小小的第一個聖誕節

爸爸話，如果小小舊年唔係怕凍唔肯出黎，呢個就唔係第一個聖誕節喇。舊年因為等緊小小出世，所以冇去到媽媽中學同學每年嘅聖誕聚會（而因為小小未滿月，亦冇出席農曆新年聚會）。今年小小梗係要出席下、見下世面啦。

今年轉移陣地去A媽媽屋企，A媽媽有兩個分別14個月同兩歲幾嘅寶貝仔，所以屋企有小朋友玩具，再加上另兩個同學嘅3歲女同4歲仔，非常熱鬧。4歲仔已經覺得自己同d BB 有代溝，所以唔肯一齊玩，而其餘3歲或以下bb就玩到癲左，小小都唔例外，佢又冇怕生保，俾幾個姨姨圍住都照玩照大笑，引到d未有bb嘅姨姨超開心。

而最神奇嘅係，小小中午十一點幾訓左大半個鐘下午就冇再訓，到六點有人出左去pick up野食時，我地就趁人少少靜d就餵小小食左粥先，我地放左佢落屋小主人張high chair度，平時唔使坐high chair監嘅小小坐左一陣食左幾啖就係咁擒出黎，坐人脾繼續食都係邊食邊叫，估計都應該要眼訓喇，於是快快食完就暗佢訓。爸爸使出佢暗訓絕技，大約十分鐘小小就訓。著左喇，仲成功放左落bb床！我地安安樂樂食左大半個鐘，之後小小先醒，食兩啖奶之後再同人玩左一陣交換埋聖誕禮物先走，非常完滿！

關於“育兒心得”

當爸爸un下un下唱歌暗緊小小訓時，4歲仔嘅媽媽有少少質疑嘅語氣問我點解仲要咁樣暗訓，我話因為呢個時候想佢快d訓著（咁我地就可以食野），希望只係我自己敏感啦，我成日覺得家家有本。難念的經，正如我都唔會質疑人地點解一d都唔考慮餵人奶。有好提議可以分享下，可能有有用資訊分享下，但你覺得唔好但我覺得呢刻 work 嘅，我亦有我理由去做。我湊我個女唔係最叻，但你個仔都唔係 perfect.

小小，爸爸媽媽嘅理念係喺你需要探索嘅呢個bb階段，安全地俾你搞你想研究嘅事物，喺你準備好嘅時候因應你自己嘅進度俾你適當嘅訓練，俾你舒服安全嘅環境，希望你有一個正面嘅潛意識。

以前我睇人地話4個月大就試米糊/生果，媽媽喺你4個月時都躍躍欲試，適時俾我睇倒另一篇文，佢嘅論點係“食固體係先要bb嘅腸胃已經準備好消化固體食物”，所以我地決定唔需要急於俾你食糊仔，反而係6個月時返健康量度倒你增重未係最理想，令爸爸媽媽有d擔心係咪你食得唔夠，於是開始朝早泵少量d希望你埋身食倒多d。雖然你唔係“長爬手”，但你機動性強，鍾意企，鍾意扶住左騰右騰，手指仔好靈活，唔揀食，甚至鍾意食菜，我同爸爸由初初嚇親到後來不停話你係 parent friendly 唔太重。（對媽媽黎講，重要嘅亦係喺你由3個月喺生長線25%跌到6個月10%時，健康院姑娘聽倒你係全人奶時，雖然冇話冇問題但都冇話有問題）

小小bb，下星期就又返健康院喇，爸爸媽媽好緊張呀 ^^

bb的早餐

小小 bb的食奶/食野時間

未食粥仔前：
7點前：埋身食奶，通常係自己醒
10點左右：婆婆湊返去食奶
1點左右：沖涼食奶
5點左右：食奶或糊仔
8點後（甚至更夜）：放工返屋企埋身。一收唔倒工就好大壓力，好多時返到婆婆抱住訓左，婆婆會話“佢又肚餓又眼訓架，冇得食唯有訓啦”
10點：食完訓覺

食兩餐粥後：
7點返工前埋身不變，但最近可能凍同半夜成日醒關係，經常唔願起身
10點：婆婆湊返去食奶不變
12-2點(視乎有冇便便有冇訓)：食粥同沖涼
4-6點：訓醒4安奶，婆婆稱之為下午茶
6-7(視乎幾點訓醒食下午茶)：粥
7-8：同婆婆食飯會有得食蕃薯或菜，蕃薯目前係小小嘅至愛
8-9：我收工返到屋企就有得埋身食奶
10點：無論我係咪晏返都冇得傾，食奶跟住刷牙
10點後：近來無奈要成住訓

第時小小睇返應該會覺得我好無聊，做乜食野時間都值得寫 :P

其實我係想講小小食蕉。

以往一直都係早上十點婆婆餵奶，我一直都同爸爸講小小差唔多時候要有固體早餐食。近來爸爸冇咁忙，好多時都可以早起身準備早餐，咁我泵奶壓力又少d（因為如果冇喺屋企食早餐，婆婆通常都係俾奶，而家朝早冇泵，lunchtime又泵得少，所以唔夠食）。

星期六日我喺屋企，大家（包括我自己）都會忘記左早餐呢回事。琴日星期日，我同爸爸食完晒茶餐廳返屋企後，大家都好安樂等中午過婆婆度沖涼食粥時，我突然諗起唔對路，小小冇食過野喎（-_-白痴……），於是拎左條牛奶蕉喺佢面前揚揚下。小朋友即刻勁興奮，係咁揮手表示要。小小滿十一個月大之後，不停見倒佢越黎越有自己嘅意識，同控制自己、知道自己做緊咩，想表達自己想點等等。平時問人攞玩具、要撲埋食物度同攞野食呢d故然係做緊，自從佢要求食住訓之後，近個幾禮拜好明顯見倒佢喺玩完一輪之後係冤我俾佢食。前排都仲只係我自己估估下，佢都未必真係訓，但呢兩日佢食兩啖就訓著左，雖然夜晚都有醒，但總體係訓多左少少。

又遠左，講返條蕉

我揚住條蕉仔，第一次引倒佢爬倒咁遠過黎我度拎條蕉（真係完全唔使諗帶呢個妹去爬行大賽…）。佢拎倒隻蕉之後，細細口試左一啖，冇問題，先至大啖大啖食仲食得好開心，成條蕉唔使一陣就食晒。我覺得佢好勁呀 XP

由於掛住睇，冇拍低呢個歷史性嘅一刻，post 10m 時舅母映嘅呢幅當係啦。呢幅相入面嘅係香蕉，原本只係諗住打橫俾佢咬兩啖，點知佢好快手咁一下啪斷左自己攬住黎食。呢個妹初生時成日驚佢唔cher奶食唔夠，但而家佢乜都肯食，我同爸爸都好開心/放心 :)

寒冷的冬至

今朝真係超級凍，呢幾晚都開暖爐訓，但今朝係覺得開左暖爐都唔暖。舊年冬天小小出世前後又係好凍，佢出世後房入面個暖爐長開，夜晚仲開 hi heat，而家我地只係開 low heat jet。

呢個星期初氣温跌到得返12度，仲落雨添。好彩咁啱上個禮拜已經決定唔泵朝早嗰次奶，如果唔係真係唔能夠想像咁凍打出個胸泵奶x_x

幾幾朝小小都係俾我捉佢食朝早餐奶（已經冇泵啦，你再一滴都唔食的話，唔能夠想像會係咩情況，雖然唔會谷到爆，但會勁唔舒服同冇奶都唔好啦）。今朝食完又嘟住個咀啦^u^

婆婆嗰邊冇開暖爐，琴晚返屋開左暖爐除衫時，發現婆婆幫佢著左六件衫XD

10-11個月BB

由於真係好難坐定定開電腦，加上年尾公司超級忙，的起心肝download左comment話唔好用的blogger app. comment 話用 app 寫 blog 會 default 張相o係文字最下，我覺得問題不大，反正我好多時都只係得一張點題相，而且決定 download app 原因係希望當文字o係心中出現時可以用手機記低之餘又可以相對容易地放返上 blog，o係呢方面 app 做得到我嘅要求。(如果唔係可能要用 email send 上 web再開 webmail copy & paste, 可能仲煩)


ok, 入正題

好耐冇記低小小o既成長 log，對上一次已經係寫「9個月BB的技能」，忙完一大輪，小小今日已係 11個半月大o既BB。

手部使用

拋擲物件

對上一次講小小開始識掉野，當時係離手 only，後來唔記得幾時已經係真係抛o既動作，而家小小已經可以將膠波仔、毛巾手鈴等等掟到無雷公咁遠，目的係等你執返俾佢，再掟。如果我同佢玩尋回，我執返後會放o係我手再將我手放佢面前，等佢自己伸手拎，佢拎到手，當然係再掟，不亦樂乎。

用手進食

健康院書仔已經教要準備兩隻匙羹，當BB表示有興趣玩匙羹可以俾佢玩。我一直都同婆婆講有兩隻匙羹可以輪住用，但其實我估計婆婆比較少同佢玩住匙羹食飯。其實小小好多時都會o係食粥o既時候搶匙羹，大約係10個月大時，我見佢識放匙羹入口，我就俾佢拎住匙羹，我捉實匙羹尾以防佢飛左隻匙羹去，自已用隻碗去就隻匙羹咁畢粥，咁樣食粥的話小小會食得好快，有時當餵完一輪佢好似已經唔想食時，俾佢自己拎匙羹佢又會再食返。我相信小小對於可以自主o既事係好有興趣的 !

自從小小識得自己用手執野開始，我地已經有俾野佢自己拎住食。最初o係我講完又講之下，婆婆曾經俾過兩三次烚菜莖俾佢食，但當我冇再講之後，原來婆婆冇再俾小小食菜，因為佢覺得BB仲係太細，但小小成日都有蕃薯食，由最初整爛晒用匙羹食，到後來細細粒俾佢自己拎住食。小小有舖好搞笑嘅癮，佢好鍾意執返跌左落枱面嘅野食返（咦其實唔搞笑喎，佢爸爸爸就成日俾我鬧佢d野跌左落枱都要夾返黎食u_u），例如畢粥滴左落枱，佢就會執返嗰粒米黎食。

行行企企

小小好細個我地已經成日捉住佢企，主要係當佢有掙腳動作時回應佢。天氣未咁凍時，小小喺婆婆度係訓地下的（因為打地舖就唔會有碌落床嘅危險），地舖嘅周圍係大衣箱、本櫃桶同舅父仔床尾，小小就會一直扶住呢d物件移動。

有一次婆婆喺廳mit橙，小小見倒知道有得食所以係咁登直晒個人喺度叫，我諗住咁大引力佢應該會行出去啦，所以稱住佢企喺房門口，但當時佢唔知自己可以行，只係一直係咁叫，好搞笑 XD。如果放佢喺床仔，佢就可以“繞床一周”

咬/牙

小小應該都係一個要靚嘅bb，佢出牙係階段性的，6個月時一次過出左下面兩隻門牙，之後再喺10個幾月時先後出左下面第3.4隻門牙同上面兩隻門牙。小小初生時我地好勤力同佢抹口，之後漸漸就懶:P。小小出牙後，我地再開始認真同佢刷牙，每晚食完返屋企之後嗰餐奶就出廳刷牙，先係抹口，然後俾pigeon牙刷佢自己玩。初初佢當牙刷係牙膠咁咬，我同爸爸成日喺佢面前刷牙，佢漸漸好似知道係咩一回事。

p.s.由開呢篇post到而家逼住收尾，篇post hold 住左三個禮拜，好多野都唔係嗰個情況了，例如琴晚放工返到婆婆度時，佢已經好伶俐咁推住張櫈或者捉住個大人行來行去。bb 當去到自己ready做一件事時，只要你俾/容許佢做，佢就可以突然pick up得好快。時間，尤其是卍朋友嘅時間，真係唔等你，呢個係我最近好強烈嘅感受。