將要滿兩歲了

日子突然間過得好快，喺張羅緊聖誕假活動 (本來想再去台灣) o既時候，突然間發就發現原來同時間小小就要滿兩歲了！

過去兩個幾月，大家都好忙，忙住年尾o既旺季，忙住關注雨傘運動，帶小小出席o既活動多左，包括去朋友屋企、去生日會、去結婚註冊、去海洋公園、去動植物公園、見幼稚園、等等等等。小小而家係一個小小朋友 (little child)，同時間係一個大 BB，仍然每一日都有驚喜俾大家。

說話

目前小小已經蛻變成為一個會說話o既小朋友，可以講倒好多半完整句子，包括掌握得最好o既「返屋企食奶奶」同「你返黎拿 / 我返黎喇 / 聽日再玩過啦」，其他包括「我唔食飯飯」、
「(個波)交俾爸爸」、「拖住媽媽」，二元句包括「除圍裙」、「食米粉」、「飲水水」等，不能盡錄。

大肌肉運動

最近開始跑得好左，成日慢跑，最點係冇咁容易跌喇，有時可以放心由得佢跑，唔使好似以前咁跟到貼。

上樓梯冇難道，經常可以一口氣行完整段樓梯，但當然都要扶住或拖住借力。落樓梯則一兩級可以 (亦經常) 自己落，唔使扶，多D梯級亦可以拖住/扶住行得完。

擒上擒落已經係高手，婆婆亦開始密切監察住擒窗o既可能性。而晚晚要自己搬張櫈仔入房用黎駁腳爬上床，又要搬櫈仔入厠所駁腳上高櫈一齊刷牙，總之自己上得到就會要求自己上。

小肌肉運動

鍾意畫畫，雖然唔係畫緊 d 乜，最鍾意你 mark 一點之後佢又跟住畫落去。大約係個多月前開始，婆婆開始俾唔同o既豆佢玩，又倒又執咁，好鍾意。未夠力夾衫夾，但可以同你配合一個拎夾一個拎物件再夾住。

關於串珠遊戲︰ playgroup 老師成日強調要玩串珠遊戲，我都有好一排諗緊搵咩俾小小玩，因為唔想玩太多買返黎o既玩具 (事實小小平時亦係鍾意玩我地 d 野多過玩買返黎o既玩具)。誰知有一個周末同爸爸一齊同小小玩公園時，爸爸話原來小小較高前已經開始執地下 D 針葉黎玩，一枝枝咁穿入個 sit up 板，咁即係唔使特登諗呢樣野啦。

飲食

完全係食大人野啦，喺屋企平日得婆婆同佢食飯時，都會有 D 菜係特登煮林 D 俾佢，但星期六當舅父舅母返黎食飯時，就都係食我地大人食嗰 D 餸。出街食的話，有時冇烚菜都係唯有照食，至多食少D，


媽媽話

話說︰小朋友是一張白紙  / 小朋友是一個空罐子
小朋友果然係一面鏡，喺養育小朋友o既時候，最受到教育 / 最需要受教育o既果然係父母本身。越來越有意識o既小小完全像海綿一樣︰有一次喺商場出去，我唔夠力開玻璃門，加左隻腳幫，小小隨即伸出佢隻腳；我最近改口講 shoot (shit)，有一次一 shoot 小小即刻 shoot；爸爸同嫲嫲大聲對話 (通知係因為拗緊)，佢會走埋去 shuu~。

最近爸爸換左新電話，我地玩佢個電話時睇番一年前小小 D video，小小原來呢一年間已經大個左好多好多，一年前佢仲係啱啱學行，幾個月前佢仲係好短頭髮，而家會叫住跑來跑去，頭髮突然間好長，開始自己唱自己o既歌，就黎識踩單車，唔知係咪跟我嗌「媽咪」(以前佢叫我做「媽咪」，但最近久唔久會叫我「媽咪」，而我係叫我自己媽咪做「媽咪」的)，成日好似鸚鵡咁直 DUP 我地講o既野，我知道，佢將會毫不留情咁 COPY 我地o既習慣... ... 而家明白，點解某個 friend 喺佢個女面前連「正呀」都唔講。

我會加油的 !

再戰海洋公園

本來去海洋公園慶祝爸爸生日（搵野黎做 hahaha），事後先發現原來當日仲係小小滿22個月嘅日子！

呢日唔想太夜走，所以只係睇左好少地方。上次唔知點解見唔倒熊貓館，去完亞洲動物館仲以為唔見左安安佳佳，原來安安佳佳係冇搬屋的。今次幸運見到佳佳出左黎伸懶腰。因為小小認識左 mashimaro 之後將所有熊樣嘅動物都叫做 maro ，所以我地指住熊貓同小小講好多次「佢係熊貓，唔係 maro」。最頂癮嘅係，第一次入熊貓館時小小冇乜反應，我地以為佢冇興趣就出返去，點知小小指住出口隻假野係咁叫 maro呀 maro呀，我地趁冇乜人再入返館，佢先發現原來佳佳喺度 ;P

之後去今次嘅重頭戲--海洋劇場。爸爸滿以為同媽媽一樣鍾意睇 discovery 同 animal planet o既小小會好鍾意睇，點知，當d 海豚游出黎頂波時，小小竟然露出呢個不安o既表情，我觀察左佢一陣，佢有睇緊 d 海豚，同時亦表現得越黎越不安，最後仲流出眼淚要過黎我度 (本來坐喺爸爸度)。我喺度諗，唔通連佢都睇得出海豚本來唔應該係咁 ? 小朋友真係好神奇。

(寫左開頭之後放低左，隔左整整一個月先求其寫返個結尾post出黎....)

 

好耐冇寫 blog 了，唔係冇事發生緊，而係前排身心都疲累於關注佔領運動，初時連小小嘅訓覺時間都夜左，因為要睇十點播嘅整點新聞。

最近同小小爸爸研究觀察，覺得小小對動詞嘅掌握好過名詞，我諗諗下，我地平時確實係會係咁講我地做緊咩，可能比較少形容周圍有咩物件。

由八月開始星期六返一個鐘頭 playgroup，已經返左三個幾月。由最初唔係好知道發生咩事，到近幾個禮拜開始知道點玩

瘋狂的波波池

上星期日同小小去左佢人生中第二個小朋友生日會。

上一次嘅生日小朋友係兩歲。由於小小都係食大人食物，只係要揀口味清淡o既就食得，媽媽就自以為 lunch 生日會都應該會有啱生日星食o既野，就會o岩小小食，就冇諗過要帶野食去。現場所見除左其他比小小細o既小朋友係食自己飯之外，連生日星都係食自己粉..... 中伏了...

結果小小係只得炒飯食得，同少少芝士焗西蘭花....

今次生日會係爸爸朋友o既 BB 一歲生日，爸爸見媽媽上次中伏了，所以直接問朋友攞 MENU 睇睇，果真都係大人濃味食物，所以今次帶咗小小好耐冇出動o既飯壼，又係簡簡單單煮少少菜同烚隻蛋。我地早左去到，12點半就到咗，但見場地未有耐搞掂，咁啱間房連住o既 BBQ 場冇人用，天氣又好，我地就出咗去俾小小開餐，小小食晒成集烚蛋 yummy yummy，再喺出面跑咗一陣先返入室內，室內已經準備好細波波池同一地氣球，小小淨係玩波玩到散場，都幾好呀  ^^

滿21月雜記

整整一個月冇寫，甚至上次嘅草稿都冇繼續完成 v.v

說話

呢個月嘅小小又更神速進步。琴晚當小小已經食完自己嘅飯離開飯枱，對面屋姨姨返黎，小小走去門口指住，對細舅父講：「舅父你睇下，姨姨呀」

食飯嘅時候，佢搶住攞筷子，然係「呢個媽媽嘅，呢個婆婆嘅，呢個小小嘅」，指住坐緊張櫈又再講多次。刷牙時我地成日教佢每人都有自己o既牙刷，公仔又有公仔o既牙刷，唔可以 lo 亂，又由於佢成日搶我地o筷子，我地亦有成日講「呢對筷子唔係你架，呢對先係你架」，而家睇咁o既情況，唔知會唔會教到佢o既自我意識好高呢.... u.u 不過都冇得諗咁多喇，總好過佢成日諗住用自己支牙刷幫公仔s刷牙啦.... 佢而家越黎越多野講喇，越黎越好笑 LOL，聽過佢講「返屋企食奶奶」 (因為好多時佢喺婆婆度話要食奶，我都話返屋企先食，有時又會同佢講「而家返屋企跟住食奶」)，又會講「搵爸爸 / 爸爸唔喺度」，爸爸之前炒車好多紗布，佢會指住紗布話「整親呀~」，又會弓字步咁指住自己個頭 (幫佢戴左頭cool或髪夾)「靚靚」等等等等等

活動能力

小小仲係一個細隻B。前排特登的佢去運動場磅重，係剛好 20.0lbs。而家有得扶住上落o既樓梯係冇難度，但因為起跑多左，反而仆過幾次應一應o既，所以要時常提醒佢上落樓梯要拖住，同埋唔好喺斜路跑。

前一兩個月仲係開唔倒擰蓋 (主要係罐雪花膏)，最近已經收放自如，去到 playgroup 中心個厠所仲識開擰o既水喉 (但唔識閂)。

好想自己著鞋，但對 dr kong 係腳內外側都有魔術貼但又 wear 晒咁，正苦惱緊係買咩款先啱，有諗過係咪應該買 slip on 等佢可以自己著得到..... 未諗掂.....

識配合著褲，首先要踎喺佢旁邊俾佢扶住，然後佢會起腳，就幫佢穿到底，之後佢會放再起另一隻腳，入晒兩隻腳之後，佢會自己 yau 褲，我就會同時幫佢抽住後面 (因為條尿片會太太頂住)，爸爸就會由佢自己 yau 好前面再幫佢整後面。

食

好鍾意食杏仁，去到婆婆度會指住個玻璃樽叫「咬呀~」

其他屋企餸基本上都會俾佢試下，但星期六日時出街食有時都係唔太多選擇，其實唔係怕佢咀刁，而係怕太咸對佢身體唔好。

所有俾佢食o既野都仲有剪碎，一來要剪細到一隻匙羹裝得到，佢先能夠自己畢得到。另外，爸爸亦喺屎片度發現小小曾經掂吞雪梨.... 所以暫時都係繼續剪剪剪，後悔小小仲係食奶B時曾經話過人地剪野食俾佢歲幾個大B。

2014年10月1日。明日將踏入1yrQ4

今天是一個特別的日子，除了因為今天是雨傘革命 umbrella revolution 下的十一「國慶」以外，更因為小小明天將要踏入一歲第四季，而且媽媽因為放假見識了她的進步神速。

小小的語言發展一直達標，所以在語言部份媽媽一直都很放心，因而少有地沒有去爬文研究發展階段。大約一個月前我們已經確定小小是可以完全理解我們所說的話的，而小小亦常常很快的模仿我們的說話，常常笑得我們合不攏咀。後來她漸漸發展出自主的對白，除了較早前已經懂得的、在我踏進婆婆家門時會跟我說「洗手洗手」以外，後來會在我入門口時說「返黎喇」，至近日樓下商場有好幾間商舖易手開張，我帶了她一次「我地去睇花花，好唔好?」之後，每次離遠看見那些花籃都在叫著「睇花花」，但這些都是二元句子。自從她的句子範圍越廣，而且知道她意識漸強之後，我常常提醒自己要多和小小說話 (因為我在沒事時都懶得說話，例如以前我便很少在和小小走在街上時旁述身邊的事物)。有時放工心情好時，我會對小小說「攬攬先」，發現她其實有時會好期待我回來抱她，有一次當我問她「你食左飯未呀?」，抱著我的她咀仔在我肩膀位置說「食左飯呀」，感覺很可愛 ^^

今天晚上她吃完自己的晚飯已經離開飯桌，我和婆婆還在慢慢吃著，然後她走過來說「波波唔出黎」，我內心「叮」了一聲！二元否定句！而且她主動走過來告訴我們，目的更是要求我們幫她把掉到某處的波波救出來！以後她都會拖我們的手帶到她需要我們出手的地方。

四個波波都在手上之後，她要求我在某個她指定的點坐在地上，然後她要我和她互相交波，她已經發展出一個遊戲，雖然我們平時都會這樣和她對坐交波，但我經歷由她主動要求是第一次 (意思是，我思疑對著小小時間比我長的婆婆和爸爸其實可能一早已玩過)。

小小自從頭髮越長越長之後，越來越不喜歡洗頭，有時婆婆會作罷，而我因為知道婆婆 weekday 很難幫她洗頭，我 weekend 通常都強洗 (我們都不是用洗頭水洗，只是用沖涼水洗，有時當小小的頭髮油到不行，我才會把沖涼液當洗頭水洗)。今天沖涼時，小小自己把紗巾往面上抺，在我趕著大讚她的時候，她把濕漉漉的紗巾抺到頭上，我再加碼激讚她之時，她再用紗巾抺自己的頸和屁股!!!!! 讚唔切咁多 spot !!!!!

剛才臨睡的時候，食完奶小小並沒有立即睡去，但我仍然在扮睡引她。我咪起眼看見她在自己用手比劃著，我在好奇這刻在小小腦裡面的對白是什麼呢？究竟她的內心世界現在是怎樣的呢？她在用甚麼語言在運作呢？沒有人會知道，除非我們有能力知道自己三歲前在搞什麼 business :P

P.S. 這陣子因為傘子革命寫很多正字 (i.e. 沒有寫很多廣東話)，放催淚彈和在電視看到香港警察向著市民 (我一直都拒絕叫他們「示威者」) 舉起「否則開槍」的橫幅那個晚上，我寫了一個電郵給末來的小小，請她在讀到那電郵的時候告訴我歷史(將)是怎樣評價這事件，那時外國傳媒還未創造 umbrella revolution 這個名字。這個名字多浪漫。很多很多畫面都是本該在電影裡的一幕︰一個全副武裝的人站在馬路雙白線前舉槍描準；天橋上飄落一把又一把打開的雨傘，是天橋上的人把傘拋給在地面給胡椒噴霧攻擊的人；一個年輕老師記錄他那天吃了人生中第一顆催淚彈，然後同一天他吃了人生中第七顆催淚彈(這「吃」字是他的用字)；小小爸爸那個很熱血的侄仔 (寫到咁複雜~ 即係小小個堂大佬囉) 在催淚彈向人群飛的時候在場，然後他在 facebook貼了自己包著保鮮紙的自拍相報平安。一切一切都很不真實卻確實發生著。

又拉遠了... 香港晚安

踏入月齡20

原來前日小小已經滿20個月大。

踏入月齡20嘅小小進步神速。三個禮拜前舅母買左新嘅故事同圖畫書俾小小，每個週末黎婆婆屋企晚飯嘅時候都興致勃勃咁同小小讀圖書。密集式嘅幼稚園讀書是咁的：揭開書，將所有事物都讀一次
太陽太陽
青蛙青蛙
蝴蝶蝴蝶
花花花花
兔仔兔仔
狗狗狗狗
。。。。
。。。。
企喺旁邊睇，好好笑^^

喺過去一個月，越來越見小小嘅語言 pick up 得好好（請問 pick up 中文應該點寫？），可以講係每一日都有新驚喜。18月返健康院時姑娘先啱啱對小小能夠講：“爸爸，羹” 呢個二元組合表示滿意，後來有已經寫過嘅 “俾你丫，俾我呀”，仲有 “抱我呀” “抱你呀”，再後來會喺我放工返到婆婆度時講 “返黎拿”，上星期有一次見到佢睇健康院本書仔時講 “媽媽抱BB”，嫲嫲話佢地睇某一本雜誌時會話 (幅相) “BB冇著衫”，琴晚我喺門口攞鎖匙時，婆婆話佢喺厠所邊走出黎邊講 “媽媽返黎喇”。可見佢其實已經可以掌握三元組合。

19個月回顧

眨下眼又一個月。喺18-19個月之間，小小可以話係進步神速。首先係突然間講多左好多野，而家會講「冇晒 (食飯時想食我地個碗嘅飯)」，「坐低 (同佢沖涼時)」，「冇左 (熄電視時)」，「一二三 (倒數熄燈訓覺)」，嫲嫲爸爸「早抖/拜拜」(仍然係會臨訓前講拜拜)，指住埋緊站嘅巴士小巴表示車到，除左久唔久會叫你抱佢之外，見到你戴揹帶會走過黎嗌「揹我」，會指住放餅嘅地方狂嗌「餅餅」，指住果仁罐再指住自己個口嗌「咬 (表示要食果仁)」，會望對面屋一大輪之後話「叔叔唔喺度」，會指住窗出面話「落雨」，好多好多，多到我都開始唔記得咁多。

講

8月9日嗰個星期六返婆婆度食飯時，婆婆同舅母講話食完碟菜廚房仲有，小小係咁伸手食晒碟裡面 d 菜之後，遞隻碟俾婆婆嗌「婆婆」，我地成枱大人呆左，然後哈哈哈喺度大笑。之後婆婆裝滿碟菜出黎，又俾佢食晒，佢再遞隻碟俾婆婆嗌「婆婆」，婆婆話「冇喇~ 食晒喇~」好搞笑，亦證明佢真係聽得明晒我地講乜。

有一次喺屋企樓下見倒蝴蝶，由於隻蝴蝶喺玻璃入面而我地喺出面，所以我地好近距離咁睇左隻蝴蝶一陣，就係呢一陣，小小就深深咁記住左蝴蝶係點樣，之後個幾日離遠見倒都識得指住同講得出「蝴蝶」。

Playgroup

8月開始同小小返 playgroup，只係星期六下午嘅一個鐘，主要係想避開同嫲嫲獨(同)留在家 (爸爸要返工)，第一堂由爸爸去上，聽佢嘅複述好似冇乜野，但。第二堂到我去上時，其實係忙到嘔。我目前嘅睇法係：小小實在太細喇，希望上到尾會知道/明白多 d 做緊乜野。

運動

搣厠紙

小小六個月大時已經開始搣厠紙，搣到今時今日（搣左年幾）已經練得爐火純青。後來識得喺我地放厠紙嘅地方（放卷紙喺櫃桶入面再吊一條出櫃桶出面）扯厠紙出黎，再發展成揸住第二格令自己可以淨係扯繼一格出黎搣。而家同佢一齊入厠格，佢會拎定厠紙俾你。有時喺屋企同佢坐bb厠板（雖然從來都冇成功過），佢一坐上去第一時間新係伸手去攞隔離卷厠紙，令爸爸發展到一抱佢上去坐定新先拎開卷厠紙 XD

跑

之前小小曾經好鍾意我地有人兩邊拖住佢然後佢就起跑，滿19個月之後，佢已經練成左自己跑喇！雖然唔係跑得快，但絕對係跑緊，尤其是追雀雀時就跑得最好。佢都識踢波，但就硬係對踢波冇乜興趣，好多時我拎個波落遊樂場時都係借俾其實小朋友玩為多。對追吹泡泡係零興趣，而係有興趣吹。

上落樓梯

上樓梯有時甚至唔使我地拖，如果係好濶先一級矮級嘅地方，佢已經可以全部自己行晒（上及落），所以有時來往婆婆度時會 kick 住左喺呢個地方走唔倒，佢會不停自己喺度來回。

寫住咁多先啦，唔係寫寫下又寫幾個月喇 :P

嘔

爸爸買嘅呢條食飯兜兜又一次立大功！呢件兜兜喺小小開始食固體食物時已經買左，當時係諗住搵一件有袋嘅食飯衫俾佢食橙時接住滴落黎 D 橙汁，但爸爸去嗰間舖頭只得呢款兜兜，冇有袋嗰種食飯衫賣，結果只好買左呢個返黎，但嗰時唔知係小小太細粒，定係我地唔識用個兜兜，兜兜頸圍太大，戴左之後谷起左，係就係兜住跌落黎 D 飯喇，但就係兜晒喺小小同個兜兜中間 -_-"

個兜兜俾我地放左入冷宮一排。唔記得幾時媽媽突然醒起佢o既存在，於是又摷出黎試戴一下，結果係好啱用，頸圍喺下巴，條腰帶又啱位，如果小小要自己拎住個碗o既話，兩隻手同個碗都可以喺兜兜上面，有時就就算佢揼或跌匙羹都可以兜住。之前冇戴兜兜，出街食飯試過佢一路食一路跌，食到我一身都係又跌到一地都係，搞到我同爸爸執又唔係唔執又唔係，超唔好意思。自從兜兜變得啱 size 之後，除左落樓下食早餐之外，出街食飯必備兜兜。

琴日星期日，終於啱時間拎以前冰落冇食 d 奶出太子俾人整母乳皂，就順路去愉景新城睇得意動物餅。放左一個禮拜假，小小原來真係會好似平時婆婆講咁，一點左右就黎食飯先訓著，所以去到愉景新城時，我同爸爸就自己食左野先，諗住快快手食完就可以等小小醒左專心招呼佢。

唔知係咪我地傾計太大聲，小小突然一下醒左，咁我就幫佢戴兜兜，爸爸就去買餐俾佢食。然後小小 lur 左一大啖口水泡出黎，之後再一大啖口水泡仲有幾條朝早食嘅米粉同一舊蕃茄……

小小表情冇乜特別，仲周圍指指下話呢邊有bb、嗰邊有哥哥。我見佢好似嘔完，仲問佢飲唔飲水，同叫爸爸搵膠袋出黎裝住佢嘔出黎d口水，呢個時候我地都仲以為嘔。完佢會想食野，仲話買包包俾佢食，佢仲點頭表示“好”。點知下一分鐘佢就開始斷斷續續嘔一 d 清嘅、深黃色嘅水出黎，而且大力到我要用手扶住個兜兜，確保個兜兜接得住。

到呢一刻，我同爸爸都開始有 d 驚喇，我地決定立即返屋企搵醫生睇睇咩事。原先冇乜野嘅小小，喺呢個時候已經嘔到嗌住「媽媽」「抱你」(佢本來識講抱我，最近搞錯左做抱你)。本來問過佢食奶好唔好，佢話好，但我地去到換片房同餵奶房再問佢時，佢再嘔左一啖跟住已經冇晒心機。

好彩今日爸爸有揸車，好快就返到屋企附近。喺車上小小醒醒訓訓咁，我仲變態到隔一陣就 check 佢脈搏。第一站落車時，問佢要唔要飲水佢話要，點知啜左幾啖之後又立即嘔返出黎。原來星期日好多醫生都冇開診，最後都係要返去屋企樓下成日都冇人睇（係同隔離診所成強烈對比的）嗰間診所度睇。喺診所度等時，小小已經醒番多 D。

入房見醫生，醫生話佢喺嘔之前冇扭計冇喊，即係應該唔係肚胃炎。之後我再補充話「唔知關唔關事，佢今日已經第三日冇疴屎」，醫生立即就定呢個為病因，話要塞藥通便。本來我都唔係太想，就猛問小小「你要返屋企試下自己疴臭臭，定係我地而家幫你塞藥呀？」，呆滯o既小小當然係零反應啦，點知摷左好耐之後，姑娘話得大人塞藥，醫生仲猛話照用，我心諗︰你係咪痴線架????????? 佢甚至唔係小朋友呀!!!! 係 BB 黎架 ja !!!! 於是我就大條道理話我地返屋企睇下佢疴唔疴得出先再決定塞藥。醫生仲另外開左止嘔同通便藥水俾我地拎返屋企，話如果塞藥唔得就食藥。

返到屋企問小小食唔食奶，佢話食，點知食左一邊起身轉另一邊時，佢就嘔返晒出黎。於是唯有抱住佢同係咁同佢講︰「屎屎，屎屎，快 D 出黎啦」，佢扭多左一陣就訓著左喇。訓左大約個零鐘，我地食食下飯佢就醒左，一醒就好苦咁話「抱你呀」，我亦喺佢醒o既同時間衝入房抱起佢。小小訓醒一覺精神左好多，仲同婆婆一齊食左幾啖粥，識得笑番，仲想攞菜心食，係我地唔俾佢攞 jet。之後飲左一枝蘋果汁，就疴左屎屎喇 !!!! 夜晚返到屋企同訓覺都正常返晒喇 ^^

吽牙

差d唔記得應該要記返低呢件事，就係小小嘅吽大牙嘅經過喇！

話說小小喺準時6個月開始出齊4隻門牙之後，其他牙一直冇動靜。我有時醒起又揭下健康院本書，會喺度諗：d牙會唔會趕及喺個月齡範圍裡面出呢？定係其他牙會好遲先肯出黎呢？

然後，喺某一日開始我地發現小小開始持續地疴一d好奇怪嘅屎，首先係佢一日會疴好幾次屎，有時水嘅成分仲會好多添。到後來屎嘅味道好奇怪，唔係平時嘅臭屎味，係一種菜湯嘅味。點解我會咁記得呢，因為有一晚餵奶時聞到嗰陣味，我仲覺得好奇怪以為自己幻覺，到小小食到訓著左時，我哄埋去閒，陣味係喺條片度黎，一揭開就係d奇怪嘅屎。到天光食奶，佢一醒就疴，又係個種味。試過半夜我醒左，又係要同佢訓住換片又係嗰種味嘅屎。初初一兩次我仲驚係咪飲左太油嘅菜乾湯，所以疴，但好幾日過去都仲係咁，就應該唔關事啦。

我每晚都同婆婆交換屎片嘅情報，高峰期試過條條片換出黎都係因為屎。婆婆嗰排要以煲粥為主，佢話食粥止疴又補充。小小疴屎嘅程度係我同爸爸經常嘆：都已經唔係食好多野，點解有咁多可以疴?!! 我講笑話佢嗰d係宿便

除左每日向婆婆查詢屎片數量之外，我都會問佢小小精神如何、訓覺如何。我地一致嘅共識係：精神又玩得，就唔使太擔心。所以一直都冇打算要帶小小去睇醫生（大家千祈唔好學我…）。

到有一日，爸爸抱過去時，婆婆話一接手已經感覺小小有d慶，當日婆婆有久唔久同佢探熱，但唔肯定自己探得啱唔啱，不過佢話小小除左有d慶，其他大致正常。每次遇到呢d情況，我都會猶豫第二日好唔好唔返工。返到屋企探熱，都唔算有發燒嘅，就繼續觀察啦。但嗰排小小確實係心情唔太好，婆婆話覺得佢扭抱多左。

然之後，喺短短個零兩個禮拜之內一次過出現晒上下左右4隻犬齒同小臼齒！之後我地就開始換毛牙刷同佢刷牙喇（之前係用橡膠頭牙刷）

第二堂 playgroup

繼上個星期嘅爸爸專屬日之後，小小又返黎我手上喇 u.u

今日開始由我同小小去上 playgroup。上次爸爸講到咁輕鬆咁好玩，原來實情係忙到傻的，短短一個鐘頭入面有好多個 task。

上完我嘅第一次親子 playgroup，當小小完全唔聽指令然後導師又猛咁話唔可以俾佢走開時雖然係好氣餒，但搭車返屋企時我喺度諗，其實小小係比上不足比下有餘，playgroup入面佢係最細嘅BB之餘，據爸爸所講估計全部小朋友都係舊學生，因為有d冇戴名牌嘅小朋友導師都知道佢個名。小小確實係唔聽指令，亦控制唔倒佢喺大家企定時企、坐定時坐、跳舞時跳舞、音樂停時停，但眼見其他小朋友其實亦唔係跟到晒全部指令。

p.s. 呢個 playgroup 指明要父母其中一個陪同，原因可能係要平時唔係主要照顧者嘅佢地都要學習管教自己小朋友，但經過今日，我深深覺得應該搵一個唔使爸爸留喺班房入面嘅 playgroup XD 而家明點解香港家長要幫小朋友報讀十萬個興趣班：因為佢地自己要放假呀!!!! XP

到 PolyU 捐奶

“捐” 呢個字唔係咁準確，其實係我交 (contribute) 左 d 奶俾 PolyU Applied Biology & Chemical Technology 嘅一位教授做一個以香港媽媽為基數嘅母乳成份研究。

項目意在研究香港以海產 (主要指魚類) 為一重要部分嘅飲食習慣如何影響母乳嘅成份。雖然我好想參加，因為餵人奶真係一件好唔容易嘅事，既然我做到左，都會好想為讓更多人正確認識呢個題目而出一分力。

我算係搭倒尾班船，因為之後再見倒 baby kingdom D post 已經話唔再收人。不過我為左呢件事都忐忑左好耐，事緣本來想約下午去，咁我可能以「睇醫生」為藉口祟出去，又唔會太影響小小個糧倉。但我係一個好怕請假同曠工嘅人，又驚到時有 task 在手行唔開，所以為求良心過意得去，最終都係打電話去改左星期六，但星期六得返 10.30am... 於是又要擔心朝早俾小小食晒泵唔出，又要擔心小小唔俾我出門口，最終係當返工咁，一食完早奶趁佢翻訓就自己出門口先；之前嗰個星期二又要喺公司捐血，好擔心俾左 d 渣。野人 :P

準時10:30去到 PolyU，簡單對一對資料之後兩個 research asst 就放低我喺房泵奶。以前係用“舊”款 Avent，但喺我泵左幾個月之後出左新款，連 parts 都即時被淘汰咁濟，當時我仲心郁郁諗下好唔好買左新泵。PolyU 呢度當然係新款，我仲滿心期待一試，點知其實都係冇乜特別，我甚至覺得好似舊款其實仲好力 d，亦唔覺有廣告所講咁樣 “可以 sit back 唔需要烏前個身”。

死纏爛打左成個鐘頭有接近40ml，期間仲同個客講左十幾分鐘電話 XD，卒之個 research 打黎問我咩環境。之前話要 100ml，到嗰日見面時話要 50ml，我喺電話度同佢講話“其實我泵完架喇XD不過喺度垂死掙扎緊”，佢話其實都夠喇，因為做一次 lab 要 30ml，想要多 d 係因為驚有咩搞左錯都有得重做而已。

之後就去做過去三個月飲食習慣嘅問卷，成個 test 就完成啦！做做下問卷時，爸爸同小小亦都上到黎 lab 喇，於是我地就去搵飯食。題外話：原來而家要喺 PolyU 搵食係好艱難的，一來暑假，二來仍開門嘅 canteen 都要學生証先俾入。

之後就去做過去三個月飲食習慣嘅問卷，成個 test 就完成啦！做做下問卷時，爸爸同小小亦都上到黎 lab 喇，於是我地就去搵飯食。題外話：原來而家要喺 PolyU 搵食係好艱難的，一來暑假，二來仍開門嘅 canteen 都要學生証先俾入。

教授話做完呢個人study之後會做一個 target 奶齡6個月以下架。希望佢會繼續成功啦！

俾你丫。俾我呀。

小朋友真係好奇妙，上一刻先好努力咁分辨緊屋企唔同嘅人，下一刻就識得指住話你知佢嘅頭、眼睛、耳仔、鼻、口、手、腳、面面係邊度，最近仲話你聽背脊同頸係邊度，媽媽見小小咁勁諗住教埋膊頭、膝頭，但因為都有個“頭”字，難度比較大，小小以為都係講緊佢個大笨頭，好得意^0^

講重點：早兩個禮拜歲半返健康院時，姑娘對於小小識講「爸爸，羹」咁將兩個詞連起已經好欣賞（其實只係可以 tick check list 冇問題咁解 :P），星期日嘅爸爸專屬日2，夜晚一齊搭巴士返屋企時小小將佢手裡把玩緊嘅紙巾團遞俾我話「俾你丫」，我當堂呆左望住爸爸，心裡係好興奮嘅感覺。估唔到小小突然間好似開左制咁。

好耐之前我以經會用風筒離遠吹小小，當時係諗住俾佢感受下 d 熱風，最近我會吹佢個頭，俾佢感覺下平時我喺度做 d 乜，有時仲會同佢一齊攞住個風筒吹。到呢個禮拜嘅某晚，我攞風筒吹頭，都未插電制小小已經走過黎話「俾我呀」。原來喺短短時間之內，佢已經掌握倒咁多短句字。

前幾日有一晚唔知我有冇聽錯，我放工返到婆婆屋企，一入門口時彷彿聽倒小小話「你返黎拿?」，而婆婆亦應左一句「係呀媽媽返黎啦」，我諗我冇聽錯？但我地平時唔興咁講架喎，只係我自己會話「我返黎啦」咁。

咁樣回想，會覺得自己好似唔夠時間俾佢。我只係星期六日會對住佢長 D 時間，佢日常呢 D 表現，都係婆婆爸爸見得比較多，希望我冇錯過太多小小嘅成長啦，希望我唔係一個 absent mum 啦。

最鍾意用個茶壺將 D 野倒來倒去

爸爸專屬日

上星期六日都要返工。因為想婆婆都有得抖下，爸爸經歷左一個要自己湊小小嘅星期六，星期日先擺小小去婆婆。

呢日媽媽返到公司已經忙碌地投入工作，而爸爸就帶小小第一次參加 playgroup。終於等到三點九 playgroup 落堂，等左好耐嘅媽媽諗住打視像電話俾佢地睇下咩情況，點知打唔通，費事爸爸係 le 咁 hea 咁聽電話，就唔再打去喇。

一路忙，終於等倒夜晚九點爸爸湊小小出黎公司接放工。爸爸話呢日小小好合作，我地食完 lunch buffet 分別後，小小就喺地鐵度訓著左，仲搞到爸爸有少少緊張，怕佢一直訓到落堂。去到中心，爸爸原本諗住放平小小等佢訓得好 D，點知醒訓 + 痴抱o既小小一郁就醒，好在冇發爛渣，於是就入去上堂o既房。原來呢班入面得小小係第一次上堂，其他人係全部都叫得出名的，要「睇定 D 先會俾反應」o既小小俾導師話佢「咁唔得喎，要佢走出安全範圍先得」，點知爸爸話小小 warm up 左之後勁 high，落堂得返佢地兩個未離開班房時清潔姐姐入黎，小小狂同姐姐 say hi，氹到姐姐勁開心。

喺返屋企o既巴士上，爸爸教左我唱遊o既內容，話要喺屋企都繼續同小小玩，同埋下次上堂都會再唱，所以爸爸要教定我先，但我一直都記唔倒最後一句係點。爸爸話小小上堂好叻，爆左一句「咩名呀?」問搖搖板對面大佢一個月o既小朋友，令到對方媽媽都呆左，之後茶點時間，導師話派完一 round 之後如果再要就要舉手，小小當然唔識舉手啦，所以第二轉係派晒所有小朋友先要派俾佢，所以佢係最遲先食完，再加上其他都係大個 B，得小小一個要揹 (亦因為得爸爸一個，所以小小要長坐 hip seat，令到小小係最後走o既一個，不過小小表演左單手攞杯飲水，又一次羨慕 C 大一個月 BB o既媽媽 (佢 BB 要人幫先飲得倒)。

離開中心之後，爸爸帶左小小去圖書館過冷河。爸爸大笑住咁同我講返呢個行程，佢話因為油麻地圖書館o既入口同出口係唔直通，入左館之後一定要經過書架先可以出返去，而小小全程保持安靜，仲喺爸爸從高書架攞書時自己伸手攞矮書架o既書，到辦借書手續時，管理員都冇認為呢個 BB 影響到其他人，令爸爸感覺非常過癮同自豪。

一上小巴，小小就訓著左喇，仲訓到返到屋企可以放落床，一直訓到七點幾先訓醒食飯，爸爸話佢連食飯都好乖，食完飯就搭巴士出黎搵媽媽喇。我地係咁讚小小好乖、好合作，希望佢聽得明啦。

18個月回顧

字詞/動態

最近認得晒所有屋企人，包括最早識叫爸爸，後來識叫嫲嫲婆婆，再某日識叫媽媽，然後好快就叫得出“虎”（舅父）同“母”（舅母）。

自從發現講到個“奶”字會快d有奶食，每次想食奶都可以清晰咁講倒（雖然冇左個n音）。知道玩開嗰幾隻公仔嘅名，仲識叫 BB （訓覺公仔）同“被”（訓覺包被），由大約三個禮拜前開始，會叫“被”同“BB”然後要攬住佢地先過黎食奶（熱c……）。

自置三輪車後，識得講“車車”要求爸爸帶埋車車落街。早餐攞倒嫲嫲分俾佢嘅麥皮之後，會同爸爸講 “爸爸, 羹”，某晚爸爸俾西瓜佢食，佢仲識講話 “爸爸, 叉”。

指住bb書認/講得出好多物件，包括橙，梨，蘋果，花，波，車車，貓貓，狗狗，馬，蛋糕，魚魚，兔兔，哥哥姐姐，BB，燈（嘩原來都幾多）。識得攞鞋同袜黎俾我地幫佢著，甚至識自己穿入去對鞋度 。會自己指住水杯要“隊隊”，一入門口會叫我去洗手，同佢洗完手會一邊自己叫“抹手”一邊走左去。

食

滿一歲後我地已經漸漸俾小小試食大人野，尤其是16月大時同佢去台灣，直情唔肯食我地自己喺酒店煲o既飯仔，反而同我地一齊食飯食得好開心，自此以後，我地直情個個禮拜六日帶佢出街食飯 (當然亦因為要避開婆媳對疊o既空間)，晚飯則返去婆婆度，所以小小而家已經係同我地食一樣o既野，只係避開多汁同濃味o既野，至於前炸野就冇俾佢食，甜品亦冇，我諗住等佢開始會認真刷牙先俾佢食添加糖o既食物。

而家係早晚奶埋身，早餐會有麥皮、面包、鮮奶粟米片等選擇，成日食蕉，滿左18月之後可以自己拎住食晒成隻，仲要自己連拎住，午餐同晚餐就睇婆婆食乜，下午仍然有奶粉，據婆婆講而家係開8安一滴都唔剩。

兩邊屋企o既反果選擇都唔多，目前我所知食過o既包括︰

成日食︰香蕉、橙、蘋果、啤梨

久唔久食︰西瓜、最近食車厘子仲識 lur 核

有食過︰奇異果、桃駁梨、哈密瓜同蜜瓜 (喺buffet食)、提子

原來唔記得 lu~ :P

飲水

小小係唔鍾意飲水o既小朋友，試過有一排用飲管杯可以叫倒佢飲幾啖，但之後又唔肯用飲管杯。之後佢識得揭開杯蓋，又肯揭杯蓋飲一啖，熟練左之後又唔肯飲，揭開叫你地飲。七月中嘅時候，有一個 weekend 狂要食奶，食到媽媽炆晒，之後我放棄喇……用graber蘋果汁開水俾佢飲……

怕水的小小

舊年夏天同小小去過一次泳池游水，印象中係好成功，媽媽仲搞得掂自己一個喺女更衣室同小小換返衫（因為家庭室排長龍），我覺得真係超額完成。之後爸爸成日話再去，但一係就提出時太晏，疊到食飯/訓覺時間，一係就當日天氣太涼，驚會凍親，所以特登買嗰包游水尿片只係用左一塊就擺左喺度。

今年端午節前，有一日的起心肝操左去嬉水池，仲好好彩咁等左一陣就有家庭房換衫，點知一出更衣室往面個門口，小小即刻雙腳夾實我，點試點講都唔肯掂水，仲越夾越實、越爬越高。之後都冇再提過想去試水，應該都係要等下年喇。

琴日朝早又灑左場兩，大人食完早餐之後，我突然諗「不如試下去沙灘踩濕沙 ?」，於是就出發去大清水。爸爸車去，如果到時真係唔得咪當遊車河囉。去到好好彩啱啱有人走 (因為已經中午)，所以有位泊車。我地落左車，一行人 (其實只係兩個半 :P) 浩浩蕩蕩咁操落樓梯去大清水。

本來唔想除鞋，但諗諗下「係喎，我都要試下 D 沙咩溫度喎」所以除左鞋。大清水 D 沙都仲係唔差，但因為人大左好多o既關係，大清水細左好多。由於我揹左小小喺我前面，所以我唔知佢係咩反應，爸爸則一直好努力咁 sell 小小落地同其他小朋友玩，然後爸爸講左一句「好好玩架 ! 」就衝左落水濕腳，最搞笑係小小同時發生「嗯! 嗯!」表玩唔好o既叫聲。同佢睇左一大輪其他小朋友玩沙玩水，佢依然係夾實個 hip seat，到臨走時，爸爸話臨走再衝多次落水，今次小小直情講出口、好清楚咁話「唔好呀 !」，佢真係好怕水 XD

急不及待的(未夠)18個月回顧

前排佢無啦啦開始會企喺人後面打人膊頭 (當然係個大人坐左喺地啦)，嘩~ 爽！琴日佢又無啦啦進化到同我玩伏哩哩，企喺我後面，然後當我擰向後時佢就哩去另一面，咁我就擰黎擰去都見佢唔倒喇，琴晚我仲配合埋「咦? 見唔倒o既?! 見倒喇 ! 」o既對白，小小玩到卡卡聲咁大笑。

以前一直都冇引佢跑，因為樓下遊樂場地方唔係認真大 (大o既位置就通常會有大仔喺度打波或踩車)，所以不嬲都係跟喺偃後面多。今日出左街，但一直都冇乜點俾佢落地行過，所以臨起程返屋企時經過一個屋村遊樂場，就俾佢玩一陣。我地冇喺sir滑梯嗰邊玩，放左佢喺健體嗰邊，有幾級樓梯同有斜路可以滿足佢行樓梯，又可以引下佢行下斜路。嗰度空地好多（設施種得好疏落，應該係留返多d位俾d老人家圍埋晨運），我同小小一齊行下斜路仔，然後跑兩步，佢又起步跟上黎，仲卡卡卡咁笑，好成功咁跑起上黎，雖然只係幾步，但都好穩陣。我同爸爸講，你嘅時間黎喇 ("your time has come" hahahah)，追嘅任務交俾你喇 ^0^

17個月回顧 2

行 / 大動作

小小而家嘅相幾乎全部都係無影腳，喺室內兒童遊戲室同喺屋企已經可以跑倒幾步，喺街有時都會行得好快，但就未至於會起步走。唔知係幾時會開始識跑架呢? 而家去樓下遊樂場時，好多時佢反而會冇興趣玩滑梯，反而走左去行樓梯。較早前去九龍公園個滑梯係矮級樓梯，佢全程自己上上落落，自己扶扶手，已經唔係我地幫，但樓下個滑梯上去嗰度係硬膠大網，所以佢唔可以自己上去，一定要由我地幫佢上去，有可能因為咁而令佢冇左興趣.....

上落梳化同床o既功夫已經掌握得好好，成日自己喺度上上落落，搞到婆婆好緊張。早幾個月時都試過直直由梳化/ 床碌落地，跌跌下咪學識點落囉，不過都花左 D 時間教佢，初時就係成日喺佢想落去時反轉佢個人，要佢趴住跣落地，而家佢就係咁落地喇，但因為小小已經又長高左一 D，所以有時佢落梳化已經唔反轉會正面落。

又，近呢一個禮拜聽閒佢開始跳落黎，我冇親眼見過但有聽過其他人講。一直以黎我o既主張係順應佢o既成長階段同需要給予探索學習o既機會同空間，而「由梳化或床跳落地」呢個部份.. 我未諗倒應該點處理..... 

由從小小行得好左，一直都想搵部單車返黎俾佢，一來俾佢自己踩下，二來希望有個「類BB車」俾婆婆帶佢出街可能輕鬆 D (但諗深一層，雖然唔使抱，但攞多架車又未必真係輕鬆左...)，點知有一朝落街玩時，有個姨姨見小小係咁研究佢架單車，就話俾佢坐下，嫲嫲又唔問下個孫、又冇多謝聲個姨姨，就夾左小小上架單車度，小小又唔願坐，又走返落黎，我返去同爸爸講︰「唔使咁急買單車喇」(後註︰卒之父親節爸爸就去買左架單車喇)

說話

大約3個禮拜至一個月前，小小有一晚突然愛上左「叫爸爸」遊戲。平時臨訓喺床玩時，有時爸爸返，當開鐵閘時我就會叫佢「爸爸返黎喇，你嗌佢入黎啦」，佢會細細聲講「爸爸」，我會話「你要大聲 D 爸爸先聽倒架」。有時爸爸入到黎下我地訓左未，小小會坐起身、指住佢叫「爸爸?」，跟住又會醒晒唔訓 (又搞倒我...)。某一個晚上，我地如常入房訓覺，小小突然好大聲運晒氣咁叫「爸爸~」，爸爸即衝入黎「係~」，出返聽之後，小小又運氣「爸爸~」，爸爸又衝入黎「係~」，如是者來回左幾次，來回左幾晚，我同爸爸講「佢唔會咁樣嗌好耐架 ja，你都係好好享受下啦」。

小小亦喺大約兩個禮拜之前開始識叫「婆婆」，聲同韻都正確，只欠 P 音讀成 B 音。有時撩佢講「婆婆」都覺得佢好得意 ^^ 有一次我地食完飯坐晒o係地下睇電視，劇情緊張關頭講到女主角個婆婆喺火場入面唔見左，我好緊張咁講左好幾次「婆婆唔見左! 婆婆唔見左!」，本來玩緊玩具o既小小放低 d 玩具走過黎我地面前，望住我、指住佢婆婆、用佢o既BB 話講左兩聲「婆婆?」，我先明白原來佢聽得明我講緊乜，所以覺得好奇怪，想話俾我知「你話婆婆唔見左? 婆婆咪喺度囉?」，嗰刻真係覺得好奇妙 -- 以前一舊飯o既人仔已經唔係一舊飯喇 !!

小小唔識講「媽媽」同「奶奶」呢兩個我一直都以為會最早學識o既字。曾經有一兩晚我好著意想佢開聲講「奶奶」而搞到佢喊，我嗰次真係心都痛埋，嗰晚應該係佢成功講倒一次個「奶」字，於是臨訓食奶時，我就話要佢講個奶字先俾食，佢一直都唔講 (好似硬頸咁)，然後扁咀跟住眼淚流出黎，除左跌親痛同攞唔想攞o既野喊之外，第一次佢咁樣喊，係好有心事咁喊，我即刻抱番住佢，但佢已經喊開左，我問佢︰食奶好唔好呀? 佢點頭，之後佢一邊食我一邊喊。小小可能同我一樣，都係一個好敏感，但又好怕不能掌握o既事o既小朋友。之後我就冇再逼佢講任何野喇。

第18月大發現!

原本寫緊17個月回顧，但決定應該要開個 post 講近日發生嘅事!

之前睇過話 bb 知道去邊度拎玩具嘅時候，就可以開始教佢收玩具。我床邊有個架，有半格之前用黎裝我同爸爸睇嘅書，後來演變成每晚臨訓小小都要揭一輪書先肯訓，當時當然係我拎俾佢啦。本來小小已經有一排冇臨訓摷書睇，琴晚佢表示要攞書睇，我就由得佢自己去攞，睇左一輪之後，我問佢“食奶未呀？”，佢點頭，我突然醒起問佢“咁我地張d書擺返入書架先食喎”，佢竟然又點頭，跟住我起你一本我一本咁放返晒所有書入去!!!!!! ^O^ 然後好開心咁食奶!

舅母送左d蠟筆俾小小畫畫，婆婆搵倒個啱啱好 size 嘅鐵盒裝住，但小小一直都唔係咁知道/鍾意放鐵盒，成日攞晒出黎玩跟住一地都係跟住就咁放入玩具盒（大盒）入面。琴晚臨離開婆婆度時，本來想同佢一齊放返蠟筆入鐵盒，平時會我一邊入另一邊又俾佢攞返晒出黎，但琴晚佢係自己張所有蠟筆放入鐵盒，仲 cum 埋蓋遞俾我  ^0^

琴晚爸爸又買左西瓜返黎，佢攞住個西瓜（未切）問小小︰"食唔食西瓜呀?"，根據爸爸o既描述，最初小小係搖頭的，但爸爸再問佢 "西瓜喎"，佢話小小好似記得返咩係西瓜，之後猛點頭，跟住爸爸就開始抱住個西瓜喺度耍太極，喺度講 "一個大西瓜，切開一半，一半你o既，一半我o既..." 然後就俾小小係咁伸手示意佢快 d 去切, hhahahahhaah。爸爸好多時都可以為小小配對白，好似好知佢講緊乜咁。

之前一直冇特登訓練小小，但上個星期六見舅母同佢指住 BB 書教佢入面 D 物件照片，佢學得好留心、好開心，琴日 (星期一) 我喺婆婆度等緊夠鐘時 (我唔會一去到即刻走，都會同婆婆傾一陣先)，同小小坐喺梳化度，就醒起攞本書同佢認下，估唔到原來佢其實已經認得好多野野喇 !! 當認主要都係一 D 平時佢都會接觸到o既野，倒如橙、香蕉、黃色鴨仔、花、鞋、貓貓、馬(唔知真定假... 其實真係見過馬... 而佢會指埋其他蹄科動物叫馬... 咁快識歸類.. 好勁...)、狗狗，唔單止係指住佢識講嗰樣係咩，而係當我問佢「鴨鴨呢?」佢會自己指住鴨鴨幅相。

當有實物時認得到，我認為唔出奇，平時都有攞住個橙問佢「食唔食橙?」，近兩個禮拜仲識聽指令攞鞋過黎俾我地幫佢手著 (買左新鞋後，佢仲可以扶住自己穿入去添)，近一個禮拜我叫埋佢自己攞對袜一齊著，佢都可以做得到，仲好大聲咁叫「袜」。

但星期六發現左一件令人極級擔心o既事.....

話說再對上一個 weekend 同佢沖涼時，佢已經好享受喺個沖涼盆（圓形的）度自轉，仲一路轉、一路自己喺度講「轉轉轉」，剛過去呢個 weekend 當我同佢沖涼時佢又喺度轉，正當我好開心咁同佢一齊講「轉轉轉」時，我突然醒覺到佢唔係發緊「於」韻o既「轉」音，而係發緊「衣」韻ｏ既「薦」音。我當時心入面響左一下雷聲，再聽再睇佢個口形，佢都係唔係「於」o既口形。我爸同佢嫲嫲都係講唔倒「於」音，係鄉下話o既問題。其實香港有好多老一輩人都係咁的，鄭中基好多時都會扮呢種音，「魚」會講成「椅」咁樣的。當晚大家喺婆婆度食晚飯時，我仲同婆婆講呢件事，叫佢要重點訓練佢講個「魚」字，小小咁鍾意食魚魚，照計冇理由講錯個「魚」字架，婆婆仲話係過渡 je...... x_x ..... 點知琴晚 (星期一)，小小話要睇魚魚(婆婆屋企有缸魚)，佢指住 d 魚，講「椅椅」呀!!!!!!!!!!!!!!!!!!!!!!!!!!!!!!!!!!!!!!!!!!!!!!! ooOxOoo

點算呀?!點算呀?!點算呀?!點算呀?!點算呀?!點算呀?!點算呀?!點算呀?!點算呀?!

好驚呀!!!! BB o既語言學習能力真係好強呀!!!! 而估唔到雖然冇錯嫲嫲係同小小講好多野，但小小竟然學唔識倒我地成日同佢睇魚魚同問佢食唔食魚魚，而學左嫲嫲指住地墊同佢講魚魚呀!!!!!!!!!!!! 而點解佢咁快 pick up 倒個語音系統，連「轉轉轉」都講成「薦薦薦」呀?!?!?!?!?!?!?!??!?!?! 點算呀?!?!?!?!?!?!?

(明明一開 POST 時係好開心... 點知寫尾時直插谷底.... 我而家超灰..... -_-""")

第一次用叉 / 17個月回顧

上星期五爸爸話見到百佳西瓜賣得好平，所以夜晚接左我地返屋企之後就落左街買。最初我只係用隻叉拮左俾小小自己食，拮左幾塊之後，見小小食得幾好，就索性俾左隻叉小小自己拎住試下拮，佢拮左幾下之後，好快就成功拮倒，仲好快食晒成碗! (@17m)

報導之時順便回顧一下：

飲

小小Q4時我地已經好心急咁買左 for 12m 嘅鴨咀，個鴨咀係配喺 avent 奶樽度代替個奶咀咁用，仲配埋兩個握手，可惜小小一路都用唔倒……。最近avent出左個 drink like adult 嘅BB杯，我一見到又係超想買，們諗諗下都係放棄左，因為真係唔知小小識唔識/肯唔肯用。個人意見係 avent 學習產品s真係設計得好好、好有智慧，但因為太聰明關係，屬於人夾人緣類型。

見鴨咀唔啱用，其時好心急要俾小小學自己飲野嘅媽媽，立時柯打爸爸上堂出開BB舖嗰頭就買個飲管杯。小BB果然本能係吸啜，其實佢係啜得到的，只係飲左好幾次都係水之後，又唔肯飲……

小小唔肯飲水，幾個月大時婆婆都係用匙羹質佢，因為用奶樽裝水的話佢會直情成個樽飛出去 -_-" 因為佢唔肯飲水，所以婆婆日日都煲湯，而如果係湯的話，小小係可以 googooogoo 咁飲得好快的。好似係一歲時我開始俾佢直接喺杯/碗度飲，有時佢有心機的話，試過可以好似飲勝咁抱住隻碗一飲而盡，係普通打得爛嗰 D 碗喎! 一碗喎! 但冇心機o既時候就真係嘥氣.....

最近天氣又熱、又出多左街，我地都會帶埋佢個飲管杯。我會成日問佢「要唔要飲水呀?」，如果佢點頭就即刻隊俾佢，佢都會啜一啖，我就追問佢「啜多啖丫」，佢又會啜多啖，如是者係咁問，直至佢真係唔啜同伸手閂埋個飲管杯為止。唉.... 我而家o既諗法係... 叫倒佢飲就飲，唔飲都逼唔倒佢啦.....

食 / 刷牙 / 牙仔

食野方面，已經冇咩 training 要做，只係視乎我地俾咩佢食。小小而家已經係同我地食同一煲飯，食一樣o既餸，不過都係青菜為主，婆婆通常都會有蒸魚，久唔久有唔用款o既豬肉 (例如煲湯豬肉，蒸肉片 etc)，如果跟我地出街食飯則有可能淨係有得食青菜，視乎間餐廳有咩肉類選擇同點 present，如果汁同肉冇分開就可能會冇得食，因為我通常都避免一 D 落左太多調味料o既野。之前主要都係食魚同豬肉，久唔久有雞肉，最近一次飲茶試左幾粒蝦，冇敏感情況出理，之後可以再試多 D 其他肉類。牛都有試過，但唔會常食。

冇俾過甜點佢食，茶樓o既奶皇馬拉蒸都冇食過 (過就有食過傳統啡色嗰種)。我o既時間表係︰到佢識刷牙 (意思係肯企定定刷牙) 先俾食甜野；到換牙先食雪糕。唔知咁諗會唔會太天真，諗住先啦。

水果方面，蕉同橙依然係小小o既最愛，有時仲會等唔倒我地搣橙，直接咬個皮，我同教幼稚園o既舅母講「都好，起碼佢知道 "橙" 係咁樣o既」 ^v^"   以前唔多鍾意食蘋果，雖然追住要咬，但佢會梅好耐都唔吞，然後會一次過 lur 返好多出黎，最近見佢狂食，可能一來婆婆買倒粉o既蘋果，二來佢開始o趙倒啦。

由個多月開始我堅持要小小每晚刷牙 (食住奶訓著除外)，因為佢開始懂事，想俾佢開始習慣刷牙係食完十點奶o既指定動作 (不過佢通常臨訓都仲要啜多次)，會俾支牙刷佢自己拎住，然係用紗巾抹牙，再由得佢自己玩牙刷 (仲會玩到成件衫都濕晒係口水)。

上個禮拜啱啱爆左左上隻臼齒出黎喇 !! 好快就要轉毛毛牙刷 !! 而家係用緊 pigeon #2 軟牙刷。希望佢好快學識坐定定刷牙啦 ^o^

奶

早晚仲係埋身，方便到爆燈 !!! 我唔知其他會俾訓覺奶 KO o既 BBs 係點操作，唔知如果俾小小奶粉會唔會 KO 倒佢，但我自己就覺得佢唔會就咁俾你 KO 囉 XP，因為小小通常食完都仲要玩喺張床度玩一大輪先訓。而家諗返，大約兩個月前左右佢都仲係會狂話要食，係後來我覺得唔對路，喺翻食左一次之後就唔俾佢再食，趴低佢拍佢同佢講：「你唔使食奶喇，你好眼訓喇」，好多時拍拍下都訓得倒。朝早就等佢叫要食奶，通常如果佢醒左係未天光，拍下佢都會訓返，但如果已經天光，就會俾佢食奶。v.v btw 琴日朝佢叫醒我要食奶時原來只係五點八……今朝仲早...五點四... OxO。冇事嗰朝佢都會訓返，好久唔久會醒左唔訓返，就嫲嫲湊住我返工。

下午茶就食奶粉，都已經好一段時間喇。其實之前係諗住滿一歲就唔再泵奶，點知到滿一歲時又唔捨得 XP 只係放棄左朝早泵奶 (可以訓多 45min)，但 lunch time 喺公司有繼續泵，直至滿14m (嗰個月續漸延遲泵奶時間至下午，有時真係會臨收工先有時間去泵一泵，試過一直行唔開個胸谷到爆艇)。嗰排係︰夠就食人奶，唔夠就食奶粉。最初都遇過小小唔肯食奶粉o既時候，可能開4-6安食得2安，後來習慣左就冇事 (學婆婆話齋︰冇得揀就食架啦)。最近聽聞小小下午茶有時會食7安，btw 而家放工見到個奶樽有 d 奶剩喺度真係好少事，奶粉雖然係貴，但相比起小奶真係濕濕碎，再加上小小只係食一餐，其實一罐大奶粉食到夠期 (開封期) 都未食完....

多謝你健全快樂 （媽媽們慎入）

親愛的小小︰

自從你來到，所有與小朋友和動物有關的新聞/資訊都特別牽動我的情緒。今日看到兩段新聞：

（1）

懷疑產後抑鬱沒有求助媽媽斬死歲半B女，警察接報到場時見B女9歲哥哥站門外，指補習回家門被從裡面上鎖，媽媽不肯開門。報導形容現場B女的積木散落一地，累極的警察說滿場都是血只能坐在床上。

（2）

台灣一位兩歲小妹妹，因細胞突變，身上一成皮膚舖著黑色素痣，包括整隻右臂。她將要在這幾年接受數十次手術，可能是換皮手術吧，以希望不會轉變成皮膚癌。

（3）

前幾天亦從facebook見到朋友的朋友的朋友的……帶我看到了一個小BB短暫的六天的一生。小BB在最近一次產檢時突然心跳停頓，因而安排緊急開刀出世，BB堅強的堅持了幾天，最後一個 update 是 “爸爸終於第一次抱到你了”

（4）

你剛出世時在 facebook 看到的一對因羊水栓塞雙雙昏迷的兩母女，最後妹妹在六個月大時離開了，那時你兩四個月大。

（5）

10個月大的黃小妹（台灣）被爸爸衝動掉進煮麵鍋裡……（因為爸爸媽媽在吵架，媽媽氣話：你夠胆就掉佢落去……）

（6）

剛放完產假返工，等時遇上送燒乳豬。好看之餘我竟然想起人，乳豬仔和你一樣，有脊骨，有手有腳有小臉蛋……覺得自己想太多了但還是有驚怕的感覺……

（7）

流浪貓被虐貓者用滾淋，背部大面積燙傷……

說太多了，希望沒有嚇著你（和睇blog的大家）。我只想說，很感謝你健全健康的長成，看似很普通，但也是不可多得的幸運，多謝你! 媽媽會好好照顧你。

換左 profile 相

o岩o岩醒起換下小小幅 profile 相。上一幅 profile 相係初初開 blogger 時揀o既，小小當時應該係4個月大左右，雖然話映倒佢笑(得靚)都有難度，但要映倒正面絶對唔難。

但而家....映 10 張，10 張都映唔倒佢望鏡頭... 好似之前睇妹豬個 blog 時，妹豬媽媽都有提過..... 喺個電話度 flip 左好耐.... 都係用返 blog 過呢張啦.....都冇乜選擇喇.... ha.. haha....ha.... :P

龍舟節去睇龍貓

今年端午節係星期一，所以連埋星期六日放三日假! yeah!!

星期六去左九龍公園。同小小出街嘅行動力都未算太高，呢日我地中午出發，出去佐敦搵地方食午飯，小小好乖食晒成碗，之後去永安搵小小嘅褲，姑寒嘅爸爸媽媽只買左兩條$55嘅長褲XP，臨走時小小開始眼訓，行左冇幾耐就訓著左，於是轉移去 starbucks 坐低俾佢訓我地又抖下。差唔多五點醒左，我地就出發去九龍公園。

九龍公園泳池有餵奶房，係上鎖嘅，去對面警衛室搵人幫手開門就得。爸爸覺得上鎖嘅餵奶房有D麻煩，但媽媽完全唔介意，因為要搵人開門嘅餵奶房其實更好保障人奶媽媽BB嘅權益。食完奶，本來諗住去上次玩得好開心嘅灌木迷宮玩，但眼利嘅爸爸發現原來泳池旁邊有個兒童遊樂場哩埋左!

等小小訓覺時，爸爸媽媽買嘅大 starbucks，之後留返俾小小玩。

呢個滑梯好玩小小玩，樓梯係矮級而且大級，小小唔使拖、自己扶住扶手就上倒去，上到去仲有長走廊連接一頭一尾兩條滑梯，小小每次都要行到尾 sir 尾個度轉彎嗰條。今朝同佢著左呢件背心 "裙"，再睇住佢行來行去，真係好過癮，但後來見佢 sir 落黎時隻小脾啜住滑梯，所以同佢著返條褲等佢好 sir D。玩到六點幾，要起程返屋企喇 !

星期日去左爸爸小學同學午聚，因為有人生左 B。呢日o既聚會儲落一肚氣，散會時媽媽攰到不行，因為要忍住唔好插佢地咀，因為佢地講野錯晒之餘又唔打算聽下人講野..媽媽自動收聲，留返啖氣暖肚好過... 唔好影響心情，另外再講

星期日散會後去左灣仔參觀舊灣仔警署。媽媽對所有展覽都好有興趣，因為可以睇倒自己平時唔會見倒o既野。媽媽雖然都入過其他警署內部 (因為同人開會)，但都依然對呢個展覽好有興趣! 入到去見倒好 open o既「上彈及退彈區」(o係室外)，爸爸即刻衝埋去要我幫佢映相，佢除左 hip seat 一邊條帶然後捉住小小隻手臂 (其時小小係訓著左o既) 話小小係佢o既「彈」，但當然我映極都映唔倒佢心目中o既效果.... -_-"

警署開放o既部份得好少，唔算好多野睇，但我地都玩左好開心o既半個鐘頭 (因為我地好遲先去到)，仲映倒小小開紙皮公仔警車o既相 (不過喺爸爸部電話度)。之後又係時候返屋企食晚飯喇。

星期日晚有一個好好笑o既小插曲︰話說睇港台節目講消防員，劇情講到女主角婆婆仲喺火場入面但女主角唔知佢喺咩位置，氣氛勁緊張時，我係咁講 “婆婆唔見左! 婆婆唔見左!”，跟住玩緊玩具嘅小小走埋黎我地度，指住佢婆婆，望住我，用佢嘅 BB 話講 “婆婆!”，佢叫左幾聲，我地先明白佢知道我講緊咩，我攬住佢，笑住同佢講 “係喎~婆婆喺度!” ，佢真係好得意 ^0^ 

星期一仲係假期，係端午節，可惜最近一次挑戰佐敦谷嬉水池時，小小用雙腳夾實我，完全唔肯落去，我踎低想俾佢掂倒水，佢仲大叫同向上爬.... 所以今年又冇得游龍舟水喇 (舊年因為得5個月太細所以冇游)。本來爸爸想去野外，點知出到大圍實在太熱喇，媽媽唔係太想... 於是我地就轉戰沙田o既文化博物館睇龍貓 (「吉卜力工作室場面設計手稿展‧高畑勲與宮崎駿動畫的秘密」)

我地冇去到最逼人o既映相區，只係睇左展品。值得一讚香港博物館水平真係好高 ! 各項配置同燈光都做得好好 ! 媽媽睇完解釋圖之後，其實對真跡係睇唔明的 :P 所以喺睇完左一 D 識睇o既展品之後，媽媽就開始同小小去做親善大使 -- 同各位企到好悶o既保安員揮手 SAY HI ~ 同埋搵 d 死角位俾小小飲水。

呢日媽媽個電話冇電所以冇帶出街，所以就映唔倒相啦。喺走廊等爸爸時，冇著鞋o既小小俾媽媽限制唔可以行太遠 (亦要避免喺人多o既地方撞倒人或被人撞倒)，最有效o既制約係一個食緊餅o既小朋友 (小小企定定眼定定咁望住人地塊餅) 同地下一粒炭屎鬼 (展覽範圍地下貼左好多炭屎鬼)，小小喺咁踩隻炭屎鬼，但佢係平面貼，所以應該踩唔倒 d 乜... haha...

之後我地沿沙田公園行返市中心。呢度有一片草地，我地坐喺草地旁o既長椅開火龍果食，小小食晒成個咁濟!!! 之後踩過草地走o既時候，小小又俾另一樣野吸引住~~ 就係人地隻烚蛋!!! XD 小小被迷o既程度係企定定眼定定望實人地隻蛋之餘，拖又唔肯走，抱走左又行返轉頭!! hahahahha 爸爸話小小係為食妹!

其實正正因為小小為食，免卻左好多煩惱。佢通當食飯都食得幾好 (咪講!)，... 噢... 都係唔講太多喇 hahahhaha....

曬到紅晒o既大家又係時候返屋企食飯喇! 愉快o既週末又告一段落了...

台北之旅 Day 4 - 拜拜台北

隔左超過一個月先夾硬寫到黎 Day 4 -_-"
都當做左記錄啦...

Day 4 一早都係去阿姨小店食早餐，之後返房執野，出去機場時交通有少少阻滯，但又好彩 (好彩?!) 班機 delay 左，話 "好彩" 係因為如果班機唔係 delay 我地其實有可能趕唔切上機。去到閘口，全部都係小朋友 !!!! 但好似小小咁細o既就得佢一個，我仲特登喺閘口個地勤前面亮一亮相等佢知道我地到左，因為 BB 係有得上機先的。到地勤叫我地入閘時，我 feel 倒有好多對眼用奇異o既目光望住我地....可能係我心多左。

回程呢轉機冇去嗰程咁好，分唔倒前排o既濶位，安排左我地坐中間段最後一排椅，係逼逼地但都 ok，都夠位餵小小食bb餐。我都唔記得大人餐係咩喇.... 總之小小就好合作咁食左大半樽果蓉，好似都有食大人飯。

落機攞埋行李已經十點，我地打左電話俾嫲嫲同婆婆報平安之後就快快搭的士返屋企喇。

小小第一次出行之台北之旅就係咁喇。雖然過程係好攰好多野諗好多野擔心，但都係一個好好o既體驗。自從會自己去旅行之後，每一次去完外地返香港時，都會諗起我地其實從來都冇好好欣賞過我地喺香港垂手可得o既風景。小小開始行得唔錯，又識得洗手，可以帶佢去做 d 污糟 d 同複雜 d o既事，一直都好想帶佢去郊外睇樹玩草，趁佢細個希望俾竹多D呢種體驗佢。媽媽諗返細個時，去郊野公園係最開心嘅回憶，都好多謝婆婆唔怕辛苦帶我地三隻馬騮周圍去，雖然大個D之後就冇再一齊去郊外，但原來到而家成年後，呢D係好美好嘅回憶。

台北之旅 Day 3 - 臺大的雀雀和夜市

Day 3 一早去左食早餐。話說第二日出去動物園時，我地喺酒店附近搵野食時，見到一間賣三文治同咖啡奶茶嘅小店，但因為當時我地諗住要搵食飯嘅地方，所以冇入到去。到呢日因為係食早餐，就決定去呢間小店。小店o既阿姨超好人，我地 day 4 都仲有去佢度食早餐，佢舖頭有 D 雜誌之餘，竟然仲D有BB書放o係度，係阿姨見佢騰來騰去，叫我地俾佢坐去隔離放住書張枱，再攞出黎俾小小睇。

之後返左酒店，等爸爸做埋野就出得街，點知爸爸今日有好多野做，到出得門口時已經三、四點 (其實食完早餐都已經差唔多十二點)，我地照原定出去臺大搵生態池。o係捷運一出黎已經見倒一個通向宿舍區o既入口，但當我攞住喺網上搵倒o既相去問人時，大家都好似好趕時間或者唔識路咁..... 我地都係跟感覺向大方向行啦。到最後問一個喺大樓出黎嘅學生時，佢一指 “旁邊就係啦”，嘩，原來係一個唔算太大嘅水池，已經有好幾個小朋友喺度玩緊。唔知係咪台灣類似o既地方好缺呢? 因為上網搵時個形容所講值得黎o既程度令我以為呢度好大好多野睇，其實數埋唔知有冇20隻雀雀，但鍾意雀雀o既小小都睇得好開心。唯一唔好係呢個池有一部份係好似碼頭咁冇遮冇欄，真係好怕仍然處於不受控制階段o既小小會跑左落去.....

之後再喺臺大入面走左一陣，周圍搵厠所同搵地方食奶。

小小呢個台北行真係大個女左好多。

由於臺大旁邊就係夜市，爸爸一直都好想去一轉夜市掃街，但媽媽就一直都好擔心喺夜市會搵唔倒o岩小小食o既野 (而且擔心食物衛生o既問題)。小小行左一個下午可能太攰喇，又好似琴日去完動物園咁訓左，爸爸就可以趁機行夜市，搵倒目標之餘，又行左書店，又喺尾站搵倒o岩小小食o既野 (其實係賣鴨血o既檔口可以白飯分開上，爸爸再見倒雞絲飯檔再買左個雞絲飯)。最後小小好合作咁喺落地鐵時先醒，我地就極速行返酒店，將琴日買 d 菜烚熟就可以開飯!! 小小都食得好開心 ^^ (但幅相喺爸爸部相機度..)

對於去夜市，之前媽媽係極度不安，一來怕搵唔倒地方俾小小食飯，二來怕夜市入面o既檔口會危險整親小小，事實證明冇問題，媽媽亦好開心爸爸可以得償所願，冇浪費到台北之行。

反斗的小小 - 大叫「爸爸」

今朝回復平靜，小小雖然早左叫食奶食完又反左一輪先訓得返著，但起碼都係靜靜訓返。

琴日朝小小早左好多，六點前就醒左，本來食完奶又訓返，我都訓返，到鬧鐘響，我起身去準備返工，臨出門口時佢又郁左兩下，我又衰就諗住睇下佢會唔會要食多轉奶啦，於是就錯左喇，佢番食完奶之後本來都碌落床訓返，點知唔知係唔係突然發現唔對路，跟住開始喊起上黎，仲喊到勁大聲。

呢個就要講前言喇。話說小小成日會細細聲叫爸爸，我成日同佢講︰你要大聲 D，爸爸聽唔倒架，有時佢又會細細聲咁同人講拜拜，對方冇反應時，我地都會話叫佢要大聲 D，佢近日應該突然明白左「大聲 D」點解，但係佢並唔係o係叫拜拜時大聲 D，而係開始o係夜晚訓覺時大聲叫爸爸入房。

小小好少會自己話要訓的，除非佢真係好攰好攰，攰到會食住奶訓著嗰隻，否則都係我抱佢入房，入房之前會抱住佢同嫲嫲爸爸講早抖，少少亦明白「早抖」o既意思，但佢會講「拜拜」。就算嫲嫲已經訓左，我都會同佢喺房門口細細聲講早抖。入左房之後，會熄大燈，留返床頭細燈，小小就通常都要再玩一大輪先會訓，有時佢會細細聲叫「爸爸」，雖然唔知真定假，但我都會同佢講要大聲 D，然後再幫佢叫爸爸入房。爸爸就算唔係聽到我地叫佢，佢都會久唔久走入黎睇下我地咩情況，同埋叫小小「要訓覺喇，覺覺豬喇」(小小喺大約兩星期前開始會講「覺覺」，估計佢真係知道我地講「訓覺覺豬」點解) ，所以喺小小未訓著之前，爸爸係不嬲都會騰出騰入的。前兩日開始，佢突然間喺房猛叫爸爸，初初我都有幫口叫爸爸入黎，點知佢越叫越好玩，仲用盡全身氣力 -- 吸氣 -- 運勁 -- 「爸爸」 咁大叫，爸爸要即刻衝入黎回應佢o既呼喚，如是者叫左好幾次，我怕佢會玩慣左，但又唔想叫爸爸唔好理佢 (因為好難得佢會叫「爸爸」呀~ 就算佢只當係指示唔當係稱呼都好)，所以拍拍佢同佢講「好喇，要訓喇」，都仲再玩多左陣先肯訓。

又扯遠左 u_u 唔記得左自己寫前言之前想講乜。

總之第二朝小小唔俾我出門口狂喊，安撫完放返落床玩冇事之後，我再拜佢佢就又喊喇，唯有爸爸抱住佢睇住我出門口，好彩爸爸話之後佢冇喊喇，開始玩，但就冇再翻訓喇。爸爸話佢琴晚 (星期日晚) 唔記得同小小講話媽媽第二朝要返工... 都有可能....

放工返到婆婆度，循例同小小講我要去左洗手先，小小有時會跟埋入黎厠所 (婆婆平時都會俾佢跟埋入厠所，我覺得係好事，起碼而家出街我都可以帶住小小一齊去厠所，佢會好乖咁閂門然後企喺度等你，然後你一開鎖佢又會開門出去一齊洗手。但有一次驚險係佢突然撲過去個馬桶度仲想伸手入去，嚇死我!!! XD)，呢日佢跟到黎門口就企左喺度，我問佢入唔入黎(厠所)，佢搖頭，之後我洗完手去完厠所出黎攬攬佢，佢要我坐低，然後行左去我後面，初時我以為佢又要 marry-go-around 我，點知佢走左去我左後就冇繼續轉，然後伏左喺我左邊膊頭呵我，第一下我已經冧到暈左喇，點知佢企直轉一轉又再伏喺我度~~~ 啊~~~ 媽媽俾你冧死了~~~ 即係話朝早o既唔開心已經冇事啦 ovo

星期一晚爸爸會去開會，會夜返屋企，到我抱小小入房訓時都未返到。我同小小喺房入面準備訓覺時爸爸返到黎，入黎望左一下，同小小打左招呼之後就出返廳，小小隨即又開始叫爸爸遊戲，爸爸出出入入，兩個玩到不亦樂乎。我同爸爸講，你好好享受佢咁大聲叫你o既日子，千祈唔好覺得煩，好快就冇架喇。湊小朋友，真係要好好珍惜發生o既會一件事，因為「長大」只有一次，一回頭就會發現小朋友已經不復傻傻o既小不點；亦要小心處理同小朋友o既相處，因為你唔知佢邊一日會 feedback 返你做過o既行為俾你睇，例如小小而家會好熟練咁「敲胆經」，係敲打兩邊大脾外則，當然呢個係因為婆婆自 BB 時期已經成日幫佢敲，而家o既 feedback 就係佢有時會自己開始敲，同時要求你一齊敲。

星期二朝乖乖翻訓o既小小

媽媽的開懷

連續落左起碼兩個禮拜雨，小小一直都冇得出街玩。可能悶左太耐，婆婆話小小而家會扭要落街玩，以前係唔會的。

上個禮拜都唔算太早返到屋企，有時係上倒尾班車但塞車，有時係遲左走。有一次遲走但冇話俾婆婆同爸爸聽（因為自己都唔預計會搞到咁夜），點知落巴士已經九點 (平時係我八點或八點多上到婆婆度，爸爸九點黎接一齊走)，上到去爸爸已經到左，佢地話頭先小小見打開門O個個唔係媽媽喊到收唔倒聲..... 我入去時，小小己經冇喊，睇唔出頭先係咩情況，但聽佢地咁講，即係話媽媽諗住可能俾爸爸先接走小小，試下有某 D 日子可唔可以夜D返，呢個諗法係唔 work.....

其實餵人奶o既媽媽真係好抵，平時我唔係主力湊小小o既人，係婆婆、爸爸、嫲嫲陪佢玩，我只係餵奶同陪訓 (陪訓亦係結果唔係原因，小小淨係要我陪訓)，但小小勁痴我，有時出街搭巴士佢都要走過黎我度，有得揀又一定要我拖，喊時更加係淨係要我抱 (當然我唔在場時除外)，佢對住我o既時間相對少，但有得揀一定痴埋黎我度，我好慶幸呢個一定係餵人奶o既功勞。

btw, 今日訓醒之後上背 keep 住痛，平時都會痛但起身郁下鬆返就冇事..... 平時食奶小小都要我望住佢同佢傾訓..... 睇黎唔可以再係咁喇......

台北之旅 Day 2 - 嘆度小月

爸爸成日話想去食度小月。喺動物園走嘅時候，問契媽今晚食飯有冇好去處，契媽都讚成咁早可以去度小月。

搭捷運時，爸爸同我都攰到要小睡片刻，但其時小小仲喺度左望望右望望，點知到站時竟然訓著左，去到度小月時，本來要等位，我就諗住坐o係樓下張板凳度抖下啦，點知我一行埋去時，d 姐姐示意如果我地坐呢張係唔使等。嘩 !? 乜咁筍o既?! 點解其他人唔肯坐呢張板凳枱呀? 我地即刻坐地叫野食啦，仲覺得勁有風味勁開心添 !

叫餐時，我地都有諗住要俾咩小小食，爸爸仲諗住為左等小小起身而慢慢食，點知小小竟然係訓到連由爸爸揹住過俾我揹都唔醒，本來叫契媽出去行完誠品再返黎搵我地，最後我地決定直情去誠品，等小小醒先再算。誠品樓下有 food court, 都有啱小小食o既野，問左佢地9:30pm收，於是我地就全部人上晒去誠品行。媽媽揹住小小都搵倒啱睇o既書，坐左喺小梯上面睇。小小前後訓左接近兩個鐘，過左9:30先醒，於是我地拜拜左契媽之後再返去度小月食肉澡飯。

可能因為真係好肚餓喇，小小全程食得好好，好乖，食左好多飯。爸爸不嬲都好憎人踩凳 (例如巴士嗰 D 面對面位)，所以我地食飯坐片位佢一直都有幫小小除鞋，小小而家好多時上凳之後會要求我地幫佢除鞋，好搞笑。呢晚佢仲有要求飲水，但要用匙羹畢碗入面嗰 D，搞到一身濕晒仲要換備衫，可惜o既係後備衫係短袖o既.... -_-" 媽媽唔記得後備衫都應該帶換返長袖先好出街.....

每次睇返呢映相，媽媽都覺得好開心 ^^，覺得小小真係好叻 ^u^

每次小小食飯食得唔好時，我都會提醒自己唔好 meng，亦唔需要逼佢食，so far 都冇乜大問題。以前小小唔肯食飯時我都會 meng，都驚佢食唔夠，漸漸開始說服倒自己其實佢知道自己要食咩同要食幾多，就開始唔太擔心。可幸小小係一個好鍾意食菜菜o既小朋友，亦由早幾個月便便好難甚至有點點血，到而家都 OK 順利。每次小小唔肯食飯時，我就會諗返佢乖乖食飯時o既情形，然後就由得佢，因為我知佢唔係要唔乖的，只係 d 野唔啱食，而我要記住小小已經佢好多乜都唔肯食o既 bb 好。

小小，度小月係咪好好味呀 ? ^3^

第一次參賽：huggies 搬尿片

今日係 shopping 日，我地一早就出左門口，首先係要去食早餐。小小起身已經食左奶同一隻細細隻嘅香蕉，所以食早餐嘅本來係指爸爸媽媽，點知去到呢間新o既茶餐廳見到有飛碟，我地就即管叫左吞拿魚飛碟試一試小小食唔食。飛碟黎到，媽媽一搣開，唔係吞拿魚係芝腿o既?! 弊喇 ! 小小又唔食芝士 (芝心批邊除外) 又唔食火腿架喎..... 但都即隊俾佢睇下佢食唔食啦，點知佢竟然食左大半個，最後係爸爸唔俾佢食咁多 (爸爸拎住個飛碟邊同我講 (呢度係兩硬方包黎架~)

之後我地又去左康文署兒童遊戲室。今日有好幾個小朋友，都算係玩得斯文o既，但因為有幾個大o既一直o係個滑梯度，所以玩得唔係幾多，而小小少有地竟然好快就表示要走，我問佢係咪拜拜遊樂場，佢仲答我「係」然後拜拜，唔知係咪琴晚訓得唔好呢? 之係我地搭車去 megabox，小小o係巴士上已經乖乖訓著左喇。

去到 megabox，今日冇特別目標，只係行下睇下有冇野要買。o係 topvalue 見到 $40 一件短袖衫，我即刻話要買，因為小小唔多短袖(面)衫，而且大汗o既小小最高紀錄一日換左 3件底衫 (中午沖涼換一件，下午玩到成身濕晒換一件，夜晚返到屋企想佢訓得舒服 D 臨訓再換一件)，新買o既開胸短衫 (有3件) 婆婆好似又唔係好 like，見到 $40 真係好吸引。正堂爸爸同我o係度討論某個款要邊隻色時，小小醒左，於是爸爸就問對 fashion 有要求o既小小我地揀o個 3件啱
唔啱佢心水，點知佢淨係拎起爸爸一見鍾情o既一件黑白 pattern 衫，另外兩件粉紅同紅都唔鍾意，帶佢返去個架度睇同款o既其他色，佢又揀倒啱心水o既.... -_-" 媽媽完全冇 fashion sense 架.... 第時帶佢去買衫一定好麻煩.....

去食完飯食出黎，見倒樓下個 huggies 搬尿片活動開始左 ! 之前行過時個場地仲未有人，我地即刻撲落去睇下有冇得即場報名，好好彩有得即場報名之餘，原來我地仲趕得及最後一場比賽。個比賽分左大B組 (18-24m) 同小B組 (12-18m)，16m o既小小照計有機會。睇緊之前o既場次時，爸爸抱住小小問佢知唔知要做乜，據爸爸講小小係咁點頭。媽媽自細係一個唔輸得o既小朋友，玩遊戲輸左會發脾氣同唔開心，大個 D 先識調整自己心態，媽媽唔知自己會唔會太想小小贏會令到自己太認真，所以不停同自己講「玩下就得啦，唔好太認真」(當然，贏左有成包尿片都真係好吸引 !!)，到落場時，未開始小小已經好想掙脫媽媽行出去，媽媽係咁叫小小「拿，去攞嗰 D 返黎俾媽媽」，到開始，小小全程好開心走來走去，又走左出界，但又識返返黎，又走去搞其他小朋友搬尿片，又走去旁邊映緊相o既爸爸度，就係唔攞尿片 XD

之後返屋企o既時候，小小又訓著左。曾經有一排小小唔係好願訓晏覺，但近呢幾個 weekend o係我地度一齊出街都有訓兩次。小小大個左，行得好左，就黎識跑咁濟，可能運動量大左真係令佢好攰。哎呀我又扯得太遠喇 XP，等車時，我醒起映呢幅相，提醒自己，o係小小成長o既路途上最緊要o既係佢可以o係許可條件之下隨心所慾地做佢想做o既事 (例如比賽未開始唔可以出閘住，但開始左亦唔一定要搬尿片)，最重要係佢做緊o既事對佢黎講係有意義，唔需要對大人黎講有意義。我希望小小可以o係細個唔需要做太多艱難o既取捨之時，接觸多d唔同o既事物，用佢o既方法去做判斷，呢d先係日後成為一個人所需要的知識和智識，唔係用珠心算百萬位o既數 (呢d留黎俾計數機做啦)。

今朝 (篇blog草稿起左就停左，今日係星期一返工喇) 隔離位個同事叫我教佢寄非本地信，我同佢講「都係去會計 chop 然後揀 zone 幾咁囉」，我當日都係自己見倒個 chop 機係咁分地區，跟 instruction input 就係啦，你可以話我係一個好 mean o既老 pat pat，但唔係所有野都係要有人教的，我希望小小有自己學習o既能力，同自己研究o既動力。呢個係我作為媽媽對佢o既責任。

小小，多謝你。

台北之旅 Day 2 - 動物園

雖然第一晚小小好夜先有得訓（因為我地十一點先返到去），第二朝小小依然準時醒左要食奶。我地大家一齊食左 day 1 喺西門町買嘅麵包，然後就落街搵地方買餸煮飯俾小小。

之前發現酒店隔離係 city super 仲好開心，諗住買餸有著落，點知間 city super 原來好晏先開門的，估計可能係精品super而唔係超市super。於是我地轉而去搭車時經過嘅 family mart。睇黎台灣嘅水栽菜已經發展得好成熟，family mart 入面有好幾種唔同嘅包裝水栽菜賣，仲連住個海棉根，好搞笑! 我地買左一包保險 d 嘅綠色白菜，希望小小會啱食。

琴晚搭捷運返酒店時，喺站入面嘅街道圖見到話酒店附近有個公園，已經喺 family mart 買到菜，我地就向嗰個方向發掘下啦，果然有個小小嘅社區遊樂場，仲同小小玩左一陣，呢個滑梯 d 級超高，小小學識左坐低先再落下一級。玩左一陣，映左幾幅相之後，我地再前進去搵隔離個市場。原來附近有一個公屋村，所以有個街市，仲o係入面搵倒間BB衫舖。出發之前睇天氣報告仲話好熱，所以我只係帶左一件抓毛褸俾小小 (不過都仲有另外帶長袖底面衫)，冇帶厚褸，點知黎到變左雨天，媽媽自己好凍之餘仲一直擔人小小唔夠暖，所以有選擇困難症o既媽媽極速決定o係度買件風褸。本來媽媽想買 plain粉紅或深粉紅，點知小小掉開左一件，另一件掂都唔肯掂，於是我就o係個架度攞左一件有花花o既款俾佢睇下，點知佢竟然伸手攞o個件，我同爸爸當堂大笑啦，就問︰係咪真架? 試多次啦。然後就問佢︰呢件? 呢件? 攞住一件花花一件 plain 放o係佢面前，佢真係伸手攞返件花花，於是就買左件花花風褸喇 XP 

之後我地就返酒店煮飯喇，契媽則因為見我地話小小開始想訓，所以佢就兩點先過黎，點知食飯時間/安排就因此有D kick 腳，最終爸爸媽媽o係路上食 burger king，小小個飯就帶左去動物園食。有咁o既安排係因為動物園5點就關門，如果食埋飯先搭車入去就會好晏，但睇人地 d comment 好似話動物園入面冇野食，但去到見到其實有 mcdonal，不過就要等小小再大個好多我先會俾佢食 mcdonald 喇。

同契媽o係捷運站會合，契媽見倒小小揀件風褸非常讚賞，佢話係 Cath Kidston o既花花+波點 signature pattern，仲大讚小小有 fashion sense XD

入到動物園已經過左兩點，第一時間就餵左飯先，但係動物園門口已經滿是白鴿走來走去，小小食左幾啖已經要走落地「雀雀、雀雀」咁跟住走來走去。小小o係今次台北行有好多機會同雀雀s (主要係白鴿) 有近距離相處，所以同雀雀o既感情可以話係突飛猛進 !

可能天氣唔太好而且又有d晏嘅關係，唔係見到太多動。物，所以小小亦冇好大反應。去到樹熊館，隻樹熊大大隻喺面前小小都冇反應，睇黎係因為隻樹熊冇郁所以小小其實係冇發現倒佢，而自由生活、走來走去嘅松鼠呢，因為動作快嘅關係就吸引倒小小嘅注意喇。

最係我地由動物園裡面行返去入口時，我估已經接近六點，但入口附近有個類似遊客中心之類嘅地方嘅職員好好，雖然已經收工咁濟但都仲俾我喺入面餵奶房餵奶，契媽同爸爸就喺出面食風。

小小唔係太鍾意大笑，但都睇得出佢玩得好開心 ^^

台北之旅 Day 1 之小小第一次搭飛機

前言

因為爸爸 d asia miles 到期，所以思前想後決定去一轉台北，就趁小小一歲三四個月嘅復活節假期去。決定嘅時候，希望其時小小有返咁上下大，可以開始食下大人餸，咁就淨係煲飯仔都已經可以，唔使煮成個bb飯咁大件事，再加上希望到時識行兩步，咁我地就照可以一個 hip seat (揹帶) 走天涯，唔使諗帶唔帶bb車嘅問題。

大約一個月前，我同爸爸開始試下帶佢出街食飯，第一次係膽粗粗喺街連飯仔都冇嘅情況之下 ad hoc 同左 joe叔叔去食晚飯，joe叔叔問食咩時，我地話“要有白飯嘅地方”。嗰晚仲有蒸銀絲卷，但小小唔知係唔識欣賞定太識食，平時鍾意食包包嘅佢竟然唔肯食銀絲卷，但就KO左成個雲吞雞d菜菜 ^o^

出發

呢日預備九點出發，但媽媽同小小都訓得好冧，8:40爸爸叫醒媽媽，小小亦好叻地喺媽媽洗完面返黎嘅時候醒左坐左起身喇! 本來媽媽以為可以照常搭機場巴士出去，因為上次去接爸爸機都係搭巴士，但爸爸話今次唔好搏，因為小小機動性已經比上次高左好多，未必肯坐咁耐車，而且今次我地好多行李，所以叫左車直接出機場。好彩爸爸一早有呢個決定，如果唔係我地其實係趕唔切，去到先剛好趕得及 check in 寄行李 (btw, 唔知點解自動機唔俾我 print boarding pass, 個姐姐亦若無其事咁叫我埋 counter print, 好彩有 BB 快線)。寄左行李，入到闗口，一樣有 BB 快線，連過 X-ray 同過關都有 BB 快線，令到爸爸連聲讚嘆「阿女，好彩帶住你 ja, 如果唔係我地就趕唔切班機喇 !」，但係當我地行到去閘口時都似然俾人追住我地話「成架機爭你地三個 ja !」:P

我地被安排喺某一段嘅第一行，即係前面仲有塊板可以拉落黎放BB籃嗰行，我地旁邊兩個位都坐左一家三口，BB坐喺爸爸度，小小就坐喺我度，對方BB仔即刻狂撩小小，但小小竟然灑手擰頭 XD，為左唔想大家繼續尷尬，我唯有話「哦而家未熟，好啦我地熟D再一齊玩啦」然後放佢去另一隻大脾

起飛

起飛冇幾耐，空姐就先送上 BB 餐。我地開左支蘋果汁倒落奶樽俾小小飲，點知佢竟然冇興趣，仲一啖都唔肯飲，白白浪費左成枝蘋果汁 (本來小小唔飲都唔浪費，因為爸爸可以飲，但後話係隔離位個 BB o係下降時狂喊，完全聽得明佢係好辛苦，當時我同爸爸兩個都話「如果樽蘋果汁只係倒左一半落小小個奶樽，仲有一半o係原樽度，咁就可以俾佢飲，就唔使咁慘啦」，佢父母由最初狂氹佢，到後來完全放棄，個阿媽目無表情咁坐o係度，掉返個仔俾阿爸抱住。)

飛到一半，小小已經按捺不住要落地，好彩安排左我地坐第一行，前面仲有好多空間可以俾小小走動。我同爸爸就輪流近距離傍住佢， 始終佢係小bb，大人喺飛機都未必企得穩，如果小小跌親更加可能會唔知轆左去邊XD。

差唔多到時，小小突然表示要食奶，其時因為空姐已經做晒 service，唔驚佢地會行過話小小一定要坐直抱好（我係有擔心過會有咁嘅要求，始終空姐要盡量確保乘客做好安全要求），所以就照俾佢食啦。最搞笑嘅係當隔離BB好喊到好慘嘅時候，小竟然久不久有好擔心咁嘅樣，跟住又自己雙手琴住。自己對眼好似同我地玩bu-jak咁，最終喺安全著陸震震震之後佢就適時食完坐返起身，唔使我好狼狽咁整理返好d衫。爸爸不停讚嘆小小真係好叻，話佢竟然知道嗰個時間要食奶而且降落左就唔食。

BTW, 本來都未諗掂開唔開BB餐嗰兩樽野食，點知都未認真開始諗，小小已經要食我地個炒飯

台北之旅 Day 1 - 打邊爐

台北之旅已經係廿日前嘅事，真係已經忘記得八八九九 v_v

到埗、落機都好順利，而且入境位置嘅人都好熱心咁指示我地帶住BB（佢地叫小baby）可以行禮遇通道，真係快好多! 爸爸揹住小小，不停讚嘆 “女，原來帶住你去旅行係咁方便!”。做好晒入境手續之後搵地方換台幣，而家台幣已經3.6 (細個仲係4!) ，此時小小好合時咁訓著左，我地就喺 arrival hall 食 subway。好彩發現倒呢個位置仲有 wifi，之前從來都冇諗過要點由機場出酒店嘅我地喺度 google map 倒原來有一架機場巴士直情去到我地酒店門口!

時間啱啱好，去到酒店時係四五點左右。安頓好，同小小沖埋涼，我地就聯絡已經喺台北玩左幾日嘅契媽出去食晚飯喇!

我地今次好勇咁接受契媽嘅建議去打邊爐。之前一直都唔敢帶住小小去打邊爐因為媽媽覺得帶佢去打邊爐太危險喇，但契媽喺我地提出 “要有白飯食” 呢個要求時，佢話呢間有，咁我地就膽粗粗去啦! 去到呢間餐廳，爸爸就出去搜羅小小食得嘅野，搵倒好多菜菜返黎。好彩小小亦全晚都好合作，乖乖咁食晒飯同餸，媽媽都有時間食到好飽，連任食 hagaan daaz 都食唔落。呢度d台式奶茶亦好好飲! 下次黎台北會再黎!

第15月回顧

好似好耐冇寫過回顧咁，當湊女嘅日常事務行順左，小小又大個左d，好似會冇以前咁日日都打緊仗咁，令人習慣左，忽略左佢嘅每一個重要嘅小步。完全講唔到重點添:P 今日5月3日，小小踏入16個月大喇，想砌幅9格相，就做埋個回顧啦^^

行

小小雖然未至於識自己跑，但已經行得頗穩陣，如果兩隻手拖住佢一齊跑，佢係會亦可以一齊跑的。一識行已經好鍾意上樓梯，而家上細級嘅樓梯對佢黎講可以話係 easy job，拖住佢一隻手只係俾佢借力平衡，冇扯住我地隻手上級，甚至有時仲連級咁上（即係左右左右上，唔係續級上）。由於佢認為自己已經掌握倒上樓梯，所佢最近開始練落樓梯。臨去到屋企樓下有兩段矮樓梯（細細級的），我地經常要喺嗰度來回好多次，先獲得小小批准大家繼續行，甚或有時我地要將小小強行抱走（夜晚返屋企嗰程唔可以俾佢行太耐啦）。

自己食飯

基本上已經可以放手俾佢自己食飯，但我地依然會捉住佢隻碗，以免佢一時興奮成碗飯飛左落地，但用匙羹畢飯餸方面，小小已經掌握得好好，除左有時興奮得濟都係會飛左隻匙羹落地。有時食到尾都會要我地幫佢畢最後嗰幾匙羹，我估一來係畢到攰，二來最尾嗰少少飯佢畢唔倒。

自己飲野

下午奶婆婆依然係用奶樽，我冇反對，因為真係容易 d。婆婆平時話小小而家係自己訓喺佢個地墊度食奶，今日返去食飯時見識倒係點樣。朝早飲水，小小只肯接受嫲嫲用匙羹餵，但夜晚飲湯時，已經可以自己拎住隻杯飲。其實係一 d 佢勁想飲嘅野佢直情會搶隻杯。

但琴日同今日發生左幾次同樣嘅意外……琴晚返到屋企臨訓，嫲嫲又問下小小飲唔飲水，佢話飲，但就要大人水壼飲，嫲嫲唔識就住個力同手位，於是爸爸就叫佢放手俾小小自己拎，點知個水壼對小小黎講太長，當 d 水由底 long 上黎時，一下子倒左太多，小小一嚇，一跣腳仲跌埋仆倒個面，當場狂喊。今日出左街，食完奶問佢佢又話飲水，已經一齊拎個水壼，都俾佢太大力一搶，又倒太多入左鼻同整濕身，又有琴日嗰個嚇親嘅表情。返到婆婆度，諗住俾杯佢飲湯安全啦（平時佢都識控制個杯放入口幾多），點知臨飲晒佢又係突然好大力倒，今次因為得好少，冇嚇親，咁我就冷靜同佢講 “倒得太快就會倒瀉啦” ，之後未有機會再俾佢自己飲野，所以未知最新進展係點喇。

講有意義字

最早學識講o既係「拜拜」，幾個月前已經會講，仲越講越好，好清晰咁有個尾音「衣」，最近仲由手指拜拜進化到揮手拜拜，個「拜拜」手揮得越黎越大力。

之前帶佢去九龍公園睇雀仔，佢當時已經好鍾意 (當然仲要計埋再之前去海洋公園啦) ，四月時去台北，o係動物園、台大同酒店附近個屋村，都俾佢同白鴿有好強度o既交流，就立即學識左「雀雀」喇。更搞笑o係，話說爸爸跟地墊同咭紙書教佢 bird 在先o既，去完台灣之後有一晚我又對住本咭紙書係咁「雀雀bird」咁對佢講，而家佢應該係 connect 左雀雀同 bird 係同一件事。好勁呀!!! 小小識雙語呀 XD

未見到佢有意識咁叫爸爸媽媽婆婆嫲嫲，但更奇怪嘅係連 “奶奶” 都冇講過甚至可以話連呢個音都冇發過（因為佢係有講過“爸”音甚至“爸爸”的，只係唔覺得佢 refer 緊 “爸爸” 嘅意思。平時我會問佢係咪食奶，佢會又開心又興奮又堅定咁點頭，所以肯定佢係知嘅。有一晚佢到時候走埋黎冤我時，我唔問佢 “係咪食奶”，“反而猛問佢 “要咩呀?”，同埋猛叫佢講話“奶奶”，點知佢冤左幾下之後，靚左落黎，跟住扁咀，然後眼淚靜靜滴出黎……嚇死我!!!! 我即刻攬住佢，同佢講 “唔係唔俾你食奶呀傻豬，只要你想食，媽媽一直都會俾你食奶”，跟住問佢 “而家食奶啦，好唔好？”，一邊望住佢食奶，媽媽都一邊流眼淚

……

玩

小小玩嘅野複雜左好多，落樓下遊樂場時開始會自己揀要玩乜野，仲會追人d波（甚至攞），v_v 但就對我買俾佢波興趣不大。經過商場時，好鍾意轉入舖頭睇野，好彩仲未至於一入去就搞人d貨，但我地就會俾佢轉入百佳慢慢 “選購”，通常玩完一大輪都唔願走就要強行抱起佢拜拜百佳。

仲係對 shape sorter 冇興趣…… 好彩佢因為遲左幾日出世跌左落下一個學年度，所以今年唔使考幼稚園住，如果唔係真係唔知點算u_u

洗手

以前成日要提嫲嫲唔好俾小小玩報紙，因為整污糟左隻手就好難捉住佢洗返乾淨D油墨。我成日同爸爸講，當佢識得洗手時，我就唔會再阻止佢周圍摸野。

自從我放完產假返工，小小每晚會o係婆婆度等我開始，每次入門口我都會同小小講我要洗左手先，而自從小小識走來走去開始，佢會跟住婆婆入厠所，到大約一個月前o既某一日，我地發現小小識得洗手，俾D泡泡佢，佢會識得兩隻手搓下搓下，由o個日開始，我地就會次出完街返屋企都帶佢入厠所洗手。而家抱佢上洗手盆，佢就會急不及待要俾手 jit 泡泡，又搓到唔願停，幫佢開水喉，佢又會係咁閂返.... -_-"，好多時最後係要捉實佢過水跟住放返佢落地出廳。

刷牙

小小有一排唔願刷牙，連紗巾抹口都唔俾，嫲嫲抱住佢俾我抹口時，佢會狂掙扎，又掟牙刷，所以爸爸有一排唔俾佢玩牙刷。但係小小而家基本係食同我地一樣o既野，所以我思前想後，都係覺得唔可以好似以前食BB野o個時咁由得佢唔刷牙，就開始再用 BB 牙刷引佢玩，引左幾日，總算佢肯俾抹口，冇再掟牙刷，但就篤住枝牙刷行來行去，又跌親又流到一身都係口水，但我都覺得總算係一個好o既開始。有一日飲茶時，望住個千層馬拉糕 (媽媽o既favorite)，我對爸爸講︰好啦，對佢識肯刷牙就開始俾食甜野啦。

寫住咁多先啦。小小，爸爸媽媽好愛你 :3

第一次去郊外

今日跟爸爸嘅中學舊生會去左“行山”。原先一直一廂情願以為去媽媽細個成日去嗰個大拗門，嗰度係一個好大嘅公園（當年我係咁覺得，其實好似小學畢業以後都冇去過，諗到呢度，先發現似乎我幾兄弟升中之後就冇理我媽……v.v），但原來舊生會係諗住取難捨易，由車路入左隔離，稍事休息之後再循山路過去，所以我地跟大隊行完一大輪車路之後只係去到一個小平頂嘅草地，並唔係媽媽想像中嘅大片草樹林。但第一次去到嘅小小依然好開心，係咁周圍行仲有對同行嘅姐姐們笑，仲好乖咁食左好多面包，唔使媽媽擔心佢冇飯食。

之後同小小喺嗰度係咁行來行去，嗰度唔似佐敦谷咁係平整左嘅草地而，而係比較天然嘅、有沙有石嘅草地。小小不停挑戰難度，專揀石頭行上去，有我同爸爸拉住，小弓面對崎嶇嘅石山都依然所向無敵。行到平原中心嘅多石帶正當我要步步為營，唔想俾小小跌落石頭地時，駭然發現石縫中原來有好多大大小小嘅玻璃碎，不得了即刻大叫爸爸過黎抱走小小，萬一佢跌落d玻璃碎上面就真係大件事!!!

行左我都唔知幾耐，爸爸同我去搵厠所去完厠所返黎時，大家亦開始收拾起程。去到路口，成隊都轉上山路繼續行程（過大拗門），我地一家三口同其中一位老師就沿車路原路離開，臨出到大路時，老師仲有的士吉車行過揮手走左。

老師走左之後，我地先敢停低飲水（之前怕我地行得慢要老師特地等）。本來煲左蘋果水俾小小，怕佢堅持唔肯飲水又再俾太陽曬的話會好危險，誰知小小雖然都肯飲佢個飲管杯但更想飲我地個水壼，卒之係狂飲狂飲我地壼水（都有d蘋果水尾的），飲左好多，爸爸媽媽放心晒~

倒波雙向 （原詞“倒戈相向“）

二月仲係好凍嗰時，有一排小小唔肯沖涼，婆婆懷疑因為有一次沖涼跣倒嚇親佢。以前沖涼一直都冇俾玩具因為天氣凍，唔想引到佢反而沖耐左而凍親，但自從佢怕沖涼開始，我地用好多玩具引佢落水，自嗰時開始，佢開始練習將水由一隻杯倒去另一隻杯，時至今日，更加練成左“倒波雙向”，即係張個波喺兩個兜之間倒來倒去 ^^

玩飯

剛過去嘅週末，小小唔係好願食飯。星期六晚隔左一陣都肯好好食，琴晚星期日晚，佢玩跌左隻匙羹，我一怒之下話“唔食就唔好食”然後放左佢落地，之後佢一直抱住我大脾，又喊，但抱返佢上餐枱佢又玩，落返地又喊，最後俾佢玩我地食嘅通心粉等等，先肯食完佢d飯，之後仲係咁追要食菜，好似食極都唔夠咁。

琴晚至今朝我都一直喺度諗呢件事。雖然我同爸爸講，到小小識性時我就會奉行“唔食唔俾食”嘅做法，主要係因為見到bob話喺佢大女身上可行，但佢而家咁細個，而家做呢件事其實應係唔實際。

然後我諗起佢抱住我大脾喊嗰個樣，同埋佢用自己隻匙羹將d通心粉由大碟不落自己隻食飯杯，我覺得好迷惘，其實小小只係：
- 好想食我地食嘅野
- 匙羹嘅運用做得好好，好到可以由大碟準確不落杯

卒之，佢一路玩不通粉嘅時候我一路餵返佢d飯俾佢，佢都冇唔食，最後食左好多通粉之餘，亦食晒自己碗飯。

我覺得我呢個脾氣發錯了，但我有少少唔知應該點拿捏……其實托賴小小係一個鍾意食野嘅小朋友，我只係唔希望自己搞到佢唔鍾意食物。

好天氣週末

剛過去星期六天氣超好。早餐後我地去左樓下遊樂場，點知好大風仲有d涼意，反而籃球場少有地冇人，所以破例俾小小入左籃球場。食早餐時隔離枱兩個三歲同歲半嘅小哥哥都黎左，佢地爸爸媽媽仲好好咁同小小一齊玩佢地仔仔個籃球仔，小小學識左踢波!

之後我地返屋企煮飯仔，然後同小小出去九龍公園。爸爸揸左車，喺中港城泊$26/hr，行過去九龍公園真係好方便，消費$100其中包括平台餐廳，仲可以免兩個鐘（好似係兩個鐘），爸話值得再揸車黎。

上次去海洋公園時小小對小熊貓有反應，指住小熊貓嗌，對於九龍公園嘅鳥類，小小則保持呢個疑惑嘅狀態，其實小小對屋企樓下的麻雀都係冇乜反應的，睇黎小BB都已經知道自己係哺乳類動物，識得分別。

之後仲同小小行左好耐樹仔迷宮。見倒佢去到路口時會 process 行邊個路口好嗰嗰樣，真係好得意 ^v^

星期六晚仲 ad hoc 同 joe叔叔食飯，第一次唔係食飯仔，係食餐廳嘅餸。星期日拜山，雖然我同小小冇上，但媽媽就揹左小小一整日，仲有少少狼狽咁一個喺太古城d櫈餵小小食飯，好在小小好合作食得好好。今日返工時一直睇過去兩日週末映嘅相，過去兩日雖然好攰但好開心，媽媽甚至覺得係湊小小以黎最開心嘅一個週末! 

p.s. 加標籤時先醒起：小小已經踏入1YrQ2喇!

泵奶回顧

自從二月尾冇再泵奶之後，好多事情都輕鬆左好多，返工個袋輕晒（因為唔使帶冰壼），食午飯可以唔使趕頭趕命，朝早訓多左9個字（減除朝早嗰次泵奶同番蒸個泵嘅時間），再加上小小開始夜晚訓得好d，我覺得體能上最辛苦嘅一關算係捱過喇，以後陪跑嘅工作就交俾爸爸;P

2月13日 lunch time 的 record high

熟睡的小人兒

琴日傍晚要開例會，再加上一位今日開始放假嘅 sales 開到聲搵我幫佢放假前出埋張 order，所以入會議室之前已經打定電話同婆婆講要夜返。

 

八點熄緊電腦時，婆婆已經打電話黎問我咩環境，話小小係咁要婆婆換衫同幫自己著褸，我即刻著袜換鞋，狂奔落樓，再衝去mcdonald買個餐諗住上巴士食。

 

本來話巴士過完海底隧道就通知婆婆，點知小小已經等唔切，拎埋鞋要婆婆著同埋幫自己著，所以婆婆就抱小小落樓先喇。去到百佳門口，婆婆話本來小小lur住要入去 (呢排小小都會行行下轉左入租碟舖同百佳)，但係婆婆同佢講︰「唔入去喇，入左去媽媽搵唔倒我地架」，佢好似真係明咁，冇再話要入去，於是佢地就喺百佳門口等我。

 

返同屋企，小小少有地唔肯走去嫲嫲度，連我去洗手都唔俾，係咁拉我件褸個拉鍊扣表示要食奶，咁我都要好快去洗個手啦，之後再同佢入房，佢食住就訓著左，比平時早好多。之後我去沖涼出黎，佢醒左，再食多兩啖又訓番。

 

徧徧呢晚我竟然唔眼訓，又唔想喺廳，怕小小又半醒時見倒冇人會醒晒，於是我就攞左耳塞入房聽收音機。喺街燈下望左小小好耐，以前 / 平時通常我都會好匆忙咁喺小小一訓左就趁機會走開去做其他野，或者夜晚時就會好攰一齊訓左 (而家好多時仲係我早過小小訓著添 -_-")，我發現自己可以話係從來冇試過咁安靜地望住訓著左嘅小小。我一路聽住收音機 (btw 11點商台已經得返余迪徫了，唔有趣)，一路望住小小，又拉下佢個褲腳，又摸下佢個心口，唔知我媽喺我地細個時係咪都有咁嘅時候呢？(又btw我媽應該超忙，有三件)。

 

有時，抱住小小時會比劃下佢喺我肚入面時佔幾多空間、有幾長。有時當抱住佢喺大脾訓覺時，佢個頭頂頂住我個下巴，我會覺得好 amazing : 嘩~ 佢由只佔我個肚嘅空間，有而家頂住我下巴。

 

第二朝 (即係今朝)，我又好早醒左，由於唔係覺得好眼訓好需要繼續，所以又喺度觀察訓覺中嘅小小。而家小小好似開始訓得好d（定係我訓得太好唔知醒呢???0o），我感覺自己都休息得好左，精神左，大家嘅生活會越來越好啦^u^

再戰佐敦谷公園

小小由剛滿一歲時開始學行，用左兩個幾月到近日可以自己行得好好喇! 上回講到上一次同小小去佐敦谷公園時佢仲未行得好好，潮濕加毛毛雨左一排，冇得出街，最近天氣好返d，好想同小小再去大草地，睇下識行嘅佢會有咩反應。

同上個禮拜一樣，小小都依然係觀察型，冇好似其他小朋友咁跑，佢甚至連行嘅意欲好似都唔係太大。最大興趣嘅就係人地d野食 :P 最後係有個媽媽分左一段香蕉俾小小 lol

雖然感覺上佢唔係郁動好多，但夜晚食住奶訓著了，今朝仲唔願醒，真係唔想整醒佢，但最後都係俾我整醒左食奶，食完奶仲好乖咁同我拜拜等我可以安心返工 ^^

樹葉吹

濕悶了得多天，昨天終於轉涼稍為乾燥一點，風也大一點，吹得樹上的枯葉不住飄下來，我下車時還站在巴士站看了許久。樹枝上的新芽冒出來了，又一年了。

從婆婆家離開的時候，風又刮起了，吹起一地的枯葉。喜歡風的小小指著旋旋轉著的落葉，“嘩~嘩~”的叫起來，好可愛 ^^

@14month

互動

小小好鍾意離遠望住人地（其他小朋友），但當有小朋友走埋黎撩佢時，佢又會冇反應。以前都以為只係佢太細，但上星期六喺屋企樓下同一個都係14月大嘅BB相遇，當對方猛咁想摸小小時，小小只係望住人地，冇乜反應。最近睇倒陳錦鴻講佢自閉症仔仔嘅專訪，呢件事上左心，嗰刻突然諗：小小會唔會……？

差唔多時間又睇倒另一篇專題，話嗰嗰小朋兩歲“才”確診某種類近的病（我唔記得係咪自閉定其他），排政府排到五歲先到佢，已經錯過左黃金訓練/治療時間。兩歲“才確診”太遲?! 我突然有d驚。

但小小絕對係同人有互動的，雖然佢自己搣厠紙都可以搣得好開心，但當有人同佢玩d新奇嘢時，佢可以笑到好似馬叫咁勁cher到好高音，所以喺呢方面我相信其實我唔使擔心呱？

拜拜

“拜拜”係小小唯一有意識講/用嘅字詞。對佢黎講“拜拜”亦有“hi"嘅意思，所以佢朝朝都會同樓下保安員s（包括我地樓下同婆婆嗰邊）講拜拜。

“拜拜” 對小小黎講相信亦有“唔該借借”嘅意思，事源有一次喺婆婆度坐喺飯枱食飯時，小小對住企喺佢面前嘅舅父（我細佬）講拜拜，舅父每次行過佢都拜拜，如是者拜拜左幾次，我突然間領悟倒“唔通佢係話你遮住佢睇電視？因為拜拜完會唔見左，所以同你拜拜？”，於是舅父再企喺佢同電視之間，佢又“拜拜”，之後我地爆笑左 XD

行

自從一歲前後開始學行，經過兩個幾月嘅練習，而家喺屋企小小已經會自己行來行去喇。佢最鍾意跟人一齊去厠所，當然都鍾意入厨房啦，所以每當佢企圖走入厨房時婆婆就會話自己要入去厠所，引返小小離開厨房門口。

小小自從開始行得穩之後，仲非常鍾意上落樓梯。最初當然係“的”佢上級，而佢只係㩜隻腳上級，最近佢開始可以自己上樓梯，拖住佢嘅我隻手甚至唔覺得佢有喺我隻手度借力。

由於小小已經行得唔錯，所以我同爸爸已經想左好多個週末同佢再戰佐敦谷公園，可惜天氣一直都唔係幾好，又潮濕、又大霧、又毛毛雨。上星期六日終於等倒乾燥左幾日，於是星期日就去左佐敦谷公園!

一心諗住可以同小小喺草地上面喪奔，可惜小小雖然認得個公園，但就好似冇乜興趣，甚至另一個BB嘅媽媽狂向佢吹泡泡佢都冇反應……連嗰個媽媽都冇癮……到小小眼訓我地就離開公園喇。