善變的大肚婆

善變係天生的.... 冇辦法.....我係指 :~~

懷孕初期
會好怕自己佗唔穩，做親乜都驚唔知有冇影響，好乖咁乜都唔敢食 (但我好似乜都有做，好似當時仲有追巴士....不過我好少要真係跑住咁追巴士o既，頂多行快兩步o個種)，當時成個腦入面只係諗住隨時有跌o既心理準備。

懷孕中期
過左 3 個月我都未敢覺得自己穩陣，因為西醫分界係 4 個月 (但滿12周o個日咁o岩 canteen 食雪糕，我都有食雪糕同小小慶祝滿12週，wahahahahhaah)，到正式入左中期，就開始驚佢唔大，驚佢太早趕住出黎，又唔敢買 bb 野驚唔知會唔會最後用唔著。開始成日驚佢o既各樣器官唔知發展得好唔好，成日驚自己食 d 野唔知夠唔夠合適o既營養俾倒佢用黎製造。

28週
西醫認為滿 28週o既胎兒有能力o係母體外生存，所以 28週前作動就入急症室保胎，滿 28週就直入產房生出黎。滿 28週時，個人開始定 d ，因為知道佢隨時要出黎都應該可以冇事，於是開始諗要準備咩俾 bb，但依然有期望佢會足月先出世，但已經一路做住「隨時會生」o既心理準備。各樣器官應該大致發展好，只差樣樣都生大 d 穩陣 d，同埋尾呢幾個月係快速生長骨骼同肉o既時候，所以開始特登食多 d 蛋同奶，希望幫助倒 bb 造骨同肉。呢個時候最擔心o既係唔夠蛋白質同鈣俾佢，會搞到佢細細粒長唔大，會影響左佢一世。

滿36週
滿36週，即係已經足月，隨時出黎都唔會有問題，亦真係隨時會出黎。心入面由擔心佢身體，突然間變成開始擔心佢出世後o既硬件。屋企未執好，衫同床舖一路都未洗，由於咩都未買，心入面會成日盤算住如果突然間出世老公要即刻去買 d 乜買 d 乜 (雖然自己連走佬袋都未開始)。上個 weekend o係朋友度收倒一大袋佢大女o既初生衫仔，裡面仲有個睡袋，連我最諗唔掂o既睡袋都有喇，數埋就只係爭兩條厚包被同帽，bb 出世就可以返倒屋企。 

~ o ~ o ~ o ~
 
我係想講，原來大肚婆善變係冇辦法的，因為真係面對住唔同o既環境、條件同變數。整個懷孕期並唔係單一o既事，身體狀況亦唔係一直都一樣。一路打呢篇o既時候，小小一路o係個肚入面掃來掃去，我o係度諗，究竟未來o既日子會係點呢？佢出世之後會係一個點樣o既世界呢？各樣各種o既情況唔係我事前可以想像，所以對山羊座o既我黎講，懷孕其實係一件好大壓力o既事，因為山羊座o既我最鍾意所有野都完全掌握、有晒計劃、有晒時間表、預早做好準備，但事實係懷孕呢件事係完全不受控制、冇得彩排. . . . .

btw, 富媽媽最後因為 bb 唔肯調頭，最終安排左o係38週開刀，出世 6磅幾。