康院打針，諗住可以度高磅重 (起碼度下頭圍啦，因為上次都冇度高~)，點知今次仲連頭圍都冇度，磅左重就打發左我地走.....

卵磷脂

上次我地操入去樓下診所磅重，點磅呢，就係跟婆婆講咁，抱住小小磅一下，唔抱小小再磅一下，個法碼磅磅倒 6kg o既 difference，當時我地已經話︰「真係得 6kg? 上次四個月已經 5.7」，點知今次返健康院磅，真係磅倒 6.4kg.... 即係話兩個月重唔夠兩磅.... 係咪我 d 奶有問題呢.... 又真係喎，因為琴日唔知 search d 咩時搵倒母乳協會 list 左一個美國醫生關於母乳及母乳餵哺o既文章，入面有提到卵磷脂，佢話卵磷脂能夠通塞o既原因可能係因為佢可以令 d 奶稀 d (我係咁理解)，今日突然諗起呢樣野，咁我都係唔好再食卵磷脂喇

http://www.breastfeeding.org.hk/book/133

真係出牙喇 !

話說放緊產假時我仲係好勤力同小小抹口，放完產假返左工之後，因為知道婆婆都有同小小抹口所以我就冇再抹口喇 (甚至連 weekend 小小跟我湊都懶，真係唔o岩 :P)。又話說近日小小開始食奶o既時候咬我，後來我 figure out 倒佢如果食飽左又未想放就會想玩，咁就會咬，而且仲越咬越大力。以前食到尾佢郁身郁勢時，我都會俾佢坐一陣跟住再試多最後一啖睇下佢仲食唔食，最近一次，佢又o係度貢來貢去，老公話同佢掃風再試下食唔食時，我竟然有一絲恐懼o既感覺浮上黎，唔知點解o個刻覺得我會因為俾小小咬而唔敢再埋身餵，於是我話「唔試喇，唔係佢唔係食又咬我」。佢最邪惡o既係當我好認真咁同佢講「唔咬得架」o既時候，佢竟然笑，以為我同佢玩.....

我地成日帶埋小小出去食飯，BB都總有「好似好想食」o既樣，我地成日都會話「但係你未有牙喎，等你有牙先啦」。唔知小小係咪真係聽得明同真係好想食，佢真係出牙喇!!!!! 之前睇人地 D blog 寫話抹口時會抹倒一粒尖野，所以前幾日我都諗起有問婆婆抹口時覺唔覺，婆婆就話覺得佢個牙床骨大左好多，但未覺得有牙。之前老公都問我會唔會係俾牙咬痛，我話「佢只要咬都已經好大力，唔使有牙都痛」

琴日o係健康院等打針時，當然大把時間o係度玩啦，就係咁樣玩玩下時，就俾我見倒佢下面有兩條白線喇!!! 係真係出左喇!!! 我即刻同佢講︰「好叻呀! 咁準時出牙!」，因為見過朋友個 bb 女 (小小同佢一樣咁少頭髮) 好大個先出牙，所以我對出牙真係冇諗太多。

成長評估 - 伸手取物，坐，企，講野

記得兩個月時係評估有冇社交微笑，仲有評估咩呢? 真係唔記得喇。個零兩個禮拜前唔知點解突然有擔心佢會唔會唔係太有意欲伸手攞野，於是我開始唔將個手鈴放落佢隻手度，而改為只o係佢面前搖出聲，最初佢都唔係好對倒焦咁，隻手會伸唔o岩位，過左兩三日之後佢開始一隻手識伸而且伸o岩位，於是我地就成日同佢玩手鈴。以前個手鈴一跌落地我地就會收去洗，因為始終佢會食，最近幾日我開始本 pair，話「跌多幾次先洗啦、一個禮拜洗一次啦」，因為佢雖然有時會拎得好實，但有時都會唔知係跌定係掉，而且咁大個喇，少少污糟唔怕啦。

今次六個月o既成長評估，姑娘叫我放佢o係我大脾望向前，跟住姑娘攞一個手鈴o係佢面前鈴鈴鈴，小小竟然兩隻手伸晒出黎攞，姑娘話「係喎，兩隻手攞架喎」，PASS ! 小小仲攞住人地個鈴 fing 左好耐，直至姑娘話「好喇俾返我喇」

之後姑娘叫放佢上枱，其實我一坐埋去時已經想放小小上架喇 hahahahah，因為我覺得小 BB 好似小朋友咁坐係好得意。估唔倒平時我話傍住佢已經坐得好穩陣時，姑娘只係離開手咁圍住佢，佢都坐左好耐，又 PASS! 真係由個心入面開心出黎。

姑娘跟手稱起佢企o係枱面，小小當然勁開心企得勁穩啦。其實好耐之前我已經同佢玩 stand-up-sit-down，就係當佢想 yang 腳時幫佢一把伸直晒個人，佢會玩得好開心，呢期佢更加有時唔肯坐，爸爸就會直情俾佢o係張凳度企，於是又 PASS !

小小全程有好大個笑容，姑娘不停話「你係開心 BB 黎架喎」，但由於佢有好大個笑容之外係全程默劇，姑娘問佢平時有冇講野，我話「有呀! 好多野講。沉默o既時候沉默，但講野o既時候好多野講」，姑娘就 pass 我地喇。出去等打針。

打針

今次要打三針，我而家明白解 d 人話去私家打等 BB 唔使打咁多枝。話說之前幾次打針佢都唔係太大反應，喊兩聲就冇事，但今次我估一來一次過打三針真係好堅，二來我自己覺得可能而家佢大個知道發生咩事，打一針已經擘大個口喊，到第二針再喊，到轉另一邊時收左一下聲，第三針喊到停唔倒，睇住佢 D 眼淚係咁流，我自己都驚。所以出左黎之後，我就同老公講俾佢食多陣奶，老公就去攞退燒藥。下次一歲，真係唔知點算，可能要爸爸出馬先夾得住佢，我應該搞唔掂。

我好記得去上產前運動班時o係物理治療部見倒一張講學行車o既單張，佢一直講一個重點就係「BB 會話俾你知佢幾時 ready」，之後睇其他唔記得書定人地 d blog 都有一個好重要o既訊息，就係「我地係要配合 bb ready o既時候俾佢去做佢想做/可以做o既野，而唔係按我地o既步調去逼佢做我地想佢做o既野」。我地冇特別要小小去轉身 (雖然初初我以為三個月就應該識轉身)，結果佢都冇遲到，五個幾月成功轉倒，我地冇特別要佢企，只係佢一企就好有興趣然後原來六個月返健康院係要 check 呢樣，我希望我以後都繼續做倒咁樣，我希望小小有一個玩樂o既快樂童年，而唔係「贏在起跑線」。

ps, 琴日見倒樓下另一間幼稚園o既學生放學，而家先留意倒佢地o既校服。我鍾意呢款校服多過樓下另外o個間o個款喎，如果我因為校服而決定幫小小報邊間，係咪好不負責任 ?

 

• 6m, 
• 健康院, 
• 打針

小小滿 6 個月了

小小滿 6 個月了，日子雖然過得辛苦，時間話快唔快，但回想又好似琴日o既事 (咁矛盾o既!? 你講咩呀...)

琴日抱住小小，心裡面o係度諗「我地已經一齊生活左 6 個月喇」，而家扶住佢時已經可以坐得好穩陣，好快佢就會識自己坐，好快就會識爬，好快就會識走來去，好快就唔係得意o既小 BB 喇。唔知點解覺得好感慨。

琴日婆婆幫佢著到好襯色咁小雞仔衫同黃色褲仔，我成個鐘頭就o係度盤算返屋企要三個人映幅合照，可惜爸爸因為太攰o既關係又o係度語無倫次又消耗左我o既耐性。我真係好少同小小o既同照... 因為我抱住時爸爸唔會幫我映，我連僅有o既幾張合照都係自拍的，但換左 samsung 電話之後就好難自拍了，要快 d 練成用新電話自拍，唔係就冇我同小小o既合照喇。

小小呢兩朝唔知點解好早就醒，琴日朝五點仲叫到好大聲，我抱起佢拍左一陣放返佢落床佢都有訓返，隨即天開始光...即係唔使番訓啦，於是就起身泵奶，但小小都係再訓左一個鐘就醒喇；今朝晏左 d，五點四先叫，但可能因為佢見倒天開始光，所以唔肯訓返喇... 本來想等到六點甚至泵完奶先再俾佢食，點知佢越叫越大聲，都係等唔倒，五點九就俾佢食奶，於是今朝泵得三安，其中原因係 --- 以為佢訓番...就放佢落床去泵奶啦...點知一開始泵又醒左喇... 最終放佢o係大脾坐直背住我個泵... 因為唔想佢睇住又想食...

滿 6 個月o既小小，你呢兩日做咩呀? 真係越大越訓得少 ?

(每日都只可以映倒佢朝早乖乖訓返個樣，因為o係婆婆度好少映，返到屋企又忙於沖涼餵奶訓覺...)

 

• 6m