9個月 BB 各種技能

自從 yahoo 話要摺埋之後，冇晒心機，加上工作忙，好耐冇寫 blog，但冇寫 blog 呢排小小練成左好多新野，唔寫低怕會唔記得原來爸爸媽媽曾經覺得小小咁叻。

企

話說8個月小小突然間扶住床欄企左起身之後，o係滿9個月人前已經練成左隨時可以扶住企倒起身，包括有一次婆婆話放左佢o係房之後發現佢扶住舅父床尾企左起身之餘仲行左兩步由個櫃邊行到去床角，當時大家都覺得好 amazing!!

由於佢已經可以用蠕動前進倒o既關係 (仲未認真識爬)，有一次婆婆放左佢o係房訓 (訓地下)，之後出左廳/厨房做野，突然聽倒佢叫，入房睇下，小小已經蠕動左成個床位，去到床房o個度扶住個膠衣箱起左身。 (外話 : 婆婆覆述俾我聽時，繪聲繪影咁話因為個衣箱冇絛邊俾小小 wear 住，只可以[手禁]住，所以小小企倒起身坐唔返低，由扶住個衣箱企左o係度一個好慘o既表情咁叫，o個刻真係好心 up，完全 feel 倒佢當刻覺得好無助)

再，上一篇 blog 寫左，有一晚佢未天光企左起身。而家佢企高坐返低已經係冇難度，最緊要有野扶住。

扔物件

其實小小係未識拋的，但佢由兩三個禮拜前開始會o係床度執起玩具，再伸手出床外面，然後放手，呢一段時間都未知佢係覺得掉野好玩定係點。琴晚放工返到婆婆度，循例先去洗手，見時間尚早，洗完手諗住仲飲埋碗湯先抱佢，點知佢望住我然後執起雪花膏盅掉出黎，好明顯係掉俾我睇，，仲有少少拋物線，我仲同佢講「咩喎~ 飲埋碗湯先之嘛~」。睇黎正式進入尋回犬時期喇 (我地大人係尋回犬)，好野~