捱左 30 個禮拜，終於放產假喇 !!! 前兩日我已經諗定我要開個 topic 叫「快樂的產假」，辛苦左咁耐，都冇咩好再驚同擔心啦，未買o既野，呢幾日去買都仲得，未做o既野，都唔係呢一日半日做得完啦，公司o既事，同事要識就識，要唔識我都愛莫能助，我個肚你地都睇住大架啦，都知道遲早要靠自己格，仲要一路都唔學識自助，仲咁依賴我夜晚十一點幾都仲叫我幫你影印放大係你o既問題。之前我都有擔心過我 d 野全部手板眼見功夫，教識晒你地兩個半月都唔使我，我放完產假會唔會唔使再返工? 而家經過左呢個幾月 training 同 handover，我覺得係，我唔o係公司佢地會好唔掂。
可以的話，我都真係幾想睇番我過去呢六個月放工時間o既記錄。尤記得o岩o岩知道有左時，我真係有努力過話七點前要收工。有一日真係一夠鐘就鬆人，o係 lift 口遇著隔離 team 大部份時間都早收工o既同事 (但佢 office hour 好 cher 的)，佢知我平時係磨爛蓆人 (我 d 野通常都係臨近放工時間先湧埋o黎)，所以問我「咦今日咁早走倒o既? ^^」，我當時仲答佢「我由而家開始盡量都唔會同佢搏老命架喇 ^^」，呢個同事當時仲即刻估倒我有左。就係早左o個幾日，我又開始地獄式o既工作生「捱」。首先係老細係咁升 d 同事時就成日話自己 team short staff 就要我頂埋人地 d 野，之後又隊左個 annual big project 俾我跟，我當時已經講明話到我個 project 進行得如火如荼時我就要其他人接返o個 d 野架啦，到個 project live 時老細都仲係話其他同事好忙唔「幫」得倒我，我要自己做番晒，到後來請左新同事，明明行 mentor system，但o個 d mentor 竟然個個都好似旨意我 train 晒咁，到老細升左職、二老闆坐正，搞到秘書鬼死咁忙安排唔倒時間同我 handover (因為深o既野都係 handover 俾佢，淺o既先係 handover 俾其他同事)，最慘係秘書到知驚o既時候就係咁o係打咭收工時間先話「不如我地開始囉」，搞到我本來已經忙到冇時間食下午茶點知連晚飯都冇得食....... 我過去呢一個月係驚的，因為其中一個新同事 train 極都唔識... 已經日日o徒緊我時間，其他同事又好忙冇時間早早地同我 handover，我上個禮拜特登開會時講「我返埋下個禮拜就放假喇」，到我星期三晚 (因為星期四去健康院請左假) send sick leave email 時話「我返埋後日就放假喇」， d 要跟我野o既同事先識驚，我當然盡量就佢地時間同佢地 handover 啦，始終我放產假對佢地黎講都係無妄之災，我都有 d 過意唔去 ....
anyway，總之琴晚死 cher 爛 cher 終於叫做 handover 晒喇。點解琴晚咁夜? 一來係琴日超忙 d 野好似做極都做唔完咁，二來係秘書仲爭一樣好緊要o既野未學 (其實我都唔係好明，點解佢情願學晒其他野先，都唔早早地先學呢一個? 其他佢都 practice 過晒喇，偏偏呢樣最重要o既野佢只係睇我做，冇 practice 過，唔驚咩??? )，所以琴晚八點幾先開始做呢樣野，講完都已經十一點幾.... 再交低埋其他濕星事，報告埋俾佢知我同其他同事o既 handover 結果，都已經十二點，再清埋 d 手尾，咪就點幾囉.....
沒有留言:
張貼留言