快樂的產假 - 第 3 天

原來咁就第 3 日喇，其實真係唔知呢個「快樂的產假」會放幾耐架.... 因為之前成日話小小預產期如果用 last m day 其實係要遲一個禮拜的，但小小一直以黎o既 size 又 ok 喎，再加上醫院又唔知會想安排遲幾耐會要催生，所以一切都係未知

今朝又係八點醒第一次去厠所，諗住起身工作，點知再訓番.... 一訓就係十點幾..... 仲係因為急先醒同逼住起身 (唔急我諗我都唔會起身)。隨即落樓食早餐，食完返屋企，老公繼續工作，至於我，冇其他有趣o既電視節目，最好睇已經係 appollo 13 (我真係諗住大 hea 架 ... ^^)。到十二點幾又急急出去同老公之前公司o既同事食 lunch (因為有同事o係廣州黎左玩)，之後再去旺角照超聲波，全日頻蹼得緊要....

上次照超聲波時係 36 週，醫生同姑娘o既語氣已經係唔使我地約覆診喇，今次醫生仲明講叫我地唔使再覆診，姑娘收錢時亦都話「生左之後可以再約返黎做產後檢查啦」，即係明確叫你唔好再 book 產檢啦 hahahhhaha

今日醫生話對 BB 轉落盤骨o既情況好滿意。最近睇倒 baby kingdom 唔止一單話 39週幾冇左... 不禁要問下醫生要唔要驚 BB 臍帶纏頸，醫生話其實而家都有鬆鬆地繞左一圈，基本係唔需要驚咁話 (我覺得其實係冇得驚因為冇野做倒囉 :P)，佢話繞圈係唔驚o既，因為出世時見倒一手已經可以整甩，而且當作動時已經駁住心跳機，心跳一有咩問都會即刻知。醫生話最驚係臍帶打左結，但唔好彩真係打左結就真係想救都救唔倒喇.... 人出生，都係一個充滿住或然率o既過程，呢 d 或然我地稱之為「緣份」。小小有時會郁得好大力，搞到我點坐點企都唔係，但我辛苦之餘，我會讚佢好乖，因為佢都係話緊俾我知佢正充滿生命力咁生存緊。最尾呢十日八日，希望佢會繼續努力，唔好輕易放棄。