聯合醫院登記產科新症

根據網上o既資料，聯合醫院係要星期二或五o既上午先接受產科新症登記。點解上個禮拜咁急要拎倒封醫生信，就係因為我星期一二請左假，我一定要星期二過倒去登記，如果唔係真係唔知點算.... 封信終於拎倒手，星期一我又好唔安心咁打去問「係咪聽日上午拎住封信過黎登記就得架喇?」，我好驚佢到時又有其他野要，而我又冇預備o個 d 野.. 咁就弊喇.....

打到去o既時候, 姑娘竟然話「其實你幾時過黎登記都得架!」， 於是我地一行三個人 (連埋我奶奶) 就衝左過去聯合醫院喇。我都唔記得o個日係咩時間過到去喇，總之個候診室就唔係太多人，我仲成日同人講「似乎一話唔俾居港權真係冇晒大陸人喎.....」。我隊左封醫生信埋去，交埋我o既身份証、老公o既身份証、地址證明，佢俾番張覆診單我，成件事就完畢喇。之前上網睇， d 人問應該去醫院登記好，定係去健康院登記好，d 人話如果去健康院就要等回覆先知有冇床位，因為健康院係張 d case 一日一 log 咁send 去醫院，如果你想去o個間醫院 full 左，你就要再諗下你想去邉間或者甚至冇得揀 (當然係揀返聯網以內o既醫院啦)。如果直接去醫院登記，就即時 check 倒你o既日子仲有冇床位收你咁話。我打去時其實姑娘都有問我住邊，我當時心中有鬼，就直接覺得佢係想叫我去健康院登記，但我o既住址實在太近喇，佢都冇 further 再講 d 乜。

登記完就啟航返屋企啦，奶奶問「走架拿? 唔使見醫生咩?」，老公話「過黎登記架ja，邊有咁容易俾你見倒醫生呀」，跟住佢就悻悻然咁去左買餸喇, hahahahahhahah. 

之後好多人都問我「有冇床位呀?」，我都係答「佢收左我囉」，講真，去得政府醫院都係諗住自己生啦，自己生，又唔似開刀咁可以揀日子，我諗收左就係架啦~  諗諗下，d 人成日話去私家醫院爭位，6週去已經話冇位，如果係連日子都要擇埋先去得私家醫院留位，真係太長遠喇... 我唔能夠想像........

8 week - 超聲波驗孕

正確黎講應該係 7週+5日先o岩。覺得自己有左之後，我不停咁上網 search 究竟我應該點做先可以o係政府醫院得倒一個床位呢? 先發覺原來政府根本冇呢 d 資訊俾人，只係叫你帶同確孕醫生證明去登記。喂老細呀!! 我想講，如果我平時連婦科都唔睇 (我就係喇，我只係去保險公司每兩年送一次o個 d 抺片檢查，無啦啦點會識個婦科醫生???)，淨係睇戲見 d 人話用驗孕捧 check 倒自己有左，咁點呢?????? 當時真係十萬個問號。 d 診所門口成日貼住驗孕即知，其實都係用驗孕捧 (不過佢o個支會勁過你o係萬寧買o個枝o既)，我唔知係咪足以構成可以俾倒我去醫院攞位。o係無計可施o既情況之下，我最後都係打去樓下診所問，問佢如果我o係你度驗孕，係咪就就會出倒封信可以去醫院登記o個種? 姑娘話「唔會架，跟住都係要轉介你去照超聲波先會有」。 咁冇野要講啦，即係都係要直接去睇婦產科先得啦，於是我老公開始發狂咁打電話俾佢 d 已經生左仔o既朋友，最後搵倒一個聲稱又平又正o既曹醫生 (就係後來走左佬唔同我照結構性照聲波o個個喇) 第一次因為有左而照超聲波，我同老公都異常咁冷靜 ( -_-" 睇戲o個 d 人明明喊晒呀，又大叫呀咁 garc....) 。 bb 已經係一粒腰果咁o既樣，亦都有腰咁大粒 (如果冇記錯好似係3cm)，跟住醫生開埋喇叭聲，話「嗱，呢個就係 bb 心跳喇」，呢個時候我先覺得「嘩! 已經 function 緊添啦?! ", 雖然你乜都見唔倒, 但確實係聽到佢o既心跳, 原來真係有 d 野己經發生緊喇 (big hug)

結構性超聲波是怎樣的一回事

去驗孕o既時候係第一次因為懷孕而去照超聲波, 其實都唔係好知照超聲波係咩一回事, 咪好似睇戲o個 d 咁囉, 好彩之前盲腸炎已經有照超聲波o既經驗, 未之於完全唔知發生咩事 or 要點做. 簡單黎講, 照超聲波時係要拉低條褲 (要知道子宮其實係o係好低o既位置的, 如果試過 m 痛就會知道係邊個位置), 去美麗華o個間大型診所時, 姑姑甚至會用訓練有素o既客服語氣同我講「條褲係要拉低過毛毛o架 ^^」咁. 到去旺角中心o個間時由於bb體位唔係好合作, 條腳拉低到個程度係我覺得 : 不如我直情除左佢俾你照啦好冇? 好, 入正題. 在我地孕婦o黎講其實照普通超聲波同結構性超聲波o係過程上係冇分別的, 不過, 由於照結構性目的係俾醫生數清楚 bb o既各部份 (手手腳腳眼耳口鼻) 同主要器官 (腦, 心, 肺, 膀胱, 腎, etc) 生得齊唔齊, 所以認真o既醫生係會願意花多少少時間 check 清楚 d 的. 由於原本睇開o既曹醫生失蹤左o既關係, 所以我 book 左兩次結構性超聲波, 順便當試下跟住落黎睇邊個醫生好 D. 照左兩次, 個情況都有唔同. 照結構性所需要o既時間, 好視乎你個醫生有幾認真, 同埋 BB 有幾合作. 第一次由於 BB 都幾合作o既關係, 只係用左大約 45 分鐘就照完出黎喇, 但比對我第二次照o既 item, 好似第一個醫生冇話俾我聽佢照左/照到o個部份 (但佢 report 有寫話佢照左), 相對地我第二個醫生就好似照得詳細 D 一路照o既時候, 醫生會話俾你聽 「嗱呢個就係心臟喇, (如果你識睇架話, 會睇倒有 4 個心室), 你見倒呢度未生埋, 係正常o既, 如果 BB 生埋左就反而唔正常喇. 」 「嗱呢隻就係腳啦, 呢條大脾, 大脾係一條骨o既, 呢條就小腿, 小腿係兩條骨o既, 拿呢隻腳仔啦, 12345 呢隻腳趾公, 都齊喇. (當然會數晒左右啦)」 「嗱呢隻就係手啦, 呢條上臂, 同大脾一樣係有一條骨o既, 呢條就前臂, 同小腿一樣都係有兩條骨o既, 拿呢隻左手啦, 12345 呢隻手指公, 都齊喇. (當然亦係會數晒左右啦」 「嗱呢個頭, 入去就係個腦 (仲會見倒個腦o既蝴蝶形橫切面, 跟住o個 D 我就唔識聽喇....) .....」 會睇兔唇啦, 呢樣係我最緊張o既 會睇一 D 主要o既血管係咪生齊啦, 臍帶係咪生得o岩啦 會睇 BB 有冇胃, 膀胱 同腎, 腸就睇唔倒喇... 當然會數眼耳口鼻啦 好攰呀.... 做到就黎訓著. 總結黎講, 如果你仲未做結構性超聲波, 咁就值得花 D 時間去諗下你有咩問題想問醫生啦, 因為過程都真係有幾多時間可以問問題. 不過當然都視乎你個醫生係點o既人啦 :P. 同埋我覺得好重要亦都係做好心理準備你見倒o既野未必係你 expect o既野... 例如 touch wood BB 真係有 d 野生得唔o岩或者唔齊... 所以我一路都冇抱太大期望, 諗住「見倒咩就係咩啦」, 睇完出黎個人係放心晒... 唯一o既疑問係, 度度都話 18 週已經可以睇, 我之前診所o個度仲話一過左22週就唔睇添 (因為BB太大會有可能骨骼已經生得好好, 遮住睇唔倒, 但旺角中心個醫生話個心臟咁細個睇得唔最清楚, 建議我2個禮拜再返去覆照一次心臟.... 不過當時用 last m period 計係搭正21週, 但實際成長係20週o既小小 (我BB個名(love struck)) 都仲有好多野可以睇倒, 所以, 我諗如果只係求安心, 唔係諗住照完有事就唔要的話, 20甚至21週先照都 ok 的 (winking)

21 week - 再照結構性超聲波

一直以黎我都驚小小會太細, 主要原因係因為, 預產期係根據最後一次月經o既第一日起計, 但我好清楚知道小小以排卵期計o既話係應該要細一個禮拜. 8週時第一次去照, 醫生仲話小小 (o個次之後我地話佢係腰果, 因為佢就係一粒腰果咁樣 (big hug)) 比8週大左少少 (當時o既腰果, 即係而家o既小小, 其實只係1.03cm). 到第一次照結構性照聲波時, 個 monitor 見倒有即刻比較個 reference week 係幾多, 小小除左肚圍之外, 全部都合格, 我當時係放心左. 今日星期一, o岩o岩21週, 今日去照第二個結構性超聲波, 診所o係旺角中心, 係醫生自己一個o既診所. 今朝為左放呢半日 comp 假, 成朝開住200% turbo, 連小小都係咁不停郁. 差唔多兩點我先走, 同埋去食午飯. 又遲到左十幾分鐘先到診所, 我應該係第一或者第二個客, 總之我去到時冇人, 即刻就入得醫生房. 醫生外型好搞笑, 唔似一般搵錢打扮得好官仔骨骨的醫生 (o個日o係美麗華o個個就係官仔骨骨o個隻喇), 反而似樓下 D 家庭醫生咁. 小小今次一開始就 show face (上次搞耐左o既原因就係佢唔肯 show face, 照唔倒眼耳口鼻o個 part), 但我諗醫生係好似飛機師降落咁有既定程序的, 雖然今次小小 show face 先, 但醫生都冇話照面先, 都係要由腳骨同心臟照起. 今日小小可能都攰, 所以全程 bok (伏)左o係度.... 淨係見倒背脊 (好清楚不停睇住條脊骨), 但其他野都唔係好睇倒.... 老公話小小好似我, 佢話小小一定係話「上次咪睇左囉, 又睇.....」覺得我地好煩. 今日醫生一劈頭就話 BB 唔似21週, 度左好多樣野都只係20週, 我一路講我個 「最後經期 vs 排卵期」o既問題. 醫生都話有可能, 但預產期係8-12週時已經計左, 唔係佢而家可以改倒...我下次返健康院一定要問清楚醫院仲會唔會有幾他方法再第二次確定預產期, 如果唔係我一路擔心o既產假同小小被懷疑訓過鐘問題就冇得解決喇..... (worried) 小小... 究竟你係咩 size 呀?

20 week - book 結構性超聲波/ 醫生失蹤了 (下 )

lunch time 實在冇心機, 我一路食飯, 一路摸住個肚 「唔緊要啦, 其實都係循例要睇下有冇唔妥 je, 有定冇, 媽媽都唔會唔要你的」. 之前都有同老公傾過呢個問題 : 「係咪要照結構性超聲波呢? 其實係俾人睇下bb有冇缺憾, 如果唔要就趕及唔要 je 係咪?」但老公話, 佢認為係盡早知道bb有冇問題, 如果有就盡早準備一出世時立即處理。佢講得好有道理, 所以我先覺得原來結構性超聲波都好重要.... 點知而家....唔好講結構性... 連之後o既產檢都唔知點算..... 食完飯, 出左隔離o既商場, 打俾老公. 因為我公司搞緊個大 job 我冇時間亦唔知搵邊個好, 老公呢個時候負責左成件事, 可以話係我第一次好深刻咁感到個 bb 真係佢都有份都好緊張 (sorry 呀老公 (big grin) 你知我有左以黎一路都係幾咁功能性架啦), 我一打俾佢, 佢即刻報告晒進度咁, call 左邊幾個 friend, 有邊個邊個醫生, 邊個醫生電話未打得通, 原來有醫生係你搵佢接生佢先會收你做產檢, 原來有醫生係14週前唔睇佢佢就唔會收你, 佢打左好多好多個電話, 最後我真係喊左出黎, 因為我真係好擔心, 好徬徨. 老公話 : 「你放心啦, 我下晝會繼續打, 再話俾你知咩情況啦」 返番公司, 我又開始癲喪o既工作. 同team o既同事連我大肚都尚且唔會顧住我, 我更唔會想俾佢地知道我呢刻o既擔心. 四點, 要同老細去開會喇....我一路 take minutes, 一路留意住個電話, 就快五點時, 老公 send 左個 msg 俾我「你開完會有時間就打俾我啦」, 原來老公已經搵倒兩個醫生仲 hold 左, 就爭我決定想去邊間, 我當時真係冇晒主意, 老公講左幾個建議, 最後我地決定兩個都睇, 再決定之後o既產檢搵邊個做. 星期四, 請左一日o既 comp 假去 11:30 o既 appointment. 診所o係美麗華, 係好大型o既婦產科醫療中心. 我自己又遲左十幾分鐘, 最後等到 12:15 先到我入房見醫生. 醫生好 nice (房間當然環境亦好好), 小小亦好合作, 上網成日見人話有時 bb 個體位唔o岩o既話, 要暫停, 媽媽出去行下再返去試過, 但小小呢日雖然都有 d 時候醫生話照唔倒, 但推左幾下之後佢又好合作咁轉個頭過黎俾醫生照眼. 小小對手又開下合下同我地玩包揼. 全個過程都係一個好好o既經驗.

20 week - book 結構性超聲波/ 醫生失蹤了 (上)

19 週o既時候返聯合覆診, 醫生問我會唔會出去照結構性超聲波, 我當時仲大大聲話 「會呀, 下個星期」, 醫生追問「book 左喇係咪?」 我仲賴醒「book 左 :) 」其實根本未book, 因為平時曹醫生都好易book, 又反正我有時間就佢 (其實就乜鬼丫, 咪就係星期六下午過去囉....), 所以最初以為自己早成個禮拜打電話去book 就唔會有問題。 到左星期一, 朝早打電話去話想 book 星期六照結構性超聲波, 姑娘話「曹醫生放假喎, 21號先返」 我 :「下?」咁冇辦法啦, 唯有收線自己先諗倒野, 攞住個日曆o係度諗...咁冇法啦, 好彩老逼放 comp 假, 咁就21號攞 comp 假去照啦. 於是再打電話去 我 :「呀, 我頭先打過電話黎想約照結構性超聲波...」 姑娘急不及待話 : 「曹醫生放假喎」 我 : 「我知呀, 醫生 21 號返嘛」 姑娘 : 「唔係呀, 醫生係得 21 號返診所, 之後會再幾個月放假」 我 : 「 (吃驚) 下? 放幾個月? 咁就 21 號啦, 21 號有咩時間得?」 姑娘 : 「(問左預產期之後姑娘計左一輪), 過左 22 週曹醫生唔照架啦喎」 我 : 「(開始慌) 咁你地診所有有其他醫生可以照?」 姑娘 : 「冇」 我 : 「下.... 咁你地有冇其他醫生可以refer?」 姑娘 : 「我地都係 refer 你去荃灣港安 ja」 我 : 「咁如果係去港安照o既話我要做d 咩?」 姑娘 : 「都係你自己打去 ja」 我 : 「..... 咁好啦.... 唔該...」 期間每一下我都打電話俾老公 「點算呀點算呀」咁問... 跟住我話 : 「我再打去ai下佢啦, 都係22+2 je, 求下佢囉」 於是我又再打去... 我 : 「係呀, 我頭先打過黎架啦, 其實 21 號我都係差 2 日 je , 22+2 je (我 search 過養和係話 24 週後先照唔倒), 可唔可以都幫我照呀?」 姑娘 : 「(好決絶) 真係唔得, 過左22週曹醫生就唔照架喇, 就算你上到黎都唔會幫你照」 我 : 「(盡力扮慘) 下咁點算呀, 我可以點做呀?」 .... 之得o既對話我都二記得喇.... 總之就係冇得傾..... -_-..... 點算呀?... 佢講到咁絶22週就冇得照, 臨時臨急去邊度再搵過一個產科醫生呢?!!!??!?!?!?!!!?? 當時我o係office 同老公講電話時, 真係急到差 d 喊出黎.....