快樂的產假 - 第 9 天

第 9 天 星期日 12月16日

訓醒好似十點幾? 又去食茶餐廳早餐。開始唔係好想食咁多公仔麵，所以又叫左米粉 (之前o係公司成日俾人鬧我好食公仔麵)。食飽去通寶行睇下有冇床單賣.... 點解 bb 床單咁難搵.....，行行下唔係咁舒服就返屋企喇。之後幫老公剪報紙，再拉埋 d 紙落去賣，返黎食飯，又訓晏覺....  :P

之前我久唔久就扮嬌俏話老公咁耐都冇幫我映大肚相 (facebook 一路都冇得 update profile 相... 所以亦冇特登公佈我有左o既消息)。本來老公興致勃勃想今日映，點知我食完飯後準備繼續剪報時突然抖唔倒氣超唔舒服，所以先去左訓晏覺.... 老公又唔忍心叫醒我，起身已經天黑映唔倒....起身就出發返外家「每週一晚飯」，星期日就咁過左喇 (當然都有睇 <<大太監>> 大結局啦)


今日篇幅咁短，不如又講下懷孕小知識 -- 舉手高過頭

話說所有人都話大肚婆唔可以舉手高過頭，o係「富媽媽有左飯局」中呢個都係其中一個熱門話題。富媽媽話有左之後佢父親大人已經乜都唔俾佢做，話驚佢會 chok 親。雖然個個都咁講，但其實你問返o個 d 人係冇人會答倒你點解有左舉高手會 chok 親。其實舉高手又可以有咩問題呢，洗頭、梳頭都係咁啦。其實好多冇解釋o既懷孕禁忌都係始於唔想令大肚婆太過粗勞，「唔好舉手高過頭」其實係想大肚婆避免拎高處o既野，一來大肚婆進入論盡期因為韌帶鬆弛關係好容易會拎野唔穩陣，如果一拎野時甩手，物件從高處墮下就會有危險，二來大肚婆因為肚部令重量前傾，導致脊骨同背肌長期向前拉扯，如果舉高手攞野時用力唔o岩咪真係會扯倒囉

另外，亦都有聽過話舉手高過頭會令BB不安同埋會拉扯臍帶。呢個我又覺得唔係好 make sense。如果你話舉高手係可以令到腹腔多左咁多空間，多o既程度竟然可以令到個肚有鬆位.... 我諗 bb 會鍾意多左位郁多於不安啦；至於拉扯臍帶，呢個又係同腹腔位置一樣道理，邊有拉得倒咁遠呀... 再者，每個人胎盤生o既位置都唔同，而且 bb 位置一直會變，條臍帶咁長，好難俾你郁兩下就拉扯倒。