17個月回顧 2

行 / 大動作

小小而家嘅相幾乎全部都係無影腳，喺室內兒童遊戲室同喺屋企已經可以跑倒幾步，喺街有時都會行得好快，但就未至於會起步走。唔知係幾時會開始識跑架呢? 而家去樓下遊樂場時，好多時佢反而會冇興趣玩滑梯，反而走左去行樓梯。較早前去九龍公園個滑梯係矮級樓梯，佢全程自己上上落落，自己扶扶手，已經唔係我地幫，但樓下個滑梯上去嗰度係硬膠大網，所以佢唔可以自己上去，一定要由我地幫佢上去，有可能因為咁而令佢冇左興趣.....

上落梳化同床o既功夫已經掌握得好好，成日自己喺度上上落落，搞到婆婆好緊張。早幾個月時都試過直直由梳化/ 床碌落地，跌跌下咪學識點落囉，不過都花左 D 時間教佢，初時就係成日喺佢想落去時反轉佢個人，要佢趴住跣落地，而家佢就係咁落地喇，但因為小小已經又長高左一 D，所以有時佢落梳化已經唔反轉會正面落。

又，近呢一個禮拜聽閒佢開始跳落黎，我冇親眼見過但有聽過其他人講。一直以黎我o既主張係順應佢o既成長階段同需要給予探索學習o既機會同空間，而「由梳化或床跳落地」呢個部份.. 我未諗倒應該點處理..... 

由從小小行得好左，一直都想搵部單車返黎俾佢，一來俾佢自己踩下，二來希望有個「類BB車」俾婆婆帶佢出街可能輕鬆 D (但諗深一層，雖然唔使抱，但攞多架車又未必真係輕鬆左...)，點知有一朝落街玩時，有個姨姨見小小係咁研究佢架單車，就話俾佢坐下，嫲嫲又唔問下個孫、又冇多謝聲個姨姨，就夾左小小上架單車度，小小又唔願坐，又走返落黎，我返去同爸爸講︰「唔使咁急買單車喇」(後註︰卒之父親節爸爸就去買左架單車喇)

說話

大約3個禮拜至一個月前，小小有一晚突然愛上左「叫爸爸」遊戲。平時臨訓喺床玩時，有時爸爸返，當開鐵閘時我就會叫佢「爸爸返黎喇，你嗌佢入黎啦」，佢會細細聲講「爸爸」，我會話「你要大聲 D 爸爸先聽倒架」。有時爸爸入到黎下我地訓左未，小小會坐起身、指住佢叫「爸爸?」，跟住又會醒晒唔訓 (又搞倒我...)。某一個晚上，我地如常入房訓覺，小小突然好大聲運晒氣咁叫「爸爸~」，爸爸即衝入黎「係~」，出返聽之後，小小又運氣「爸爸~」，爸爸又衝入黎「係~」，如是者來回左幾次，來回左幾晚，我同爸爸講「佢唔會咁樣嗌好耐架 ja，你都係好好享受下啦」。

小小亦喺大約兩個禮拜之前開始識叫「婆婆」，聲同韻都正確，只欠 P 音讀成 B 音。有時撩佢講「婆婆」都覺得佢好得意 ^^ 有一次我地食完飯坐晒o係地下睇電視，劇情緊張關頭講到女主角個婆婆喺火場入面唔見左，我好緊張咁講左好幾次「婆婆唔見左! 婆婆唔見左!」，本來玩緊玩具o既小小放低 d 玩具走過黎我地面前，望住我、指住佢婆婆、用佢o既BB 話講左兩聲「婆婆?」，我先明白原來佢聽得明我講緊乜，所以覺得好奇怪，想話俾我知「你話婆婆唔見左? 婆婆咪喺度囉?」，嗰刻真係覺得好奇妙 -- 以前一舊飯o既人仔已經唔係一舊飯喇 !!

小小唔識講「媽媽」同「奶奶」呢兩個我一直都以為會最早學識o既字。曾經有一兩晚我好著意想佢開聲講「奶奶」而搞到佢喊，我嗰次真係心都痛埋，嗰晚應該係佢成功講倒一次個「奶」字，於是臨訓食奶時，我就話要佢講個奶字先俾食，佢一直都唔講 (好似硬頸咁)，然後扁咀跟住眼淚流出黎，除左跌親痛同攞唔想攞o既野喊之外，第一次佢咁樣喊，係好有心事咁喊，我即刻抱番住佢，但佢已經喊開左，我問佢︰食奶好唔好呀? 佢點頭，之後佢一邊食我一邊喊。小小可能同我一樣，都係一個好敏感，但又好怕不能掌握o既事o既小朋友。之後我就冇再逼佢講任何野喇。