反斗的小小 - 大叫「爸爸」

今朝回復平靜，小小雖然早左叫食奶食完又反左一輪先訓得返著，但起碼都係靜靜訓返。

琴日朝小小早左好多，六點前就醒左，本來食完奶又訓返，我都訓返，到鬧鐘響，我起身去準備返工，臨出門口時佢又郁左兩下，我又衰就諗住睇下佢會唔會要食多轉奶啦，於是就錯左喇，佢番食完奶之後本來都碌落床訓返，點知唔知係唔係突然發現唔對路，跟住開始喊起上黎，仲喊到勁大聲。

呢個就要講前言喇。話說小小成日會細細聲叫爸爸，我成日同佢講︰你要大聲 D，爸爸聽唔倒架，有時佢又會細細聲咁同人講拜拜，對方冇反應時，我地都會話叫佢要大聲 D，佢近日應該突然明白左「大聲 D」點解，但係佢並唔係o係叫拜拜時大聲 D，而係開始o係夜晚訓覺時大聲叫爸爸入房。

小小好少會自己話要訓的，除非佢真係好攰好攰，攰到會食住奶訓著嗰隻，否則都係我抱佢入房，入房之前會抱住佢同嫲嫲爸爸講早抖，少少亦明白「早抖」o既意思，但佢會講「拜拜」。就算嫲嫲已經訓左，我都會同佢喺房門口細細聲講早抖。入左房之後，會熄大燈，留返床頭細燈，小小就通常都要再玩一大輪先會訓，有時佢會細細聲叫「爸爸」，雖然唔知真定假，但我都會同佢講要大聲 D，然後再幫佢叫爸爸入房。爸爸就算唔係聽到我地叫佢，佢都會久唔久走入黎睇下我地咩情況，同埋叫小小「要訓覺喇，覺覺豬喇」(小小喺大約兩星期前開始會講「覺覺」，估計佢真係知道我地講「訓覺覺豬」點解) ，所以喺小小未訓著之前，爸爸係不嬲都會騰出騰入的。前兩日開始，佢突然間喺房猛叫爸爸，初初我都有幫口叫爸爸入黎，點知佢越叫越好玩，仲用盡全身氣力 -- 吸氣 -- 運勁 -- 「爸爸」 咁大叫，爸爸要即刻衝入黎回應佢o既呼喚，如是者叫左好幾次，我怕佢會玩慣左，但又唔想叫爸爸唔好理佢 (因為好難得佢會叫「爸爸」呀~ 就算佢只當係指示唔當係稱呼都好)，所以拍拍佢同佢講「好喇，要訓喇」，都仲再玩多左陣先肯訓。

又扯遠左 u_u 唔記得左自己寫前言之前想講乜。

總之第二朝小小唔俾我出門口狂喊，安撫完放返落床玩冇事之後，我再拜佢佢就又喊喇，唯有爸爸抱住佢睇住我出門口，好彩爸爸話之後佢冇喊喇，開始玩，但就冇再翻訓喇。爸爸話佢琴晚 (星期日晚) 唔記得同小小講話媽媽第二朝要返工... 都有可能....

放工返到婆婆度，循例同小小講我要去左洗手先，小小有時會跟埋入黎厠所 (婆婆平時都會俾佢跟埋入厠所，我覺得係好事，起碼而家出街我都可以帶住小小一齊去厠所，佢會好乖咁閂門然後企喺度等你，然後你一開鎖佢又會開門出去一齊洗手。但有一次驚險係佢突然撲過去個馬桶度仲想伸手入去，嚇死我!!! XD)，呢日佢跟到黎門口就企左喺度，我問佢入唔入黎(厠所)，佢搖頭，之後我洗完手去完厠所出黎攬攬佢，佢要我坐低，然後行左去我後面，初時我以為佢又要 marry-go-around 我，點知佢走左去我左後就冇繼續轉，然後伏左喺我左邊膊頭呵我，第一下我已經冧到暈左喇，點知佢企直轉一轉又再伏喺我度~~~ 啊~~~ 媽媽俾你冧死了~~~ 即係話朝早o既唔開心已經冇事啦 ovo

星期一晚爸爸會去開會，會夜返屋企，到我抱小小入房訓時都未返到。我同小小喺房入面準備訓覺時爸爸返到黎，入黎望左一下，同小小打左招呼之後就出返廳，小小隨即又開始叫爸爸遊戲，爸爸出出入入，兩個玩到不亦樂乎。我同爸爸講，你好好享受佢咁大聲叫你o既日子，千祈唔好覺得煩，好快就冇架喇。湊小朋友，真係要好好珍惜發生o既會一件事，因為「長大」只有一次，一回頭就會發現小朋友已經不復傻傻o既小不點；亦要小心處理同小朋友o既相處，因為你唔知佢邊一日會 feedback 返你做過o既行為俾你睇，例如小小而家會好熟練咁「敲胆經」，係敲打兩邊大脾外則，當然呢個係因為婆婆自 BB 時期已經成日幫佢敲，而家o既 feedback 就係佢有時會自己開始敲，同時要求你一齊敲。

星期二朝乖乖翻訓o既小小